US Open: ਟਾਊਨਸੈਂਡ ਤੇ ਸਿਨੀਆਕੋਵਾ ਨੇ Women's Doubles ਖ਼ਿਤਾਬ ਜਿੱਤਿਆ

ਟੈਨਿਸ ਖਿਡਾਰਨਾਂ ਟੇਲਰ ਟਾਊਨਸੈਂਡ ਅਤੇ ਕੈਟਰੀਨਾ ਸਿਨਿਆਕੋਵਾ ਨੇ ਯੂ ਐੱਸ ਓਪਨ ਮਹਿਲਾ ਡਬਲਜ਼ ਦਾ ਖ਼ਿਤਾਬ ਜਿੱਤ ਕੇ ਬਤੌਰ ਜੋੜੀ ਕਰੀਅਰ ਗਰੈਂਡ ਸਲੈਮ ਪੂਰਾ ਕਰ ਲਿਆ ਹੈ। ਸਿਖਰਲਾ ਦਰਜਾ ਪ੍ਰਾਪਤ ਇਸ ਜੋੜੀ ਨੇ ਫਾਈਨਲ ਵਿੱਚ ਐਸ਼ਲਿਨ ਕਰੂਗਰ ਅਤੇ ਰੌਬਿਨ ਮੋਂਟਗੋਮਰੀ ਦੀ ਵਾਈਲਡ ਕਾਰਡ ਜੋੜੀ ਨੂੰ 5-7, 6-0, 6-2 ਨਾਲ ਹਰਾਇਆ।

ਆਰਥਰ ਐਸ਼ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਦੀ ਸ਼ੁਰੂਆਤ ਟਾਊਨਸੈਂਡ ਅਤੇ ਸਿਨੀਆਕੋਵਾ ਲਈ ਬਹੁਤ ਮੁਸ਼ਕਲ ਰਹੀ। ਉਹ ਪਹਿਲੀਆਂ ਤਿੰਨ ਗੇਮਾਂ ਅਤੇ ਪਹਿਲਾ ਸੈੱਟ ਹਾਰ ਗਈਆਂ। ਟਾਊਨਸੈਂਡ ਨੇ ਮੰਨਿਆ ਕਿ ਉਹ ਸ਼ੁਰੂ ਵਿੱਚ ਕਾਫ਼ੀ ਘਬਰਾਈ ਹੋਈ ਸੀ, ਪਰ ਸਾਥਣ ਸਿਨੀਆਕੋਵਾ ਨੇ ਉਸ ਦਾ ਹੌਸਲਾ ਵਧਾਇਆ। ਇਸ ਤੋਂ ਬਾਅਦ ਦੋਵਾਂ ਨੇ ਨੈੱਟ ’ਤੇ ਹਮਲਾਵਰ ਖੇਡ ਦਿਖਾਉਂਦਿਆਂ ਮੈਚ ’ਤੇ ਪੂਰਾ ਕੰਟਰੋਲ ਕਰ ਲਿਆ ਅਤੇ ਅਗਲੇ ਦੋਵੇਂ ਸੈੱਟ ਆਸਾਨੀ ਨਾਲ ਜਿੱਤ ਲਏ। ਇਹ ਟਾਊਨਸੈਂਡ ਦਾ ਚੌਥਾ ਵੱਡਾ ਖ਼ਿਤਾਬ ਹੈ। ਇਸ ਤੋਂ ਪਹਿਲਾਂ ਇਸ ਜੋੜੀ ਨੇ 2024 ਵਿੱਚ ਵਿੰਬਲਡਨ, 2025 ਵਿੱਚ ਆਸਟਰੇਲੀਅਨ ਓਪਨ ਅਤੇ ਇਸੇ ਸਾਲ ਫਰੈਂਚ ਓਪਨ ਜਿੱਤਿਆ ਸੀ। ਦੂਜੇ ਪਾਸੇ, ਸਿਨੀਆਕੋਵਾ ਲਈ ਇਹ 12ਵਾਂ ਗਰੈਂਡ ਸਲੈਮ ਖ਼ਿਤਾਬ ਹੈ। ਉਸ ਨੇ ਇਸ ਤੋਂ ਪਹਿਲਾਂ ਬਾਰਬੋਰਾ ਕ੍ਰੇਜ਼ਸਿਕੋਵਾ ਨਾਲ ਸੱਤ ਅਤੇ ਕੋਕੋ ਗੌਫ ਨਾਲ ਇੱਕ ਖ਼ਿਤਾਬ ਜਿੱਤਿਆ ਹੈ। ਦੂਜੇ ਪਾਸੇ, ਕਰੂਗਰ ਅਤੇ ਮੋਂਟਗੋਮਰੀ ਦਾ ਸਫ਼ਰ ਵੀ ਸ਼ਾਨਦਾਰ ਰਿਹਾ। ਵਿਸ਼ਵ ਰੈਂਕਿੰਗ ਵਿੱਚ ਕ੍ਰਮਵਾਰ 570ਵੇਂ ਅਤੇ 610ਵੇਂ ਸਥਾਨ ’ਤੇ ਕਾਬਜ਼ ਇਸ ਜੋੜੀ ਨੇ ਪੰਜ ਸਾਲ ਪਹਿਲਾਂ ਯੂ ਐੱਸ ਓਪਨ ਦਾ ਗਰਲਜ਼ ਡਬਲਜ਼ ਖ਼ਿਤਾਬ ਜਿੱਤਿਆ ਸੀ।

ਪੁਰਸ਼ ਸਿੰਗਲਜ਼ ’ਚ ਬੈੱਨ ਸ਼ੈਲਟਨ ਤੇ ਜ਼ਵੇਰੇਵ ਵਿਚਾਲੇ ਹੋਵੇਗਾ ਖ਼ਿਤਾਬੀ ਮੁਕਾਬਲਾ

ਨਿਊਯਾਰਕ: ਅਮਰੀਕੀ ਟੈਨਿਸ ਖਿਡਾਰੀ ਬੈੱਨ ਸ਼ੈਲਟਨ ਨੇ ਆਪਣੇ ਹਮਵਤਨ ਫਰਾਂਸਿਸ ਟਿਆਫੋ ਨੂੰ 4-6, 6-3, 6-3, 7-5 ਨਾਲ ਹਰਾ ਕੇ ਯੂ ਐੱਸ ਓਪਨ ਵਿੱਚ ਪੁਰਸ਼ ਸਿੰਗਲਜ਼ ਦੇ ਫਾਈਨਲ ਵਿੱਚ ਜਗ੍ਹਾ ਬਣਾ ਲਈ ਹੈ। ਐਤਵਾਰ ਨੂੰ ਹੋਣ ਵਾਲੇ ਖ਼ਿਤਾਬੀ ਮੁਕਾਬਲੇ ਵਿੱਚ ਉਸ ਦਾ ਸਾਹਮਣਾ ਪਹਿਲਾ ਦਰਜਾ ਪ੍ਰਾਪਤ ਅਲੈਗਜ਼ੈਂਡਰ ਜ਼ਵੇਰੇਵ ਨਾਲ ਹੋਵੇਗਾ, ਜਿਸ ਨੇ ਪਹਿਲੇ ਸੈਮੀ ਫਾਈਨਲ ਵਿੱਚ ਕਾਰੇਨ ਖਾਚਾਨੋਵ ਨੂੰ 6-3, 7-6, 7-6 ਨਾਲ ਹਰਾਇਆ ਸੀ। ਸ਼ੈਲਟਨ ਕੋਲ ਹੁਣ ਅਮਰੀਕਾ ਲਈ ਇਸ ਅਮਰੀਕੀ ਗਰੈਂਡ ਸਲੈਮ ਖ਼ਿਤਾਬ ਦਾ 21 ਸਾਲ ਪੁਰਾਣਾ ਸੋਕਾ ਖ਼ਤਮ ਕਰਨ ਦਾ ਸੁਨਹਿਰੀ ਮੌਕਾ ਹੈ। -ਏਪੀ