Israel and US Attack: ਖ਼ਮੇਨੀ ਦਾ ਪਰਿਵਾਰ ਹਵਾਈ ਹਮਲੇ ਵਿੱਚ ਹਲਾਕ: ਇਰਾਨ ਦੀਆਂ ਸੜਕਾਂ ’ਤੇ ਜਸ਼ਨ ਦਾ ਮਾਹੌਲ
ਧੀ ਅਤੇ ਜਵਾਈ ਦੀ ਵੀ ਮੌਤ ;ਪ੍ਰਦਰਸ਼ਨਕਾਰੀਆਂ ਨੇ ਲਗਾਏ ‘ਇਸਲਾਮਿਕ ਰਿਪਬਲਿਕ ਮੁਰਦਾਬਾਦ’ ਦੇ ਨਾਅਰੇ
Israel and US Attack: ਤਾਜ਼ਾ ਰਿਪੋਰਟਾਂ ਅਨੁਸਾਰ ਇਜ਼ਰਾਈਲ ਅਤੇ ਅਮਰੀਕਾ ਦੇ ਹਵਾਈ ਹਮਲਿਆਂ ਵਿੱਚ ਇਰਾਨ ਦੇ ਸੁਪਰੀਮ ਲੀਡਰ ਅਲੀ ਖ਼ਮੇਨੀ ਦੀ ਬੇਟੀ, ਪੋਤੇ-ਪੋਤੀਆਂ ਅਤੇ ਜਵਾਈ ਦੇ ਮਾਰੇ ਜਾਣ ਦੀ ਵੀ ਖ਼ਬਰ ਹੈ। ਇਰਾਨ ਦੇ ਕਈ ਸ਼ਹਿਰਾਂ ਤੋਂ ਜਸ਼ਨ ਦੀਆਂ ਤਸਵੀਰਾਂ ਸਾਹਮਣੇ ਆ ਰਹੀਆਂ ਹਨ।
ਸਟੇਟ ਮੀਡੀਆ ਮੁਤਾਬਕ, ਕਰਜ ਅਤੇ ਤੇਹਰਾਨ ਦੇ ਕਈ ਇਲਾਕਿਆਂ ਵਿੱਚ ਲੋਕ ਸੜਕਾਂ ’ਤੇ ਉਤਰ ਆਏ ਹਨ। ਵੀਡੀਓਜ਼ ਵਿੱਚ ਇਰਾਨੀ ਔਰਤਾਂ ਨੂੰ ਬਿਨਾਂ ਹਿਜਾਬ ਤੋਂ ਨੱਚਦੇ ਅਤੇ ‘ਇਸਲਾਮਿਕ ਰਿਪਬਲਿਕ ਮੁਰਦਾਬਾਦ’ ਤੇ ‘ਸ਼ਾਹ ਜ਼ਿੰਦਾਬਾਦ’ ਦੇ ਨਾਅਰੇ ਲਗਾਉਂਦੇ ਦੇਖਿਆ ਗਿਆ ਹੈ। ਲੰਡਨ ਵਿੱਚ ਵੀ ਇਰਾਨੀ ਅਤੇ ਇਜ਼ਰਾਈਲੀ ਮੂਲ ਦੇ ਲੋਕਾਂ ਨੇ ਇਕੱਠੇ ਮਿਲ ਕੇ ਇਸ ਘਟਨਾ ’ਤੇ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ ਹੈ।
ਦੂਜੇ ਪਾਸੇ, ਜਲਾਵਤਨੀ ਵਿੱਚ ਰਹਿ ਰਹੇ ਇਰਾਨੀ ਸ਼ਹਿਜ਼ਾਦੇ ਰਜ਼ਾ ਪਹਿਲਵੀ ਨੇ ਲੋਕਾਂ ਨੂੰ ਇੱਕਜੁੱਟ ਹੋਣ ਦਾ ਸੱਦਾ ਦਿੱਤਾ ਹੈ। ਉਨ੍ਹਾਂ ਨੇ ਸੋਸ਼ਲ ਮੀਡੀਆ ’ਤੇ ਲਿਖਿਆ ਕਿ ਖ਼ਮੇਨੀ ਦੇ ਅੰਤ ਨਾਲ ਇਰਾਨ ਵਿੱਚ ਜ਼ੁਲਮ ਦਾ ਇੱਕ ਅਧਿਆਇ ਖ਼ਤਮ ਹੋ ਗਿਆ ਹੈ ਅਤੇ ਹੁਣ ਦੇਸ਼ ਨੂੰ ਇੱਕ ਆਜ਼ਾਦ ਅਤੇ ਖੁਸ਼ਹਾਲ ਭਵਿੱਖ ਵੱਲ ਵਧਣਾ ਚਾਹੀਦਾ ਹੈ।
ਉਨ੍ਹਾਂ ਨੇ ਇਰਾਨੀ ਸੁਰੱਖਿਆ ਬਲਾਂ ਨੂੰ ਵੀ ਅਪੀਲ ਕੀਤੀ ਹੈ ਕਿ ਉਹ ਡਿੱਗ ਰਹੀ ਹਕੂਮਤ ਦਾ ਸਾਥ ਦੇਣ ਦੀ ਬਜਾਏ ਜਨਤਾ ਨਾਲ ਆ ਮਿਲਣ। ਇਸ ਦੇ ਨਾਲ ਹੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਇਸ ਕਾਰਵਾਈ ਨੂੰ ਇਰਾਨੀ ਲੋਕਾਂ ਅਤੇ ਦੁਨੀਆ ਲਈ ‘ਇਨਸਾਫ਼’ ਕਰਾਰ ਦਿੱਤਾ ਹੈ। ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਜਦੋਂ ਤੱਕ ਮੱਧ ਪੂਰਬ ਵਿੱਚ ਸ਼ਾਂਤੀ ਸਥਾਪਤ ਨਹੀਂ ਹੁੰਦੀ, ਉਦੋਂ ਤੱਕ ਬੰਬਾਰੀ ਜਾਰੀ ਰਹੇਗੀ।
