ਕੈਨੇਡਾ: ਭਰਜਾਈ ਦੀ ਹੱਤਿਆ ਦੇ ਦੋਸ਼ ਹੇਠ ਦਿਉਰ ਗ੍ਰਿਫ਼ਤਾਰ

ਡੈਲਟਾ ਸ਼ਹਿਰ ’ਚ ਹਾਈਵੇਅ ’ਤੇ ਕਾਰ ’ਚੋਂ ਮਿਲੀ ਸੀ ਔਰਤ ਦੀ ਲਾਸ਼

Gurcharan singh Kahlon

ਵੈਨਕੂਵਰ, 05:47 AM Nov 29, 2025 IST

ਮਨਦੀਪ ਕੌਰ ਦੀ ਪੁਰਾਣੀ ਤਸਵੀਰ।

ਡੈਲਟਾ ਸ਼ਹਿਰ ’ਚ ਮਹੀਨਾ ਪਹਿਲਾਂ ਹਾਈਵੇਅ ’ਤੇ ਸੜੀ ਹੋਈ ਕਾਰ ਵਿੱਚੋਂ ਔਰਤ ਦੀ ਲਾਸ਼ ਮਿਲਣ ਦੇ ਮਾਮਲੇ ਵਿੱਚ ਪੁਲੀਸ ਨੇ ਇੱਕ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਮ੍ਰਿਤਕਾ ਦੀ ਪਛਾਣ ਮਨਦੀਪ ਕੌਰ ਖਹਿਰਾ (30) ਵਜੋਂ ਹੋਈ ਸੀ। ਗ੍ਰਿਫ਼ਤਾਰ ਵਿਅਕਤੀ ਦੀ ਪਛਾਣ ਗੁਰਜੋਤ ਸਿੰਘ ਖਹਿਰਾ (24) ਵਾਸੀ ਸਰੀ ਵਜੋਂ ਦੱਸੀ ਗਈ, ਜੋ ਮ੍ਰਿਤਕਾ ਮਨਦੀਪ ਦਾ ਦਿਉਰ ਹੈ। ਗੁਰਜੋਤ ਸਿੰਘ ਖ਼ਿਲਾਫ਼ ਦੂਜਾ ਦਰਜਾ ਕਤਲ ਦੇ ਦੋਸ਼ ਆਇਦ ਕੀਤੇ ਗਏ ਹਨ ਅਤੇ ਉਸ ਨੂੰ 11 ਦਸੰਬਰ ਨੂੰ ਜੱਜ ਮੂਹਰੇ ਪੇਸ਼ ਕੀਤਾ ਜਾਵੇਗਾ। ਮਨਦੀਪ ਕੌਰ ਪਹਿਲਾਂ ਐਡਮਿੰਟਨ ਰਹਿੰਦੀ ਸੀ ਤੇ ਵਿਆਹ ਮਗਰੋਂ ਪਤੀ ਕੋਲ ਸਰੀ ਰਹਿਣ ਲੱਗ ਪਈ। ਉਹ ਲੁਧਿਆਣਾ ਜ਼ਿਲ੍ਹੇ ਦੇ ਪਿੰਡ ਗੁੱਜਰਵਾਲ ਤੋਂ ਸਿੱਧਵਾਂ ਬੇਟ ਨੇੜਲੇ ਪਿੰਡ ਲੋਧੀਵਾਲ ਦੇ ਪਿਛੋਕੜ ਵਾਲੇ ਪਰਿਵਾਰ ’ਚ ਵਿਆਹੀ ਸੀ। ਡੈਲਟਾ ਪੁਲੀਸ ਨੂੰ ਹਾਈਵੇਅ-17 ’ਤੇ 75-ਸਟਰੀਟ ਕੋਲ ਕਾਰ ਨੂੰ ਅੱਗ ਲੱਗਣ ਦੀ ਘਟਨਾ ਦੀ ਸੂਚਨਾ ਮਿਲੀ ਸੀ। ਪੁਲੀਸ ਨੇ ਜਾਂਚ ਦੌਰਾਨ ਠੋਸ ਸਬੂਤ ਮਿਲਣ ਮਗਰੋਂ ਗੁਰਜੋਤ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਹੱਤਿਆ ਤੇ ਕਾਰ ਸੜਨ ਦੇ ਕਾਰਨਾਂ ਬਾਰੇ ਸਵਾਲ ’ਤੇ ਡੈਲਟਾ ਪੁਲੀਸ ਨੇ ਕਿਹਾ ਕਿ ਜਾਂਚ ਹਾਲੇ ਚੱਲ ਰਹੀ ਹੈ ਅਤੇ ਕੁਝ ਵੀ ਦੱਸਣ ਨਾਲ ਜਾਂਚ ਪ੍ਰਭਾਵਿਤ ਹੋ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਮਾਮਲੇ ਸਬੰਧੀ ਵੇਰਵੇ ਮੁਲਜ਼ਮ ਦੀ 11 ਦਸੰਬਰ ਨੂੰ ਅਦਾਲਤ ’ਚ ਪੇਸ਼ੀ ਮੌਕੇ ਦਿੱਤੇ ਜਾਣਗੇ।