‘ਤੀਜੀ ਦੁਨੀਆ’ ਦੇ ਪਰਵਾਸੀਆਂ ਨੂੰ ਪੱਕੇ ਤੌਰ ’ਤੇ ਰੋਕਾਂਗੇ: ਟਰੰਪ

ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਅੱਜ ਕਿਹਾ ਕਿ ਉਹ ਸਾਰੇ ‘ਤੀਜੀ ਦੁਨੀਆ’ ਦੇ ਮੁਲਕਾਂ ਤੋਂ ਆਉਣ ਵਾਲੇ ਪਰਵਾਸੀਆਂ ਨੂੰ ‘ਪੱਕੇ ਤੌਰ ’ਤੇ ਰੋਕ’ ਦੇਣਗੇ ਅਤੇ ਉਨ੍ਹਾਂ ਵਿਦੇਸ਼ੀ ਨਾਗਰਿਕਾਂ ਨੂੰ ਦੇਸ਼ ’ਚੋਂ ਕੱਢ ਦੇਣਗੇ, ਜੋ ‘ਸੁਰੱਖਿਆ ਲਈ ਖਤਰਾ’ ਸਾਬਤ ਹੁੰਦੇ ਹਨ। ਟਰੰਪ ਪ੍ਰਸ਼ਾਸਨ ਨੇ ਅਫ਼ਗਾਨ ਨਾਗਰਿਕ ਰਹਿਮਾਨੁੱਲ੍ਹਾ ਅਕਨਵਾਲ ਵੱਲੋਂ ਨੈਸ਼ਨਲ ਗਾਰਡਜ਼ ਦੇ ਦੋ ਮੈਂਬਰਾਂ ’ਤੇ ਗੋਲੀਬਾਰੀ ਤੋਂ ਬਾਅਦ ਪਰਵਾਸੀਆਂ ’ਤੇ ਕੀਤੀ ਜਾ ਰਹੀ ਕਾਰਵਾਈ ਹੋਰ ਤੇਜ਼ ਕਰ ਦਿੱਤੀ ਹੈ। ਇਸ ਗੋਲੀਬਾਰੀ ’ਚ ਜ਼ਖ਼ਮੀ ਅਮਰੀਕੀ ਸੈਨਾ ਦੀ ਮਾਹਿਰ ਸਾਰਾ ਬੈਕਸਟਰੌਮ (20) ਦੀ ਮੌਤ ਹੋ ਗਈ, ਜਦਕਿ ਅਮਰੀਕੀ ਹਵਾਈ ਸੈਨਾ ਦੇ ਸਟਾਫ ਸਾਰਜੈਂਟ ਐਂਡ੍ਰਿਊ ਵੌਲਫ (24) ਦੀ ਹਾਲਤ ਗੰਭੀਰ ਹੈ। ਟਰੰਪ ਪ੍ਰਸ਼ਾਸਨ ਨੇ ਕਿਹਾ ਕਿ ਉਹ ‘ਹਰ ਗੜਬੜੀ ਵਾਲੇ ਮੁਲਕ’ ਤੋਂ ਆਏ ਪਰਵਾਸੀਆਂ ਨੂੰ ਜਾਰੀ ਸਾਰੇ ਗਰੀਨ ਕਾਰਡਾਂ ਦੀ ‘ਸਖ਼ਤੀ ਨਾਲ’ ਮੁੜ ਸਮੀਖਿਆ ਕਰੇਗਾ। ਟਰੰਪ ਨੇ ‘ਟਰੁੱਥ ਸੋਸ਼ਲ’ ਤੇ ਪੋਸਟ ’ਚ ਕਿਹਾ, ‘‘ਅਸੀਂ ਤਕਨੀਕੀ ਤੌਰ ’ਤੇ ਅੱਗੇ ਵੱਧ ਰਹੇ ਹਾਂ ਪਰ ਪਰਵਾਸ ਨੀਤੀਆਂ ਨੇ ਬਹੁਤ ਸਾਰੇ ਲੋਕਾਂ ਦੀ ਜਿਊਣ ਦੇ ਹਾਲਾਤ ਕਮਜ਼ੋਰ ਕਰ ਦਿੱਤੇ ਹਨ। ਮੈਂ ‘ਤੀਜੀ ਦੁਨੀਆ’ ਤੋਂ ਆਉਣ ਵਾਲੇ ਲੋਕਾਂ ਨੂੰ ਪੱਕੇ ਤੌਰ ’ਤੇ ਰੋਕ ਦੇਵਾਂਗਾ। ਮੈਂ ਬਾਇਡਨ ਪ੍ਰਸ਼ਾਸਨ ਵੱਲੋਂ ਲੋਕਾਂ ਨੂੰ ਗੈ਼ਰਵਾਜਿਬ ਢੰਗ ਨਾਲ ਦਿੱਤਾ ਦਾਖਲਾ ਖਤਮ ਕਰ ਦੇਵਾਂਗਾ ਤੇ ਉਨ੍ਹਾਂ ਸਾਰੇ ਲੋਕਾਂ ਨੂੰ ਦੇਸ਼ ’ਚੋਂ ਬਾਹਰ ਕੱਢ ਦੇਵਾਂਗੇ ਜੋ ਅਮਰੀਕਾ ਲਈ ਲਾਹੇਵੰਦ ਨਹੀਂ ਹਨ ਜਾਂ ਸਾਡੇ ਦੇਸ਼ ਨੂੰ ਪਿਆਰ ਨਹੀਂ ਕਰਦੇ।’’