ਟੀ-20 ਟੀਮ ’ਚੋਂ ਕੱਢਣ ’ਤੇ Suryakumar Yadav ਨਿਰਾਸ਼

ਇਸ ਸ਼ਾਨਦਾਰ ਸਫ਼ਰ ਤੋਂ ਬਾਅਦ ਮਾਰਚ ਮਹੀਨੇ ਨਿਊਜ਼ੀਲੈਂਡ ਖ਼ਿਲਾਫ਼ ਖੇਡਿਆ ਗਿਆ ਫਾਈਨਲ ਮੁਕਾਬਲਾ ਸੂਰਿਆਕੁਮਾਰ ਦਾ ਆਖ਼ਰੀ ਟੀ-20 ਮੈਚ ਸਾਬਤ ਹੋਇਆ ਅਤੇ ਟੀਮ ਪ੍ਰਬੰਧਨ ਨੇ ਉਸ ਦੀ ਥਾਂ ਸ਼੍ਰੇਅਸ ਅਈਅਰ ਨੂੰ ਕਪਤਾਨੀ ਸੌਂਪ ਦਿੱਤੀ। ਇੱਕ ਯੂਟਿਊਬ ਸ਼ੋਅ ਦੌਰਾਨ ਇਸ ਬਾਰੇ ਗੱਲ ਕਰਦਿਆਂ ਸੂਰਿਆਕੁਮਾਰ ਨੇ ਸਪੱਸ਼ਟ ਕੀਤਾ ਕਿ ਉਸ ਨੂੰ ਅਈਅਰ ਦੇ ਕਪਤਾਨ ਬਣਨ ’ਤੇ ਕੋਈ ਇਤਰਾਜ਼ ਨਹੀਂ। ਉਹ ਬਹੁਤ ਵਧੀਆ ਖਿਡਾਰੀ ਅਤੇ ਇਨਸਾਨ ਹੈ।

ਹਾਲਾਂਕਿ ਉਸ ਨੇ ਫ਼ੈਸਲੇ ’ਤੇ ਸਵਾਲ ਉਠਾਉਂਦਿਆਂ ਕਿਹਾ ਕਿ ਜਦੋਂ ਟੀਮ ਲਗਾਤਾਰ ਦੋ ਸਾਲ ਕੋਈ ਲੜੀ ਨਹੀਂ ਹਾਰੀ ਅਤੇ ਏਸ਼ੀਆ ਕੱਪ ਸਮੇਤ ਵਿਸ਼ਵ ਕੱਪ ਜਿੱਤਿਆ ਹੈ, ਤਾਂ ਫਿਰ ਅਚਾਨਕ ਇਹ ਤਬਦੀਲੀ ਕਿਉਂ ਕੀਤੀ ਗਈ। ਦੂਜੇ ਪਾਸੇ, ਨਵੇਂ ਕਪਤਾਨ ਅਈਅਰ ਦੀ ਅਗਵਾਈ ਹੇਠ ਭਾਰਤ ਨੂੰ ਜੂਨ ਵਿੱਚ ਆਇਰਲੈਂਡ ਤੋਂ ਟੀ-20 ਲੜੀ ਵਿੱਚ ਹਾਰ ਦਾ ਸਾਹਮਣਾ ਕਰਨਾ ਪਿਆ ਅਤੇ ਇੰਗਲੈਂਡ ਨੇ ਵੀ 4-0 ਨਾਲ ਮਾਤ ਦਿੱਤੀ। ਵਿਸ਼ਵ ਕੱਪ ਜਿੱਤਣ ਮਗਰੋਂ ਭਾਰਤ ਨੇ ਸਿਰਫ਼ ਜ਼ਿੰਬਾਬਵੇ ਖ਼ਿਲਾਫ਼ 3-0 ਨਾਲ ਇੱਕੋ-ਇੱਕ ਲੜੀ ਜਿੱਤੀ ਹੈ।

ਆਪਣੀ ਖੇਡ ਦਾ ਜ਼ਿਕਰ ਕਰਦਿਆਂ ਸੂਰਿਆਕੁਮਾਰ ਨੇ ਮੰਨਿਆ ਕਿ ਉਸ ਦਾ ਪ੍ਰਦਰਸ਼ਨ ਕੁਝ ਖ਼ਾਸ ਨਹੀਂ ਰਿਹਾ। ਉਸ ਨੇ ਵਿਸ਼ਵ ਕੱਪ ਦੇ 9 ਮੁਕਾਬਲਿਆਂ ਵਿੱਚ 30.25 ਦੀ ਔਸਤ ਨਾਲ ਸਿਰਫ਼ 242 ਦੌੜਾਂ ਬਣਾਈਆਂ ਸਨ। ਇਸੇ ਤਰ੍ਹਾਂ ਆਈ ਪੀ ਐੱਲ ਦੌਰਾਨ ਵੀ ਮੁੰਬਈ ਇੰਡੀਅਨਜ਼ ਵੱਲੋਂ ਖੇਡਦਿਆਂ ਉਹ 270 ਦੌੜਾਂ ਹੀ ਬਣਾ ਸਕਿਆ ਸੀ। ਉਸ ਨੇ ਭਾਵੁਕ ਹੁੰਦਿਆਂ ਕਿਹਾ ਕਿ ਡੇਢ ਮਹੀਨੇ ਤੱਕ ਉਹ ਇਹੀ ਸੋਚਦਾ ਰਿਹਾ ਕਿ ਵਿਸ਼ਵ ਕੱਪ ਜਿੱਤਣ ਦੇ ਬਾਵਜੂਦ ਉਸ ਨਾਲ ਅਜਿਹਾ ਕਿਵੇਂ ਹੋ ਸਕਦਾ ਹੈ।