IAF ਦੇ ‘ਤੇਜਸ’ ਜਹਾਜ਼ ਅਗਲੇ ਹਫ਼ਤੇ ਤੋਂ ਮੁੜ ਭਰਨਗੇ ਉਡਾਣ
20 ਨਵੇਂ ‘ਤੇਜਸ ਮਾਰਕ 1A' ਜੈੱਟ ਤਿਆਰ; HAL ਨੇ ਸਾਫਟਵੇਅਰ ਦੀ ਖ਼ਾਮੀ ਕੀਤੀ ਦੂਰ
ਫਰਵਰੀ ਵਿੱਚ ਹੋਏ ਇੱਕ ਹਾਦਸੇ ਤੋਂ ਬਾਅਦ ਜ਼ਮੀਨਦੋਜ਼ (grounded) ਕੀਤੇ ਗਏ ਭਾਰਤੀ ਹਵਾਈ ਫੌਜ ਦੇ ‘ਤੇਜਸ’ ਲੜਾਕੂ ਜਹਾਜ਼ਾਂ ਦਾ ਬੇੜਾ ਅਗਲੇ ਹਫ਼ਤੇ ਤੋਂ ਮੁੜ ਅਸਮਾਨ ਵਿੱਚ ਉਡਾਣ ਭਰਨ ਲਈ ਤਿਆਰ ਹੈ। ਹਿੰਦੁਸਤਾਨ ਐਰੋਨੌਟਿਕਸ ਲਿਮਟਿਡ (HAL) ਦੇ ਚੇਅਰਮੈਨ ਡੀ.ਕੇ. ਸੁਨੀਲ ਨੇ ਵੀਰਵਾਰ ਨੂੰ ਦੱਸਿਆ ਕਿ ਜਾਂਚ ਕਮੇਟੀ ਨੇ ਜਹਾਜ਼ ਦੇ ਬ੍ਰੇਕਿੰਗ ਸਿਸਟਮ ਵਿੱਚ ਆਈ ਸਾਫਟਵੇਅਰ ਦੀ ਖ਼ਾਮੀ ਨੂੰ ਸੁਧਾਰ ਲਿਆ ਹੈ ਅਤੇ ਇਸ ਨੂੰ ਉਡਾਣ ਲਈ ਹਰੀ ਝੰਡੀ ਦੇ ਦਿੱਤੀ ਹੈ।
ਜ਼ਿਕਰਯੋਗ ਹੈ ਕਿ 7 ਫਰਵਰੀ ਨੂੰ ਇੱਕ ਤੇਜਸ ਜਹਾਜ਼ ਉਡਾਣ ਭਰਦੇ ਸਮੇਂ ਰਨਵੇਅ ਤੋਂ ਫਿਸਲ ਕੇ ਖੱਡੇ ਵਿੱਚ ਜਾ ਡਿੱਗਿਆ ਸੀ, ਜਿਸ ਤੋਂ ਬਾਅਦ ਪੂਰੇ ਬੇੜੇ ਦੀ ਬਾਰੀਕੀ ਨਾਲ ਜਾਂਚ ਕੀਤੀ ਗਈ ਸੀ।ਦੂਜੇ ਪਾਸੇ, HAL ਚੇਅਰਮੈਨ ਨੇ ਦੱਸਿਆ ਕਿ 20 ਨਵੇਂ ‘ਤੇਜਸ ਮਾਰਕ 1A’ ਜੈੱਟ ਪੂਰੀ ਤਰ੍ਹਾਂ ਤਿਆਰ ਹਨ, ਪਰ ਉਨ੍ਹਾਂ ਨੂੰ ਅਮਰੀਕੀ ਕੰਪਨੀ ਜਨਰਲ ਇਲੈਕਟ੍ਰਿਕ (GE) ਵੱਲੋਂ ਇੰਜਣ ਮਿਲਣ ਦੀ ਉਡੀਕ ਹੈ।
ਹੁਣ ਤੱਕ ਸਿਰਫ਼ 5 ਇੰਜਣ ਹੀ ਪ੍ਰਾਪਤ ਹੋਏ ਹਨ, ਜਿਸ ਕਾਰਨ ਸਪਲਾਈ ਵਿੱਚ ਲਗਭਗ ਦੋ ਸਾਲ ਦੀ ਦੇਰੀ ਚੱਲ ਰਹੀ ਹੈ। ਮਈ ਵਿੱਚ ਹੋਣ ਵਾਲੀ ਉੱਚ-ਪੱਧਰੀ ਸਮੀਖਿਆ ਤੋਂ ਬਾਅਦ ਇਨ੍ਹਾਂ ਨਵੇਂ ਜਹਾਜ਼ਾਂ ਦੀ ਡਿਲੀਵਰੀ ਸ਼ੁਰੂ ਹੋਣ ਦੀ ਉਮੀਦ ਹੈ। ਤੇਜਸ ਦੇ ਸਫ਼ਰ ਵਿੱਚ ਹੁਣ ਤੱਕ ਤਿੰਨ ਹਾਦਸੇ ਵਾਪਰ ਚੁੱਕੇ ਹਨ, ਜਿਨ੍ਹਾਂ ਵਿੱਚ ਨਵੰਬਰ 2025 ਦਾ ਦੁਬਈ ਏਅਰਸ਼ੋਅ ਹਾਦਸਾ ਵੀ ਸ਼ਾਮਲ ਹੈ, ਜਿਸ ਵਿੱਚ ਵਿੰਗ ਕਮਾਂਡਰ ਨਮਾਂਸ਼ ਸਿਆਲ ਸ਼ਹੀਦ ਹੋ ਗਏ ਸਨ।
