ਆਈਸ ਖ਼ਿਲਾਫ਼ ਲੋਕ ਸੜਕਾਂ ’ਤੇ ਉੱਤਰੇ
ਮਿਨੀਪੋਲਿਸ ਮਗਰੋਂ ਓਰੇਗਨ ’ਚ ਫੈਡਰਲ ਅਧਿਕਾਰੀਆਂ ਦੀ ਗੋਲੀਬਾਰੀ ’ਚ ਦੋ ਜ਼ਖ਼ਮੀ
ਇਮੀਗਰੇਸ਼ਨ ਤੇ ਕਸਟਮਜ਼ ਐਨਫੋਰਸਮੈਂਟ (ਆਈ ਸੀ ਈ) ਅਫਸਰ ਵੱਲੋਂ ਗੋਲੀ ਮਾਰ ਕੇ ਇੱਕ ਮਹਿਲਾ ਦੀ ਹੱਤਿਆ ਕੀਤੇ ਜਾਣ ਦੇ ਰੋਸ ਵਜੋਂ ਵੱਡੀ ਗਿਣਤੀ ਲੋਕਾਂ ਨੇ ਰੋਸ ਮੁਜ਼ਾਹਰੇ ਕੀਤੇ। ਦੂਜੇ ਪਾਸੇ ਓਰੇਗਨ ’ਚ ਫੈਡਰਲ ਅਧਿਕਾਰੀਆਂ ਵੱਲੋਂ ਕੀਤੀ ਗਈ ਇੱਕ ਹੋਰ ਗੋਲੀਬਾਰੀ ’ਚ ਦੋ ਜਣੇ ਜ਼ਖ਼ਮੀ ਹੋ ਗਏ ਅਤੇ ਇਸ ਨਾਲ ਪੂਰੇ ਅਮਰੀਕਾ ’ਚ ਐਨਫੋਰਸਮੈਂਟ ਮੁਹਿੰਮਾਂ ਦੀ ਜਾਂਚ ਹੋਰ ਤੇਜ਼ ਹੋ ਗਈ ਹੈ।
ਗੋਲੀਬਾਰੀ ’ਚ ਰੈਨੀ ਗੁਡ ਨਾਂ ਦੀ ਮਹਿਲਾ ਦੀ ਮੌਤ ਦੇ ਰੋਸ ਵਜੋਂ ਸੈਂਕੜੇ ਲੋਕ ਮਿਨੀਪੋਲਿਸ ਦੀ ਮੁੱਖ ਸੜਕ ’ਤੇ ਮਾਰਚ ਕਰਦੇ ਹੋਏ ਆਈ ਸੀ ਈ ਖ਼ਿਲਾਫ਼ ਨਾਅਰੇਬਾਜ਼ੀ ਕਰ ਰਹੇ ਸਨ। ਇਸ ਤੋਂ ਪਹਿਲਾਂ ਪ੍ਰਦਰਸ਼ਨਕਾਰੀਆਂ ਨੇ ਫੈਡਰਲ ਸੁਵਿਧਾ ਕੇਂਦਰ ਦੇ ਬਾਹਰ ਰੋਸ ਮੁਜ਼ਹਰਾ ਕੀਤਾ। ਗੋਲੀਬਾਰੀ ਦੀ ਨਵੀਂ ਘਟਨਾ ਓਰੇਗਨ ਦੇ ਪੋਰਟਲੈਂਡ ’ਚ ਹਸਪਾਤਲ ਦੇ ਬਾਹਰ ਵਾਪਰੀ ਜਿਸ ਦੌਰਾਨ ਵਾਹਨ ਅੰਦਰ ਬੈਠੇ ਪੁਰਸ਼ ਤੇ ਮਹਿਲਾ ਜ਼ਖ਼ਮੀ ਹੋ ਗਏ। ਐੱਫ ਬੀ ਆਈ ਤੇ ਓਰੇਗਨ ਨਿਆਂ ਵਿਭਾਗ ਮਾਮਲੇ ਦੀ ਜਾਂਚ ਕਰ ਰਹੇ ਹਨ। ਮੇਅਰ ਕੀਥ ਵਿਲਸਨ ਤੇ ਨਗਰ ਕੌਂਸਲ ਨੇ ਆਈ ਸੀ ਈ ਨੂੰ ਸ਼ਹਿਰ ’ਚ ਸਾਰੀਆਂ ਗਤੀਵਿਧੀਆਂ ਉਦੋਂ ਤੱਕ ਬੰਦ ਕਰਨ ਲਈ ਕਿਹਾ ਹੈ ਜਦੋਂ ਤੱਕ ਜਾਂਚ ਮੁਕੰਮਲ ਨਹੀਂ ਹੋ ਜਾਂਦੀ।
ਮਿਨੀਪੋਲਿਸ ਗੋਲੀਬਾਰੀ ਦੀ ਘਟਨਾ ਦੀ ਤਰ੍ਹਾਂ ਹੀ ਪੋਰਟਲੈਂਡ ’ਚ ਵੀ ਗ੍ਰਹਿ ਸੁਰੱਖਿਆ ਵਿਭਾਗ ਨੇ ਆਈ ਸੀ ਈ ਅਧਿਕਾਰੀਆਂ ਦੀ ਕਾਰਵਾਈ ਦਾ ਬਚਾਅ ਕੀਤਾ ਹੈ।
