Nepal floods: ਆਫ਼ਤ ਮਾਰੇ ਨੇਪਾਲ ਦੀ ਮਦਦ ਲਈ ਵਧੇ ਹੱਥ

ਤਿੰਨ ਦਿਨਾਂ ਅੰਦਰ ਰਾਹਤ ਫੰਡ ’ਚ ਦੋ ਅਰਬ ਰੁਪਏ ਤੋਂ ਵੱਧ ਰਾਸ਼ੀ ਇਕੱਠੀ ਹੋਈ

PTI

ਕਾਠਮੰਡੂ, 02:08 AM Aug 30, 2026 IST

ਨੁਵਾਕੋਟ ਜ਼ਿਲ੍ਹੇ ਦੇ ਦੇਵੀਘਾਟ ’ਚ ਹੜ੍ਹ ਮਗਰੋਂ ਤਬਾਹ ਹੋਏ ਘਰ ਨੂੰ ਦੇਖ ਕੇ ਝੂਰਦੀ ਹੋਈ ਮਹਿਲਾ। -ਫੋਟੋ: ਰਾਇਟਰਜ਼

ਨੇਪਾਲ ’ਚ ਅਚਾਨਕ ਆਏ ਹੜ੍ਹਾਂ ਕਾਰਨ ਮਚੀ ਭਾਰੀ ਤਬਾਹੀ ਮਗਰੋਂ ਦੇਸ਼ ਦੇ ਪ੍ਰਧਾਨ ਮੰਤਰੀ ਆਫ਼ਤ ਰਾਹਤ ਫੰਡ ’ਚ ਲੋਕ ਦਿਲ ਖੋਲ੍ਹ ਕੇ ਦਾਨ ਕਰ ਰਹੇ ਹਨ ਅਤੇ ਲੰਘੇ ਤਿੰਨ ਦਿਨਾਂ ਅੰਦਰ 2.295 ਅਰਬ ਰੁਪਏ ਤੋਂ ਵੱਧ ਦੀ ਰਾਸ਼ੀ ਪ੍ਰਾਪਤ ਹੋਈ ਹੈ। ਨੇਪਾਲ ਦੇ ਸਰਕਾਰੀ ਅਤੇ ਨਿੱਜੀ ਖੇਤਰਾਂ ਦੇ ਨਾਲ ਨਾਲ ਆਮ ਲੋਕਾਂ ਨੇ ਆਫ਼ਤ ਫੰਡ ’ਚ ਲੱਖਾਂ ਰੁਪਏ ਦੇਣ ਦਾ ਵਾਅਦਾ ਕੀਤਾ ਹੈ।ਨੇਪਾਲ ’ਚ ਲੰਘੇ ਬੁੱਧਵਾਰ ਅਚਾਨਕ ਆਏ ਹੜ੍ਹ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ ਵਧ ਕੇ 626 ਹੋ ਗਈ ਹੈ। ਇਸ ਹੜ੍ਹ ਨੇ ਕਸਬੇ ਅਤੇ ਪਿੰਡ ਤਬਾਹ ਕਰ ਦਿੱਤੇ ਹਨ ਜਿਸ ਨਾਲ ਘਰ, ਗੱਡੀਆਂ, ਸੜਕਾਂ ਅਤੇ ਪੁਲ ਰੁੜ੍ਹ ਗਏ ਅਤੇ ਪਣ-ਬਿਜਲੀ ਪ੍ਰਾਜੈਕਟਾਂ ਨੂੰ ਵੀ ਨੁਕਸਾਨ ਪੁੱਜਿਆ ਹੈ। ਹੁਣ ਵੀ ਤਕਰਬੀਨ 2400 ਵਿਅਕਤੀ ਲਾਪਤਾ ਹਨ। ਪ੍ਰਧਾਨ ਮੰਤਰੀ ਦਫ਼ਤਰ ਦੇ ਸੂਤਰਾਂ ਨੇ ਦੱਸਿਆ ਕਿ ਬੁੱਧਵਾਰ ਦੁਪਹਿਰ ਤੋਂ ਵੀਰਵਾਰ ਅੱਧੀ ਰਾਤ ਤੱਕ 36 ਘੰਟਿਆਂ ਅੰਦਰ ਫੰਡ ’ਚ ਲੋਕਾਂ ਨੇ 1.91 ਅਰਬ ਰੁਪਏ ਦਾਨ ਕੀਤੇ ਜਦਕਿ ਇਕੱਲੇ ਸ਼ੁੱਕਰਵਾਰ ਨੂੰ 38.55 ਕਰੋੜ ਰੁਪਏ ਦੀ ਸਹਾਇਤਾ ਰਾਸ਼ੀ ਜਮ੍ਹਾਂ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਹਾਲ ਹੀ ਦੇ ਯੋਗਦਾਨ ਨਾਲ ਫੰਡ ’ਚ ਜਮ੍ਹਾਂ ਰਾਸ਼ੀ 2.17 ਅਰਬ ਰੁਪਏ ਤੋਂ ਵੱਧ ਕੇ 4.09 ਅਰਬ ਰੁਪਏ ਹੋ ਗਈ ਹੈ।

ਸਰਕਾਰ ਨੇ ਫੰਡ ’ਚ ਦਾਨ ਇਕੱਠਾ ਕਰਨ ਅਤੇ ਮਦਦ ’ਚ ਤਾਲਮੇਲ ਲਈ ਵਿੱਤ ਮੰਤਰਾਲੇ ਨੂੰ ਨੋਡਲ ਮੰਤਰਾਲੇ ਵਜੋਂ ਨਾਮਜ਼ਦ ਕੀਤਾ ਹੈ। ਵਿੱਤ ਮੰਤਰਾਲੇ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਆਫ਼ਤ ਰਾਹਤ ਫੰਡ ’ਚ ਮਦਦ ਲਈ ਦਿੱਤੇ ਜਾਣ ਵਾਲੇ ਦਾਨ ਨੂੰ 10 ਵੱਖ ਵੱਖ ਬੈਂਕਾਂ ’ਚ ਮੌਜੂਦ ਖਾਤਿਆਂ ’ਚ ਜਮ੍ਹਾਂ ਕਰਵਾਇਆ ਜਾ ਰਿਹਾ ਹੈ।

Tags :