ਧੁੰਦ ਕਾਰਨ ਲੇਟ ਹੋਈ ਫਲਾਈਟ; ਏਅਰ ਹੋਸਟੈੱਸ ਨੇ ਪੰਜਾਬੀ ‘ਚੁਟਕਲਿਆਂ’ ਨਾਲ ਜਿੱਤਿਆ ਸਭ ਦਾ ਦਿਲ
ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋਈ ਫਲਾਈਟ ਦੀ ਮਜ਼ੇਦਾਰ ਵੀਡੀਓ
ਅੰਮ੍ਰਿਤਸਰ ਤੋਂ ਦਿੱਲੀ ਜਾ ਰਹੀ ਇੰਡੀਗੋ ਦੀ ਇੱਕ ਫਲਾਈਟ ਜਦੋਂ ਸੰਘਣੀ ਧੁੰਦ ਕਾਰਨ ਪ੍ਰਭਾਵਿਤ ਹੋਈ, ਤਾਂ ਯਾਤਰੀਆਂ ਦੀ ਪਰੇਸ਼ਾਨੀ ਨੂੰ ਇੱਕ ਏਅਰ ਹੋਸਟੈੱਸ ਨੇ ਆਪਣੀ ਪੰਜਾਬੀ ‘ਗੱਪ-ਸ਼ੱਪ’ ਅਤੇ ਹਾਸੇ-ਮਜ਼ਾਕ ਨਾਲ ਖੁਸ਼ੀ ਵਿੱਚ ਬਦਲ ਦਿੱਤਾ।
ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋਈ ਇਸ ਵੀਡੀਓ ਨੇ ਲੋਕਾਂ ਦੇ ਦਿਲ ਜਿੱਤ ਲਏ ਹਨ, ਜਿਸ ਵਿੱਚ ਏਅਰ ਹੋਸਟੈੱਸ ਦੀ ਹਾਜ਼ਰ-ਜਵਾਬੀ ਦੇਖਣ ਵਾਲੀ ਹੈ।
ਵੀਡੀਓ ਵਿੱਚ ਏਅਰ ਹੋਸਟੈੱਸ ਯਾਤਰੀਆਂ ਨਾਲ ਮਜ਼ਾਕ ਕਰਦਿਆਂ ਕਹਿੰਦੀ ਹੈ, “ ਇਹ ਲਓ, ਇੱਥੇ ਕੁਲਚੇ ਖਾਣੇ ਸੀ, ਤੁਸੀਂ ਛੋਲੇ-ਭਟੂਰੇ ਦੇ ਲਈ ਬੈਠੇ ਹੋ?”
ਉਸ ਦੇ ਇਸ ਅੰਦਾਜ਼ ਨੇ ਫਲਾਈਟ ਵਿੱਚ ਮੌਜੂਦ ਸਾਰੇ ਯਾਤਰੀਆਂ ਦੇ ਢਿੱਡੀਂ ਪੀੜਾਂ ਪਾ ਦਿੱਤੀਆਂ। ਇੰਨਾ ਹੀ ਨਹੀਂ, ਉਸ ਨੇ ਬੜੀ ਮਾਸੂਮੀਅਤ ਨਾਲ ਆਪਣੀ ਗੱਲ ਰੱਖਦਿਆਂ ਕਿਹਾ, “ ਮੈਨੂੰ ਤਾਂ ਘਰ ਜਾਣਾ ਹੈ।” ਜਿਸ ਤੋਂ ਬਾਅਦ ਜਹਾਜ਼ ਵਿੱਚ ਹਾਸਾ ਹੋਰ ਵਧ ਗਿਆ।
View this post on Instagram
ਗੱਲਬਾਤ ਦੌਰਾਨ ਜਦੋਂ ਇੱਕ ਯਾਤਰੀ ਨੇ ਪੁੱਛਿਆ ਕਿ ਕੀ ਉਹ ਅੰਮ੍ਰਿਤਸਰ ਤੋਂ ਹੈ, ਤਾਂ ਉਸ ਨੇ ਹਾਂ ਵਿੱਚ ਜਵਾਬ ਦਿੰਦਿਆਂ ਆਪਣੇ ਇਲਾਕੇ ਦਾ ਨਾਮ ਦੱਸਿਆ। ਇਹ ਸੁਣ ਕੇ ਜਹਾਜ਼ ਵਿੱਚ ਮੌਜੂਦ ਬੱਚੇ ਵੀ ਉਤਸ਼ਾਹ ਨਾਲ ਬੋਲ ਪਏ “ਅਸੀਂ ਵੀ!”।
ਇਸ ਮਾਹੌਲ ਨੇ ਫਲਾਈਟ ਦੇ ਤਣਾਅਪੂਰਨ ਸਮੇਂ ਨੂੰ ਇੱਕ ਪਰਿਵਾਰਕ ਮਿਲਣੀ ਵਰਗਾ ਬਣਾ ਦਿੱਤਾ ਅਤੇ ਸਾਰੇ ਯਾਤਰੀਆਂ ਨੇ ਤਾਲੀਆਂ ਵਜਾ ਕੇ ਏਅਰ ਹੋਸਟੈੱਸ ਦਾ ਹੌਸਲਾ ਵਧਾਇਆ।
ਇੰਸਟਾਗ੍ਰਾਮ ’ਤੇ @food_mehkma ਵੱਲੋਂ ਸਾਂਝੀ ਕੀਤੀ ਗਈ ਇਸ ਵੀਡੀਓ ਨੂੰ ਹੁਣ ਤੱਕ 55 ਲੱਖ (5.5 ਮਿਲੀਅਨ) ਤੋਂ ਵੱਧ ਵਾਰ ਦੇਖਿਆ ਜਾ ਚੁੱਕਾ ਹੈ। ਯੂਜ਼ਰਸ ਨੇ ਏਅਰ ਹੋਸਟੈੱਸ ਦੀ ਸ਼ਲਾਘਾ ਕਰਦਿਆਂ ਲਿਖਿਆ ਕਿ ਮੁਸ਼ਕਿਲ ਹਾਲਤਾਂ ਵਿੱਚ ਵੀ ਸਬਰ ਅਤੇ ਪਿਆਰ ਨਾਲ ਗੱਲ ਕਰਨੀ ਇੱਕ ਵੱਡੀ ਕਲਾ ਹੈ। ਵੀਡੀਓ ਦੇ ਹੇਠਾਂ ਲੋਕਾਂ ਨੇ ਕਮੈਂਟ ਕੀਤੇ ਕਿ ਜੇਕਰ ਅਮਲਾ ਇੰਨਾ ਸਹਿਯੋਗੀ ਹੋਵੇ, ਤਾਂ ਯਾਤਰੀ ਵੀ ਸਥਿਤੀ ਨੂੰ ਸਮਝਦੇ ਹਨ ਅਤੇ ਗੁੱਸਾ ਕਰਨ ਦੀ ਬਜਾਏ ਸਾਥ ਦਿੰਦੇ ਹਨ
