ਰੂਸ ਨੇ ਕੀਵ ਸਮੇਤ ਕਈ ਯੂਕਰੇਨੀ ਸ਼ਹਿਰਾਂ 'ਤੇ ਮਿਜ਼ਾਈਲ ਅਤੇ ਡਰੋਨ ਹਮਲੇ ਕੀਤੇ
ਜਵਾਬ ਵਿੱਚ ਯੂਕਰੇਨ ਨੇ ਵੀ ਰੂਸ ਦੇ ਕਈ ਠਿਕਾਣਿਆਂ ਨੂੰ ਬਣਾਇਆ ਨਿਸ਼ਾਨਾ
ਰੂਸ ਨੇ ਯੂਕਰੇਨ ਦੇ ਕਈ ਸ਼ਹਿਰਾਂ ਉੱਤੇ ਬੁੱਧਵਾਰ ਰਾਤ ਤੋਂ ਵੀਰਵਾਰ ਸਵੇਰ ਤੱਕ ਮਿਜ਼ਾਈਲਾਂ ਅਤੇ ਡਰੋਨਾਂ ਨਾਲ ਵੱਡੇ ਪੱਧਰ ਉੱਤੇ ਹਮਲੇ ਕੀਤੇ। ਇਸ ਦੌਰਾਨ ਰਾਜਧਾਨੀ ਕੀਵ ਵਿੱਚ ਸਵੇਰ ਤੱਕ ਧਮਾਕਿਆਂ ਦੀਆਂ ਆਵਾਜ਼ਾਂ ਸੁਣਾਈ ਦਿੰਦੀਆਂ ਰਹੀਆਂ।
ਯੂਕਰੇਨ ਕੋਲ ਰੂਸ ਦੀਆਂ ਬੈਲਿਸਟਿਕ ਮਿਜ਼ਾਈਲਾਂ ਦਾ ਮੁਕਾਬਲਾ ਕਰਨ ਵਾਲੀਆਂ ਅਮਰੀਕੀ ਪੈਟ੍ਰਿਅਟ ਹਵਾ ਰੱਖਿਆ ਮਿਜ਼ਾਈਲਾਂ ਦੀ ਭਾਰੀ ਘਾਟ ਹੈ। ਉੱਥੇ ਹੀ, ਰੂਸ ਦੇ ਤੇਜ਼ ਗਤੀ ਵਾਲੇ ਜੈੱਟ ਇੰਜਣ ਨਾਲ ਚੱਲਣ ਵਾਲੇ ਡਰੋਨਾਂ ਨੇ ਵੀ ਯੂਕਰੇਨ ਦੀ ਆਸਮਾਨ ਵਿੱਚ ਰੱਖਿਆ ਦੇ ਸਾਹਮਣੇ ਇੱਕ ਨਵੀਂ ਚੁਣੌਤੀ ਪੇਸ਼ ਕੀਤੀ ਹੈ।
ਰੂਸੀ ਫ਼ੌਜ ਵੱਲੋਂ ਕਰੀਬ ਸਾਢੇ ਚਾਰ ਸਾਲ ਪਹਿਲਾਂ ਸ਼ੁਰੂ ਕੀਤੀ ਗਈ ਜੰਗ ਤੋਂ ਬਾਅਦ ਤੋਂ ਯੂਕਰੇਨ ਲਗਾਤਾਰ ਇਨ੍ਹਾਂ ਚੁਣੌਤੀਆਂ ਦਾ ਸਾਹਮਣਾ ਕਰ ਰਿਹਾ ਹੈ।
ਯੂਕਰੇਨੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਰੂਸ ਮਿਜ਼ਾਈਲਾਂ ਦਾ ਭੰਡਾਰ ਵਧਾ ਰਿਹਾ ਹੈ ਅਤੇ ਕੁਝ ਦਿਨਾਂ ਬਾਅਦ ਵੱਡੇ ਹਮਲੇ ਕਰ ਰਿਹਾ ਹੈ ਤਾਂ ਜੋ ਵੱਡੀ ਗਿਣਤੀ ਵਿੱਚ ਹਮਲੇ ਕਰਕੇ ਯੂਕਰੇਨ ਦੀ ਹਵਾਈ ਰੱਖਿਆ ਪ੍ਰਣਾਲੀ ਨੂੰ ਖਤਮ ਕੀਤਾ ਜਾ ਸਕੇ। ਇਸ ਦੇ ਜਵਾਬ ਵਿੱਚ ਯੂਕਰੇਨ ਨੇ ਵੀ ਰੂਸ ਦੀ ਧਰਤੀ ਉੱਤੇ ਮਹੱਤਵਪੂਰਨ ਠਿਕਾਣਿਆਂ ਨੂੰ ਨਿਸ਼ਾਨਾ ਬਣਾਇਆ ਹੈ।
ਰੂਸ ਦੇ ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ ਉਸ ਦੀ ਫ਼ੌਜ ਨੇ ਬੁੱਧਵਾਰ ਰਾਤ ਤੋਂ ਬਾਅਦ ਯੂਕਰੇਨ ਦੇ ਨੌਂ ਸ਼ਹਿਰਾਂ ਵਿੱਚ "ਵੱਡੇ ਪੱਧਰ ਉੱਤੇ" ਹਮਲੇ ਕੀਤੇ। ਮੰਤਰਾਲੇ ਮੁਤਾਬਕ, ਫ਼ੌਜੀ ਗਤੀਵਿਧੀਆਂ ਨਾਲ ਜੁੜੇ ਠਿਕਾਣੇ, ਉਦਯੋਗਿਕ ਅਦਾਰੇ, ਤੇਲ ਰਿਫਾਇਨਰੀ, ਲੌਜਿਸਟਿਕ ਕੇਂਦਰ ਅਤੇ ਬੰਦਰਗਾਹਾਂ ਦਾ ਬੁਨਿਆਦੀ ਢਾਂਚੇ ਨੂੰ ਨਿਸ਼ਾਨਾ ਬਣਾਇਆ ਗਿਆ।
ਹਮਲੇ ਵਿੱਚ ਰਿਹਾਇਸ਼ੀ ਇਮਾਰਤਾਂ ਸਮੇਤ ਨਾਗਰਿਕ ਖੇਤਰਾਂ ਨੂੰ ਵੀ ਨੁਕਸਾਨ ਪਹੁੰਚਿਆ। ਯੂਕਰੇਨੀ ਅਧਿਕਾਰੀਆਂ ਦੇ ਅਨੁਸਾਰ, ਦੱਖਣੀ ਜ਼ਾਪੋਰਿਝਿਆ ਖੇਤਰ ਵਿੱਚ ਇੱਕ 78 ਸਾਲਾ ਔਰਤ ਅਤੇ ਉੱਤਰੀ ਖਾਰਕਿਵ ਖੇਤਰ ਵਿੱਚ ਇੱਕ ਹੋਰ ਆਦਮੀ ਦੀ ਮੌਤ ਹੋ ਗਈ।ਇਸ ਤੋਂ ਇਲਾਵਾ ਹੋਰ ਥਾਵਾਂ ਉੱਤੇ ਘੱਟੋ-ਘੱਟ 14 ਲੋਕ ਜ਼ਖ਼ਮੀ ਹੋਏ।
