WSK Final Cup: Atiqa Mir ਨੇ ਦੋ ਵਾਰ ਚੋਟੀ ਦੇ ਚਾਰਾਂ ’ਚ ਫਿਨਿਸ਼ ਕੀਤਾ
ਦੋ ਹੀਟ ਰੇਸਾਂ ਤੋਂ ਬਾਅਦ 72 ਡਰਾਈਵਰਾਂ ਵਿੱਚੋਂ 14ਵੇਂ ਸਥਾਨ ’ਤੇ ਰਹੀ
ਭਾਰਤੀ ਰੇਸਿੰਗ ਪ੍ਰਤਿਭਾ ਅਤੀਕਾ ਮੀਰ ਨੇ ਕਾਰਟਿੰਗ ਦੀ ਦੁਨੀਆ ਵਿੱਚ ਆਪਣੀ ਲਗਾਤਾਰ ਪੇਸ਼ਕਦਮੀ ਨੂੰ ਜਾਰੀ ਰੱਖਦਿਆਂ, ਸੈੱਟਅੱਪ ਦੀਆਂ ਸਮੱਸਿਆਵਾਂ ਉੱਤੇ ਕਾਬੂ ਪਾਉਂਦਿਆਂ ਡਬਲਿਊ ਐੱਸ ਕੇ ਫਾਈਨਲ ਕੱਪ ਦੇ ਰਾਊਂਡ 1 ਵਿੱਚ ਦੋ ਸ਼ਾਨਦਾਰ ਚੋਟੀ ਦੇ ਚਾਰ ਸਥਾਨ ਹਾਸਲ ਕੀਤੇ। ਇਸ 11 ਸਾਲਾ ਖਿਡਾਰਨ ਲਈ ਕੁਆਲੀਫਾਇੰਗ ਸੈਸ਼ਨ ਯੋਜਨਾ ਮੁਤਾਬਕ ਨਹੀਂ ਰਿਹਾ ਅਤੇ ਉਹ ਸਿਰਫ਼ ਨੌਵਾਂ ਸਭ ਤੋਂ ਤੇਜ਼ ਸਮਾਂ ਹੀ ਕੱਢ ਸਕੀ। ਹਾਲਾਂਕਿ, ਐੱਫ-1 ਅਕੈਡਮੀ ਵੱਲੋਂ ਸਮਰਥਨ ਪ੍ਰਾਪਤ ਕਰਨ ਵਾਲੀ ਪਹਿਲੀ ਭਾਰਤੀ ਨੇ ਰੇਸ 1 ਅਤੇ ਰੇਸ 2 ਦੋਵਾਂ ਵਿੱਚ ਸ਼ਾਨਦਾਰ ਸ਼ੁਰੂਆਤ ਕਰਦਿਆਂ ਫੀਲਡ ਵਿੱਚੋਂ ਅੱਗੇ ਨਿਕਲ ਕੇ ਲਗਾਤਾਰ ਦੋ ਵਾਰ ਸ਼ਾਨਦਾਰ ਚੌਥਾ ਸਥਾਨ ਸੁਰੱਖਿਅਤ ਕੀਤਾ।
ਇਨ੍ਹਾਂ ਦੋ ਹੀਟ ਰੇਸਾਂ ਤੋਂ ਬਾਅਦ, ਅਤੀਕਾ ਨੂੰ 72 ਡਰਾਈਵਰਾਂ ਵਿੱਚੋਂ 14ਵੇਂ ਸਥਾਨ (ਪੀ14) ਉੱਤੇ ਰੱਖਿਆ ਗਿਆ। ਇਸ ਨਾਲ ਉਹ ਪ੍ਰੀ-ਫਾਈਨਲ ਲਈ ਸੱਤਵੇਂ ਗਰਿਡ ਸਥਾਨ ’ਤੇ ਪਹੁੰਚ ਗਈ, ਜਿੱਥੇ ਉਹ ਰੇਸ ਦੇ ਵੱਡੇ ਹਿੱਸੇ ਵਿੱਚ ਪੰਜਵੇਂ ਨੰਬਰ ’ਤੇ ਰਹਿਣ ਤੋਂ ਬਾਅਦ ਅੰਤ ਵਿੱਚ ਨੌਵੇਂ ਸਥਾਨ ’ਤੇ ਰਹੀ। ਫਾਈਨਲ ਵਿੱਚ, ਅਤੀਕਾ ਇੱਕ ਹਾਦਸੇ ਦਾ ਸ਼ਿਕਾਰ ਹੋ ਗਈ, ਜਿਸ ਨਾਲ ਉਸ ਦਾ ਕਾਰਟ ਨੁਕਸਾਨਿਆ ਗਿਆ ਅਤੇ ਉਸ ਦੀ ਰੇਸ ਖ਼ਤਮ ਹੋ ਗਈ।
ਜੇ ਕੇ ਟਾਇਰ ਅਤੇ ਰੇਜ਼-ਬੈਕਡ ਡਰਾਈਵਰ ਨੇ ਕਿਹਾ, ‘‘ਮੇਰੇ ਲਈ ਇਹ ਮਿਲਿਆ-ਜੁਲਿਆ ਹਫ਼ਤਾ ਰਿਹਾ। ਮੈਨੂੰ ਹੋਰ ਆਸਾਂ ਸਨ ਪਰ ਸਾਨੂੰ ਰਫ਼ਤਾਰ ਲਈ ਸੰਘਰਸ਼ ਕਰਨਾ ਪਿਆ। ਮੈਂ ਜ਼ਿਆਦਾਤਰ ਰੇਸਾਂ ਵਿੱਚ ਆਪਣਾ ਰਸਤਾ ਬਣਾ ਕੇ ਅੱਗੇ ਨਿਕਲਣ ਵਿੱਚ ਸਫਲ ਰਹੀ ਅਤੇ ਪ੍ਰੀ-ਫਾਈਨਲ ਤੇ ਫਾਈਨਲ ਲਈ ਮੁਕਾਬਲੇਬਾਜ਼ੀ ਵਾਲੀ ਸਥਿਤੀ ਵਿੱਚ ਸੀ।’’ ਉਸ ਨੇ ਹੋਰ ਕਿਹਾ, ‘‘ਪਰ ਚੀਜ਼ਾਂ ਮੇਰੇ ਹਿਸਾਬ ਨਾਲ ਨਹੀਂ ਗਈਆਂ ਅਤੇ ਫ੍ਰਾਂਸੀਆਕੋਰਟਾ ਦੇ ਲੰਬੇ ਸਿੱਧੇ ਰਸਤਿਆਂ ਉੱਤੇ ਰਫ਼ਤਾਰ ਦੀ ਘਾਟ ਨੇ ਮੈਨੂੰ ਨੁਕਸਾਨ ਪਹੁੰਚਾਇਆ।’’
