ਰੁੜ੍ਹ ਗਏ, ਦੱਬ ਗਏ ਅਤੇ ਫਸ ਗਏ

ਇਹ ਨੇਪਾਲ ਦੇ ਹੜ੍ਹ ਪ੍ਰਭਾਵਿਤ ਖੇਤਰਾਂ ਤੋਂ ਬਚਣ ਦੀਆਂ ਉਨ੍ਹਾਂ ਕਈ ਕਹਾਣੀਆਂ ਵਿੱਚੋਂ ਇੱਕ ਹੈ, ਜਿੱਥੇ ਲੋਕ ਡਿੱਗਦੀਆਂ ਬਸਤੀਆਂ ਤੋਂ ਭੱਜੇ, ਪਹਾੜੀਆਂ ’ਤੇ ਪਨਾਹ ਲਈ ਅਤੇ ਬਚਾਅ ਕਰਮਚਾਰੀਆਂ ਦੇ ਪਹੁੰਚਣ ਤੋਂ ਪਹਿਲਾਂ ਜੰਗਲਾਂ ਵਿੱਚ ਰਾਤਾਂ ਕੱਟੀਆਂ। ਨੇਪਾਲ ਵਿੱਚ ਅਚਾਨਕ ਆਏ ਭਿਆਨਕ ਹੜ੍ਹਾਂ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ ਸ਼ਨਿਚਰਵਾਰ ਨੂੰ 600 ਨੂੰ ਪਾਰ ਕਰ ਗਈ, ਕਿਉਂਕਿ ਬਚਾਅ ਟੀਮਾਂ ਸਮੇਂ ਦੇ ਵਿਰੁੱਧ ਦੌੜਦੀਆਂ ਹੋਈਆਂ ਭਾਲ ਅਤੇ ਰਾਹਤ ਕਾਰਜਾਂ ਵਿੱਚ ਲੱਗੀਆਂ ਹੋਈਆਂ ਹਨ, ਜਦੋਂ ਕਿ 2,400 ਤੋਂ ਵੱਧ ਲੋਕ ਅਜੇ ਵੀ ਲਾਪਤਾ ਹਨ।

ਨੇਪਾਲ-ਤਿੱਬਤ ਸਰਹੱਦ ’ਤੇ ਸਥਿਤ ਕਸਬੇ ਤਿਮੁਰੇ ਵਿੱਚ ਕਸਟਮ ਏਜੰਟ ਰਾਜੂ ਬੁਧਾਥੋਕੀ ਲਈ, ਤਬਾਹੀ ਉਦੋਂ ਸ਼ੁਰੂ ਹੋਈ ਜਦੋਂ ਬੁੱਧਵਾਰ ਸਵੇਰੇ ਅਚਾਨਕ ਪਹਾੜੀ ਹਿਲਣ ਲੱਗੀ। ‘ਕਾਠਮੰਡੂ ਪੋਸਟ’ ਅਨੁਸਾਰ, ਬੁਧਾਥੋਕੀ ਜੋ ਆਪਣੇ ਕਮਰੇ ਵਿੱਚ ਆਰਾਮ ਕਰ ਰਿਹਾ ਸੀ, ਨੇ ਸ਼ੁਰੂ ਵਿੱਚ ਸੋਚਿਆ ਕਿ ਭੂਚਾਲ ਆਇਆ ਹੈ। ਉਹ ਬਾਹਰ ਭੱਜਿਆ ਅਤੇ ਨੇੜਲੀ ਪੁਲੀਸ ਚੌਕੀ ਵੱਲ ਗਿਆ, ਪਰ ਦੇਖਿਆ ਕਿ ਪੁਲੀਸ ਵਾਲੇ ਖ਼ੁਦ ਭੱਜ ਰਹੇ ਸਨ। ਜਦੋਂ ਉਹ ਤਾਰ ਦੀ ਵਾੜ ਕੋਲੋਂ ਲੰਘ ਰਿਹਾ ਸੀ, ਤਾਂ ਉਸ ਦੇ ਹੱਥ ਵਿੱਚ ਸੱਟ ਲੱਗ ਗਈ। ਅਖ਼ਬਾਰ ਦੀ ਖ਼ਬਰ ਮੁਤਾਬਕ ਪਿੱਛੇ ਮੁੜ ਕੇ ਉਸ ਨੇ ਦੇਖਿਆ ਕਿ ਤਿਮੁਰੇ ਬਾਜ਼ਾਰ ਦੇ ਘਰ ਹੜ੍ਹ ਵਿੱਚ ਇੱਕ ਤੋਂ ਬਾਅਦ ਇੱਕ ਰੁੜ੍ਹ ਰਹੇ ਸਨ ਤੇ ਕੁਝ ਸਕਿੰਟਾਂ ਵਿੱਚ ਹੀ ਨਦੀ ਵਿੱਚ ਸਮਾ ਗਏ।