World Para Archery Series: ਸ਼ੀਤਲ ਦੇਵੀ ਨੇ ਫਾਈਨਲ ਵਿੱਚ ਪਹੁੰਚ ਕੇ ਤਗ਼ਮਾ ਕੀਤਾ ਪੱਕਾ

ਮੌਜੂਦਾ ਵਿਸ਼ਵ ਚੈਂਪੀਅਨ ਭਾਰਤੀ ਪੈਰਾ ਤੀਰਅੰਦਾਜ਼ ਸ਼ੀਤਲ ਦੇਵੀ ਨੇ ਵਿਸ਼ਵ ਤੀਰਅੰਦਾਜ਼ੀ ਪੈਰਾ ਸੀਰੀਜ਼ ਦੇ ਮਹਿਲਾ ਕੰਪਾਊਂਡ ਈਵੈਂਟ ਦੇ ਫਾਈਨਲ ਵਿੱਚ ਥਾਂ ਬਣਾ ਕੇ ਭਾਰਤ ਦਾ ਤਗ਼ਮਾ ਪੱਕਾ ਕਰ ਦਿੱਤਾ ਹੈ। ਅੱਜ ਖੇਡੇ ਗਏ ਸੈਮੀ ਫਾਈਨਲ ਮੁਕਾਬਲੇ ਵਿੱਚ ਜੰਮੂ ਦੀ ਇਸ ਖਿਡਾਰਨ ਨੇ ਆਪਣੀ ਹੀ ਹਮਵਤਨ ਸਰਿਤਾ ਨੂੰ 145-143 ਨਾਲ ਹਰਾਇਆ। ਹੁਣ ਸੋਨ ਤਗ਼ਮੇ ਲਈ ਉਸ ਦਾ ਸਾਹਮਣਾ ਕਜ਼ਾਖਸਤਾਨ ਦੀ ਏਜ਼ਾਦਾ ਸੇਦਾਨ ਨਾਲ ਹੋਵੇਗਾ। ਦੂਜੇ ਪਾਸੇ, ਸੈਮੀ ਫਾਈਨਲ ਵਿੱਚ ਮਿਲੀ ਹਾਰ ਦੇ ਬਾਵਜੂਦ ਸਰਿਤਾ ਕਾਂਸੇ ਦੇ ਤਗ਼ਮੇ ਲਈ ਚੀਨ ਦੀ ਵਾਂਗ ਹੁਇਤਿੰਗ ਨਾਲ ਭਿੜੇਗੀ। ਪੁਰਸ਼ਾਂ ਦੇ ਕੰਪਾਊਂਡ ਵਰਗ ਵਿੱਚ ਦੁਨੀਆਂ ਦੇ ਨੰਬਰ ਇੱਕ ਖਿਡਾਰੀ ਤੋਮਾਨ ਕੁਮਾਰ ਨੂੰ ਸੈਮੀ ਫਾਈਨਲ ਵਿੱਚ ਇੰਡੋਨੇਸ਼ੀਆ ਦੇ ਸਿਖਰਲਾ ਦਰਜਾ ਪ੍ਰਾਪਤ ਕੇਨ ਸਵਾਗੁਮਿਲਾਂਗ ਹੱਥੋਂ 146-144 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ ਅਤੇ ਹੁਣ ਉਹ ਕਾਂਸੇ ਦੇ ਤਗ਼ਮੇ ਲਈ ਇਰਾਕ ਦੇ ਅੱਬਾਸ ਕਾਹਦਿਮ ਨਾਲ ਭਿੜੇਗਾ।

ਇਸ ਤੋਂ ਪਹਿਲਾਂ ਕੇਨ ਨੇ ਕੁਆਰਟਰ ਫਾਈਨਲ ਵਿੱਚ ਭਾਰਤ ਦੇ ਗੁਰਵਿੰਦਰ ਸਿੰਘ ਨੂੰ 143-141 ਨਾਲ ਹਰਾ ਕੇ ਬਾਹਰ ਕੀਤਾ ਸੀ। ਡਬਲਿਊ-1 ਪੁਰਸ਼ ਵਰਗ ਵਿੱਚ ਭਾਰਤ ਦੀ ਮੁਹਿੰਮ ਕੁਆਰਟਰ ਫਾਈਨਲ ਵਿੱਚ ਹੀ ਖ਼ਤਮ ਹੋ ਗਈ। ਆਦਿਲ ਮੁਹੰਮਦ ਨਜ਼ੀਰ ਅੰਸਾਰੀ ਸ਼ੂਟ-ਆਫ ਵਿੱਚ ਚੈੱਕ ਗਣਰਾਜ ਦੇ ਡੇਵਿਡ ਤੋਂ 5-6 (8-10) ਨਾਲ ਹਾਰ ਗਿਆ। ਨੁਰੂਦੀਨ ਨੂੰ ਚੀਨ ਦੇ ਯਾਂਗ ਜ਼ੂਪੇਂਗ ਨੇ 2-6 ਨਾਲ ਹਰਾਇਆ। ਸੈਮੀ ਫਾਈਨਲ ਵਿੱਚ ਚੀਨ ਦੀ ਲਿਊ ਜਿੰਗ ਤੋਂ ਹਾਰਨ ਮਗਰੋਂ ਭਾਰਤੀ ਖਿਡਾਰਨ ਸਵਾਤੀ ਚੌਧਰੀ ਕਾਂਸੀ ਦੇ ਤਗ਼ਮੇ ਲਈ ਖੇਡੇਗੀ।