World Cup football: ਪੁਰਤਗਾਲ ਨੇ ਕ੍ਰੋਏਸ਼ੀਆ ਨੂੰ 2-1 ਨਾਲ ਹਰਾਇਆ

ਕ੍ਰੋਏਸ਼ੀਆ ਲਈ 53ਵੇਂ ਮਿੰਟ ਵਿੱਚ ਇਵਾਨ ਪੇਰਿਸਿਚ ਨੇ ਗੋਲ ਨਾਲ ਲੀਡ ਬਣਾਈ, ਪਰ ਰੋਨਾਲਡੋ ਨੇ 68ਵੇਂ ਮਿੰਟ ਵਿੱਚ ਪੈਨਲਟੀ ਕਿੱਕ ਨੂੰ ਗੋਲ ਵਿੱਚ ਬਦਲ ਕੇ ਸਕੋਰ ਲਾਈਨ 1-1 ਨਾਲ ਡਰਾਅ ਕਰ ਦਿੱਤੀ। ਪੁਰਤਗਾਲ ਦੀ ਜਿੱਤ ਦਾ ਨਾਇਕ ਰਾਮੋਸ ਰਿਹਾ, ਜਿਸ ਨੇ ਇੰਜਰੀ ਟਾਈਮ ਦੇ ਚੌਥੇ ਮਿੰਟ ਵਿੱਚ ਉਦੋਂ ਗੋਲ ਕੀਤਾ ਜਦੋਂ ਲੱਗ ਰਿਹਾ ਸੀ ਕਿ ਮੈਚ ਵਾਧੂ ਸਮੇਂ ’ਚ ਖਿੱਚਿਆ ਜਾਵੇਗਾ। ਪੁਰਤਗਾਲ ਸੋਮਵਾਰ ਨੂੰ ਪ੍ਰੀ ਕੁਆਰਟਰਜ਼ ਵਿੱਚ ਸਪੇਨ ਨਾਲ ਮੱਥਾ ਲਾਏਗਾ। -ਏਪੀ

ਸਪੇਨ ਨੇ 16 ਸਾਲਾਂ ਬਾਅਦ ਨਾਕਆਊਟ ਮੁਕਾਬਲਾ ਜਿੱਤਿਆ

ਇੰਗਲਵੁੱਡ: ਖ਼ਿਤਾਬ ਦੇ ਮਜ਼ਬੂਤ ਦਾਅਵੇਦਾਰ ਸਪੇਨ ਨੇ ਮਿਕੇਲ ਓਯਾਰਜ਼ਾਬਲ ਦੇ ਦੋ ਗੋਲਾਂ ਦੀ ਬਦੌਲਤ ਆਸਟਰੀਆ ਨੂੰ 3-0 ਨਾਲ ਹਰਾ ਕੇ 2010 ਵਿੱਚ ਚੈਂਪੀਅਨ ਬਣਨ ਮਗਰੋਂ ਪਹਿਲੀ ਵਾਰ ਫੀਫਾ ਆਲਮੀ ਕੱਪ ਫੁਟਬਾਲ ਦੇ ਨਾਕਆਊਟ ਗੇੜ ਵਿੱਚ ਕੋਈ ਮੈਚ ਜਿੱਤਿਆ ਹੈ। ਓਯਾਰਜ਼ਾਬਲ ਨੇ 36ਵੇਂ ਤੇ 89ਵੇਂ ਮਿੰਟ ਵਿੱਚ ਗੋਲ ਕੀਤੇ। ਇਸ ਦਰਮਿਆਨ ਪੈਡਰੋ ਪੋਰੋ ਨੇ 66ਵੇਂ ਮਿੰਟ ਵਿੱਚ ਗੋਲ ਕੀਤਾ। ਸਪੈਨਿਸ਼ ਟੀਮ ਨੇ ਮੈਚ ਦੌਰਾਨ ਗੇਂਦ ਉੱਤੇ ਪੂਰੀ ਤਰ੍ਹਾਂ ਕੰਟਰੋਲ ਰੱਖਿਆ ਅਤੇ ਹਮਲਾਵਰ ਤੇ ਕਲਾਤਮਕ ਖੇਡ ਦਾ ਚੰਗਾ ਨਮੂਨਾ ਪੇਸ਼ ਕੀਤਾ। ਸਪੇਨ ਨੇ ਮੌਜੂਦਾ ਆਲਮੀ ਕੱਪ ਵਿੱਚ ਹੁਣ ਤੱਕ ਇਕ ਵੀ ਗੋਲ ਨਹੀਂ ਖਾਧਾ ਹੈ। ਗੋਲਕੀਪਰ ਉਨਾਈ ਸਾਇਮਨ ਨੇ ਵਿਸ਼ਵ ਕੱਪ ਦੇ ਇਤਿਹਾਸ ਵਿੱਚ ਸਭ ਤੋਂ ਲੰਮੇ ਸਮੇਂ (519 ਮਿੰਟ) ਤੱਕ ਗੋਲ ਨਾ ਖਾਣ ਦਾ 36 ਸਾਲ ਪੁਰਾਣਾ ਰਿਕਾਰਡ ਤੋੜ ਦਿੱਤਾ। ਸਾਇਮਨ ਨੇ ਇਟਲੀ ਦੇ ਮਸ਼ਹੂਰ ਗੋਲਕੀਪਰ ਵਾਲਟਰ ਜ਼ੇਂਗਾ ਵੱਲੋਂ 1990 ਵਿੱਚ ਬਣਾਏ ਰਿਕਾਰਡ ਨੂੰ ਤੋੜਿਆ। ਮੈਚ ਦੌਰਾਨ ਆਸਟਰੀਆ ਦੀ ਟੀਮ ਗੋਲ ਵੱਲ ਇਕ ਵੀ ਸ਼ਾਟ ਨਹੀਂ ਲਗਾ ਸਕੀ। ਓਯਾਰਜ਼ਾਬਲ ਨੇ ਮੈਚ ਮਗਰੋਂ ਕਿਹਾ, ‘‘ਮੈਨੂੰ ਖ਼ੁਸ਼ੀ ਹੈ ਮੈਂ ਟੀਮ ਨੂੰ ਅਗਲੇ ਦੌਰ ਵਿੱਚ ਪਹੁੰਚਾਉਣ ਵਿੱਚ ਸਫਲ ਰਿਹਾ। ਇਹ ਮੁਸ਼ਕਲ ਮੈਚ ਸੀ।’’ ਸਪੇਨ ਦਾ ਅਗਲਾ ਮੁਕਾਬਲਾ ਸੋਮਵਾਰ ਨੂੰ ਡਲਾਸ ਵਿੱਚ ਪੁਰਤਗਾਲ ਖਿਲਾਫ਼ ਹੋਵੇਗਾ। ਸਪੇਨ ਦਾ ਸਟਰਾਈਕਰ ਲਾਮਿਨ ਯਾਮਲ ਭਾਵੇਂ ਗੋਲ ਨਹੀਂ ਕਰ ਸਕਿਆ, ਪਰ ਉਸ ਨੇ ਆਪਣੀ ਖੇਡ ਨਾਲ ਪ੍ਰਭਾਵਿਤ ਕੀਤਾ। ਪਿਛਲੇ ਤਿੰਨ ਵਿਸ਼ਵ ਕੱਪਾਂ ਵਿੱਚ ਸਪੇਨ ਦੋ ਵਾਰ ਨਾਕਆਊਟ ਗੇੜ ਤੇ ਇਕ ਵਾਰ ਗਰੁੱਪ ਗੇੜ ’ਚੋਂ ਬਾਹਰ ਹੋ ਗਿਆ ਸੀ।