US Iran Conflict: ਅਮਰੀਕੀ ਫ਼ੌਜ ਵੱਲੋਂ ਇਰਾਨ ’ਤੇ ਫਿਰ ਹਮਲਾ

ਇਸ ਦੌਰਾਨ ਅਮਰੀਕਾ ਨੇ ਹਰਮੁਜ਼ ਜਲ ਮਾਰਗ ’ਚ ਬੇੜਿਆਂ ਦੀ ਆਵਾਜਾਈ ਨੂੰ ਕੰਟਰੋਲ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਇਰਾਨੀ ਏਜੰਸੀ ਉੱਤੇ ਪਾਬੰਦੀਆਂ ਆਇਦ ਕੀਤੀਆਂ ਹਨ। ਟਰੰਪ ਪ੍ਰਸ਼ਾਸਨ ਦੀ ਇਸ ਪੇਸ਼ਕਦਮੀ ਦਾ ਮੁੱਖ ਮੰਤਵ ਇਸਲਾਮੀ ਗਣਰਾਜ ’ਤੇ ਆਰਥਿਕ ਦਬਾਅ ਵਧਾਉਣਾ ਹੈ। ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਐਲਾਨੀਆਂ ਗਈਆਂ ਇਹ ਪਾਬੰਦੀਆਂ ਇਰਾਨ ਦੀ ਫ਼ਾਰਸ ਖਾੜੀ ਜਲ ਮਾਰਗ ਅਥਾਰਿਟੀ ਤੇ ਇਸ ਏਜੰਸੀ ਨਾਲ ਸਹਿਯੋਗ ਕਰਨ ਵਾਲੇ ਕਿਸੇ ਵੀ ਵਿਅਕਤੀ ਜਾਂ ਸੰਸਥਾ ਨੂੰ ਨਿਸ਼ਾਨਾ ਬਣਾਉਂਦੀਆਂ ਹਨ। ਇਹ ਏਜੰਸੀ ਜਲ ਮਾਰਗ ਵਿੱਚ ਆਵਾਜਾਈ ਨੂੰ ਮਨਜ਼ੂਰੀ ਲਈ ਹਰੇਕ ਜਹਾਜ਼ ਤੋਂ 20 ਲੱਖ ਡਾਲਰ ਤੱਕ ਦਾ ਟੌਲ ਵਸੂਲਦੀ ਹੈ।

ਉੱਧਰ, ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਬੁੱਧਵਾਰ ਨੂੰ ਦਾਅਵਾ ਕੀਤਾ ਕਿ ਇਰਾਨ ‘ਕਮਜ਼ੋਰ ਸਥਿਤੀ ਵਿੱਚ ਗੱਲਬਾਤ ਕਰ ਰਿਹਾ ਹੈ।’ ਉਨ੍ਹਾਂ ਇਸ ਗੱਲ ’ਤੇ ਜ਼ੋਰ ਦਿੱਤਾ ਕਿ ਨਵੰਬਰ ਵਿੱਚ ਹੋਣ ਵਾਲੀਆਂ ਮੱਧਕਾਲੀ ਚੋਣਾਂ ਕਰ ਕੇ ਉਹ ਪਿਛਲੇ ਕਰੀਬ ਤਿੰਨ ਮਹੀਨਿਆਂ ਤੋਂ ਚੱਲ ਰਹੇ ਟਕਰਾਅ, ਜਿਸ ਨੇ ਆਲਮੀ ਅਰਥਚਾਰੇ ਵਿੱਚ ਬੇਚੈਨੀ ਪੈਦਾ ਕੀਤੀ ਹੈ, ਨੂੰ ਖ਼ਤਮ ਕਰਨ ਲਈ ਕੋਈ ਸਮਝੌਤਾ ਕਰਨ ਦੀ ਕਾਹਲ ਨਹੀਂ ਕਰਨਗੇ। ਕੈਬਨਿਟ ਬੈਠਕ ਦੀ ਸ਼ੁਰੂਆਤ ਤੋਂ ਪਹਿਲਾਂ ਟਰੰਪ ਨੇ ਭਰੋਸਾ ਜਤਾਇਆ ਕਿ ਅਮਰੀਕਾ-ਇਰਾਨ ਸਮਝੌਤਾ ਬਹੁਤ ਨੇੜੇ ਹੈ।