Canada Liberal MP Car fire: ਲਿਬਰਲ ਐੱਮ.ਪੀ. ਸਲਮਾ ਜ਼ਾਹਿਦ ਦੇ ਘਰ ਬਾਹਰ ਕਾਰਾਂ ਨੂੰ ਲਗਾਈ ਅੱਗ, ਪਰਿਵਾਰ ਵਾਲ-ਵਾਲ ਬਚਿਆ
ਮੰਤਰੀ ਮਾਰਕ ਕਾਰਨੀ ਨੇ ਇਸ ਨੂੰ ‘ਹਿੰਸਾ ਅਤੇ ਧਮਕਾਉਣ ਦੀ ਕਾਇਰਾਨਾ ਕਾਰਵਾਈ’ ਕਿਹਾ
ਸਕਾਰਬਰੋ ਵਿੱਚ ਲਿਬਰਲ ਐੱਮ ਪੀ ਸਲਮਾ ਜ਼ਾਹਿਦ ਦੇ ਘਰ ਦੇ ਬਾਹਰ ਵੀਰਵਾਰ ਤੜਕੇ ਦੋ ਵਾਹਨਾਂ ਨੂੰ ਅੱਗ ਲਗਾਏ ਜਾਣ ਦੀ ਘਟਨਾ ਤੋਂ ਬਾਅਦ ਟੋਰਾਂਟੋ ਪੁਲੀਸ ਨੇ ਸ਼ੱਕੀ ਘਟਨਾ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪੁਲੀਸ ਮੁਤਾਬਕ ਇਸ ਘਟਨਾ ਵਿੱਚ ਕੁੱਲ ਤਿੰਨ ਵਾਹਨ ਨੁਕਸਾਨੇ ਗਏ ਹਨ, ਜਦੋਂਕਿ ਜ਼ਾਹਿਦ ਦੇ ਦਫ਼ਤਰ ਨੇ ਪੁਸ਼ਟੀ ਕੀਤੀ ਹੈ ਕਿ ਉਨ੍ਹਾਂ ਦੀ ਕਾਰ ਅਤੇ ਇੱਕ ਗੁਆਂਢੀ ਦੀ ਕਾਰ ਅੱਗ ਦੀ ਲਪੇਟ ਵਿੱਚ ਆ ਕੇ ਪੂਰੀ ਤਰ੍ਹਾਂ ਤਬਾਹ ਹੋ ਗਈਆਂ। ਘਟਨਾ ਬੈਲੈਮੀ ਰੋਡ ਨਾਰਥ ਅਤੇ ਲਾਰੰਸ ਐਵੇਨਿਊ ਈਸਟ ਨੇੜੇ ਵਾਪਰੀ। ਪੁਲੀਸ ਅਤੇ ਫਾਇਰ ਅਮਲੇ ਨੂੰ ਵੀਰਵਾਰ ਤੜਕੇ ਕਰੀਬ 1:20 ਤੋਂ 1:30 ਵਜੇ ਦੇ ਦਰਮਿਆਨ ਸੂਚਨਾ ਮਿਲੀ। ਅੱਗ ’ਤੇ ਕਾਬੂ ਪਾਉਣ ਮਗਰੋਂ ਮਾਮਲਾ ਪੁਲੀਸ ਦੇ ਹਵਾਲੇ ਕਰ ਦਿੱਤਾ ਗਿਆ। ਕਿਸੇ ਵਿਅਕਤੀ ਦੇ ਜ਼ਖ਼ਮੀ ਹੋਣ ਦੀ ਸੂਚਨਾ ਨਹੀਂ ਹੈ।
ਜ਼ਾਹਿਦ ਨੇ ਜਾਰੀ ਕੀਤੇ ਬਿਆਨ ਵਿੱਚ ਕਿਹਾ ਕਿ ਉਨ੍ਹਾਂ ਦੇ ਪੁੱਤਰ ਨੇ ਅੱਗ ਦੇਖ ਕੇ 911 ’ਤੇ ਕਾਲ ਕੀਤੀ, ਜਦਕਿ ਗੁਆਂਢੀਆਂ ਨੇ ਵੀ ਐਮਰਜੈਂਸੀ ਸੇਵਾਵਾਂ ਨੂੰ ਸੂਚਿਤ ਕੀਤਾ। ਉਨ੍ਹਾਂ ਕਿਹਾ ਕਿ ਦੋਵੇਂ ਵਾਹਨ ਤਬਾਹ ਹੋ ਗਏ ਪਰ ਘਰ ਨੂੰ ਕੋਈ ਨੁਕਸਾਨ ਨਹੀਂ ਪਹੁੰਚਿਆ ਅਤੇ ਉਹ ਤੇ ਉਨ੍ਹਾਂ ਦਾ ਪਰਿਵਾਰ ਸੁਰੱਖਿਅਤ ਹਨ। ਜ਼ਾਹਿਦ ਨੇ ਸੰਭਾਵਿਤ ਮਕਸਦ ਬਾਰੇ ਕੋਈ ਅੰਦਾਜ਼ਾ ਲਾਉਣ ਤੋਂ ਇਨਕਾਰ ਕੀਤਾ। ਉਨ੍ਹਾਂ ਕਿਹਾ ਕਿ ਉਹ ਜਾਂਚ ਦੇ ਨਤੀਜਿਆਂ ਦੀ ਉਡੀਕ ਕਰਨਗੇ ਅਤੇ ਅਜਿਹੀ ਘਟਨਾ ਉਨ੍ਹਾਂ ਨੂੰ ਸਕਾਰਬਰੋ ਸੈਂਟਰ-ਡੌਨ ਵੈਲੀ ਈਸਟ ਦੇ ਲੋਕਾਂ ਦੀ ਨੁਮਾਇੰਦਗੀ ਕਰਨ ਦੇ ਕੰਮ ਤੋਂ ਪਿੱਛੇ ਨਹੀਂ ਹਟਾਏਗੀ।
ਟੋਰਾਂਟੋ ਪੁਲੀਸ ਦੀ ਬੁਲਾਰਨ ਸਟੈਫਨੀ ਮਿਸੇਲੀ ਮੁਤਾਬਕ ਮਾਮਲੇ ਨੂੰ ਸ਼ੱਕੀ ਅੱਗਜ਼ਨੀ ਵਜੋਂ ਦੇਖਿਆ ਜਾ ਰਿਹਾ ਹੈ। ਪੁਲੀਸ ਨੇ ਅਜੇ ਤੱਕ ਕਿਸੇ ਸ਼ੱਕੀ ਵਿਅਕਤੀ ਦੀ ਪਛਾਣ ਜਾਂ ਮਕਸਦ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ। ਜਾਂਚਕਰਤਾ ਇਲਾਕੇ ਵਿੱਚ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀਆਂ ਰਿਕਾਰਡਿੰਗਾਂ ਖੰਘਾਲ ਰਹੇ ਹਨ ਅਤੇ ਘਟਨਾ ਬਾਰੇ ਜਾਣਕਾਰੀ ਰੱਖਣ ਵਾਲੇ ਲੋਕਾਂ ਨਾਲ ਗੱਲ ਕਰਨਾ ਚਾਹੁੰਦੇ ਹਨ।
ਘਟਨਾ ਨੇ ਰਾਜਨੀਤਿਕ ਪੱਧਰ ’ਤੇ ਵੀ ਪ੍ਰਤੀਕਿਰਿਆ ਪੈਦਾ ਕੀਤੀ ਹੈ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਇਸ ਨੂੰ ‘ਹਿੰਸਾ ਅਤੇ ਧਮਕਾਉਣ ਦੀ ਕਾਇਰਾਨਾ ਕਾਰਵਾਈ’ ਕਰਾਰ ਦਿੰਦਿਆਂ ਕਿਹਾ ਕਿ ਇਹ ਕੈਨੇਡਾ ਦੀ ਪਛਾਣ ਨਹੀਂ ਹੈ। ਉਨ੍ਹਾਂ ਜ਼ਾਹਿਦ ਅਤੇ ਉਨ੍ਹਾਂ ਦੇ ਪਰਿਵਾਰ ਦੇ ਸੁਰੱਖਿਅਤ ਹੋਣ ’ਤੇ ਰਾਹਤ ਜ਼ਾਹਰ ਕੀਤੀ ਅਤੇ ਪੁਲੀਸ ਦੀ ਜਾਂਚ ਨੂੰ ਪੂਰਾ ਸਮਰਥਨ ਦਿੱਤਾ।
ਸਲਮਾ ਜ਼ਾਹਿਦ 2015 ਤੋਂ ਸਕਾਰਬਰੋ ਸੈਂਟਰ ਦੀ ਸੰਸਦ ਮੈਂਬਰ ਹਨ। ਇਸ ਵੇਲੇ ਉਹ ਸੰਸਦ ਦੀ ਵਿਗਿਆਨ ਅਤੇ ਖੋਜ ਬਾਰੇ ਸਥਾਈ ਕਮੇਟੀ ਦੀ ਚੇਅਰਪਰਸਨ ਹਨ। ਘਟਨਾ ਦੇ ਸਿਆਸੀ ਮਕਸਦ ਨਾਲ ਜੁੜੇ ਹੋਣ ਬਾਰੇ ਫ਼ਿਲਹਾਲ ਕੋਈ ਪੁਲੀਸ ਪੁਸ਼ਟੀ ਨਹੀਂ ਹੋਈ।
ਜਾਂਚ ਅੱਗੇ ਵਧਣ ਨਾਲ ਸੀਸੀਟੀਵੀ ਫੁਟੇਜ ਅਤੇ ਗਵਾਹਾਂ ਤੋਂ ਮਿਲਣ ਵਾਲੀ ਜਾਣਕਾਰੀ ਇਹ ਸਪਸ਼ਟ ਕਰਨ ਵਿੱਚ ਅਹਿਮ ਹੋ ਸਕਦੀ ਹੈ ਕਿ ਅੱਗ ਕਿਵੇਂ ਲੱਗੀ ਅਤੇ ਇਸ ਪਿੱਛੇ ਕੌਣ ਸੀ। ਫ਼ਿਲਹਾਲ ਪੁਲੀਸ ਵੱਲੋਂ ਕੋਈ ਸ਼ੱਕੀ ਜਾਰੀ ਨਾ ਕੀਤੇ ਜਾਣ ਕਾਰਨ ਮਕਸਦ ਬਾਰੇ ਕਿਸੇ ਵੀ ਤਰ੍ਹਾਂ ਦੀ ਅਟਕਲਬਾਜ਼ੀ ਤੋਂ ਬਚਣਾ ਹੀ ਜਾਂਚ ਦੀ ਅਸਲ ਤਸਵੀਰ ਹੈ।
