Blinkit Delivery Dispute: 511 ਰੁਪਏ ਬਚਾਉਣ ਲਈ ਗਾਹਕ ਨੇ ਬੰਦ ਕੀਤਾ ਦਰਵਾਜ਼ਾ: ਹੱਕ ’ਚ ਇਕੱਠੇ ਹੋਏ 50 ਤੋਂ ਵੱਧ ਰਾਈਡਰ
Cash on Delivery ਆਰਡਰ ’ਤੇ ਖੜ੍ਹਾ ਹੋਇਆ ਹੰਗਾਮਾ; ਪੁਲੀਸ ਦੇ ਆਉਣ ਤੋਂ ਬਾਅਦ ਗਾਹਕ ਨੇ ਕੀਤਾ ਭੁਗਤਾਨ
ਉੱਤਰਾਖੰਡ ਦੇ ਰੁਦਰਪੁਰ ਸ਼ਹਿਰ ਦੀ ਬੀ.ਐਚ.ਈ.ਐਲ. ਕਾਲੋਨੀ (ਆਵਾਸ ਵਿਕਾਸ) ਵਿੱਚ ਲੰਘੀ 25 ਅਗਸਤ ਦੀ ਰਾਤ ਨੂੰ ਬਲਿੰਕਿਟ (Blinkit) ਦੇ ਇੱਕ ਡਿਲੀਵਰੀ ਰਾਈਡਰ ਨਾਲ ਰੁਟੀਨ ਦੇ COD ਆਰਡਰ ਨੂੰ ਲੈ ਕੇ ਅਜੀਬੋ-ਗਰੀਬ ਮਾਮਲਾ ਸਾਹਮਣੇ ਆਇਆ ਹੈ। ਗਾਹਕ ਵੱਲੋਂ 511 ਰੁਪਏ ਦਾ ਭੁਗਤਾਨ ਕੀਤੇ ਬਿਨਾਂ ਘਰ ਦਾ ਦਰਵਾਜ਼ਾ ਬੰਦ ਕਰ ਲੈਣ ਤੋਂ ਬਾਅਦ ਮੌਕੇ ’ਤੇ 50 ਦੇ ਲਗਭਗ ਸਾਥੀ ਡਿਲੀਵਰੀ ਰਾਈਡਰ ਇਕੱਠੇ ਹੋ ਗਏ, ਜਿਸ ਕਾਰਨ ਪੁਲੀਸ ਨੂੰ ਬੁਲਾਉਣਾ ਪਿਆ।
ਪ੍ਰਗਟ ਸਿੰਘ ਨਾਮ ਦੇ ਬਲਿੰਕਿਟ ਰਾਈਡਰ ਨੇ ਦੱਸਿਆ ਕਿ ਉਹ ਰਾਤ 8:30 ਵਜੇ ਮਨੀਸ਼ ਅਵਸਥੀ ਨਾਮ ਦੇ ਗਾਹਕ ਦੇ ਘਰ ਸਾਮਾਨ ਦੀ ਡਿਲੀਵਰੀ ਦੇਣ ਗਿਆ ਸੀ। ਕਿਉਂਕਿ ਇਹ ਕੈਸ਼-ਔਨ-ਡਿਲੀਵਰੀ ਆਰਡਰ ਸੀ, ਇਸ ਲਈ ਪੈਸੇ ਨਾ ਮਿਲਣ ਤੱਕ ਉਸ ਨੇ ਐਪ ’ਤੇ ਆਰਡਰ ਨੂੰ ‘ਡਿਲੀਵਰਡ’ ਮਾਰਕ ਨਹੀਂ ਕੀਤਾ। 10 ਮਿੰਟ ਇੰਤਜ਼ਾਰ ਕਰਨ, ਫੋਨ ਕਰਨ ਅਤੇ ਇਨ-ਐਪ ਚੈਟ ’ਤੇ ਸੁਨੇਹਾ ਭੇਜਣ ਦੇ ਬਾਵਜੂਦ ਜਦੋਂ ਅੰਦਰੋਂ ਕੋਈ ਜਵਾਬ ਨਾ ਆਇਆ, ਤਾਂ ਉਸ ਨੇ ਘੰਟੀ ਵਜਾਈ। ਘਰ ਦੇ ਅੰਦਰ ਲੋਕ ਮੌਜੂਦ ਸਨ, ਪਰ ਕਿਸੇ ਨੇ ਦਰਵਾਜ਼ਾ ਨਹੀਂ ਖੋਲ੍ਹਿਆ। ਝਗੜੇ ਅਤੇ ਜ਼ਬਰਦਸਤੀ ਅੰਦਰ ਵੜਨ ਦੇ ਦੋਸ਼ਾਂ ਤੋਂ ਬਚਣ ਲਈ ਪ੍ਰਗਟ ਨੇ ਆਪਣੇ ਸਥਾਨਕ ਰਾਈਡਰ ਗਰੁੱਪ ਵਿੱਚ ਮਦਦ ਦਾ ਸੁਨੇਹਾ ਪਾਇਆ।
ਸੁਨੇਹਾ ਮਿਲਦਿਆਂ ਹੀ ਇੱਕ-ਇੱਕ ਕਰਕੇ ਲਗਭਗ 40 ਤੋਂ 50 ਗਿਗ ਵਰਕਰ ਉਸ ਦੇ ਸਮਰਥਨ ਵਿੱਚ ਉੱਥੇ ਪਹੁੰਚ ਗਏ। ਰਾਈਡਰ ਯੋਗੇਸ਼ ਮਿਸ਼ਰਾ ਅਨੁਸਾਰ, ਮਾਮਲਾ ਸੁਲਝਣ ਤੱਕ ਖੇਤਰ ਦੇ ਹੋਰ ਰਾਈਡਰਾਂ ਨੇ ਵੀ ਆਪਣੀਆਂ ਡਿਲੀਵਰੀਆਂ ਰੋਕ ਦਿੱਤੀਆਂ। ਕੰਪਨੀ ਦੇ ਸਟੋਰ ਮੈਨੇਜਰ ਦੀ ਸਲਾਹ ’ਤੇ ਰਾਈਡਰਾਂ ਨੇ ਪੁਲੀਸ ਨੂੰ ਸੂਚਿਤ ਕੀਤਾ। ਪੁਲੀਸ ਦੇ ਮੌਕੇ ’ਤੇ ਪਹੁੰਚਣ ਤੋਂ ਬਾਅਦ ਗਾਹਕ ਨੇ ਸਫ਼ਾਈ ਦਿੱਤੀ ਕਿ ਉਹ ਭੁਗਤਾਨ ਕਰਨਾ ਭੁੱਲ ਗਿਆ ਸੀ ਅਤੇ ਉਸ ਨੂੰ ਕੈਸ਼-ਆਨ-ਡਿਲੀਵਰੀ ਬਾਰੇ ਸਹੀ ਜਾਣਕਾਰੀ ਨਹੀਂ ਸੀ। ਹਾਲਾਂਕਿ, ਪੁਲੀਸ ਦੀ ਦਖਲਅੰਦਾਜ਼ੀ ਤੋਂ ਬਾਅਦ ਗਾਹਕ ਨੇ ਪੂਰੇ 511 ਰੁਪਏ ਦਾ ਭੁਗਤਾਨ ਕਰ ਦਿੱਤਾ।
ਇਸ ਘਟਨਾ ਨੇ ਗਿਗ ਵਰਕਰਾਂ (Gig Workers) ਦੀ ਸੁਰੱਖਿਆ ਅਤੇ ਕੈਸ਼-ਔਨ-ਡਿਲੀਵਰੀ ਆਰਡਰਾਂ ਦੌਰਾਨ ਆਉਂਦੀਆਂ ਵਿਵਹਾਰਕ ਸਮੱਸਿਆਵਾਂ ਨੂੰ ਮੁੜ ਉਜਾਗਰ ਕੀਤਾ ਹੈ। ਪ੍ਰਗਟ ਸਿੰਘ ਨੇ ਕਿਹਾ ਕਿ ਇਸ ਘਟਨਾ ਤੋਂ ਉਸ ਨੇ ਸਬਕ ਲਿਆ ਹੈ ਕਿ ਹੁਣ ਉਹ ਹਮੇਸ਼ਾ ਪਹਿਲਾਂ ਪੈਸੇ ਵਸੂਲ ਕਰੇਗਾ ਅਤੇ ਬਾਅਦ ਵਿੱਚ ਹੀ ਆਰਡਰ ਦਾ ਸਾਮਾਨ ਗਾਹਕ ਦੇ ਹੱਥ ਫੜਾਏਗਾ।
