Sinner Wimbledon Champion: ਇਟਲੀ ਦੇ ਸਿਨਰ ਨੇ ਲਗਾਤਾਰ ਦੂਜੀ ਵਾਰ ਜਿੱਤਿਆ ਵਿੰਬਲਡਨ ਖ਼ਿਤਾਬ
ਫਾਈਨਲ ਮੁਕਾਬਲੇ ਵਿੱਚ ਜਰਮਨੀ ਦੇ ਅਲੈਗਜ਼ੈਂਡਰ ਜ਼ਵੇਰੇਵ ਨੂੰ ਹਰਾਇਆ; ਇਟਲੀ ਦੇ ਸਟਾਰ ਖਿਡਾਰੀ ਨੇ ਕਰੀਅਰ ਦਾ ਪੰਜਵਾਂ ਗਰੈਂਡ ਸਲੈਮ ਜਿੱਤਿਆ, ਜ਼ਵੇਰੇਵ ਖ਼ਿਲਾਫ਼ ਦਰਜ ਕੀਤੀ ਲਗਾਤਾਰ ਦਸਵੀਂ ਜਿੱਤ
Wimbledon Champion: ਦੁਨੀਆ ਦੇ ਨੰਬਰ ਇੱਕ ਟੈਨਿਸ ਖਿਡਾਰੀ ਯਾਨਿਕ ਸਿਨਰ ਨੇ ਇੱਕ ਵਾਰ ਮੁੜ ਸਾਬਤ ਕਰ ਦਿੱਤਾ ਹੈ ਕਿ ਉਹ ਫਰੈਂਚ ਓਪਨ ਦੇ ਨਿਰਾਸ਼ਾਜਨਤਕ ਪ੍ਰਦਰਸ਼ਨ ਤੋਂ ਬਾਅਦ ਵਾਪਸੀ ਕਰਨਾ ਜਾਣਦਾ ਹੈ।
ਇਟਲੀ ਦੇ ਇਸ ਸਟਾਰ ਖਿਡਾਰੀ ਨੇ ਐਤਵਾਰ ਨੂੰ ਖੇਡੇ ਗਏ ਪੁਰਸ਼ ਸਿੰਗਲਜ਼ ਦੇ ਫਾਈਨਲ ਮੁਕਾਬਲੇ ਵਿੱਚ ਜਰਮਨੀ ਦੇ ਅਲੈਗਜ਼ੈਂਡਰ ਜ਼ਵੇਰੇਵ ਨੂੰ 6-7, 7-6, 6-3, 6-4 ਨਾਲ ਹਰਾ ਕੇ ਲਗਾਤਾਰ ਦੂਜੀ ਵਾਰ ਵਿੰਬਲਡਨ ਦਾ ਖ਼ਿਤਾਬ ਆਪਣੇ ਨਾਮ ਕਰ ਲਿਆ। ਇਸ ਹਾਈ-ਵੋਲਟੇਜ ਮੁਕਾਬਲੇ ਦਾ ਸਭ ਤੋਂ ਅਹਿਮ ਮੋੜ ਤੀਜੇ ਸੈੱਟ ਵਿੱਚ ਆਇਆ ਜਦੋਂ ਇੱਕ ਮਹੱਤਵਪੂਰਨ ਅੰਕ ਦੌਰਾਨ ਜ਼ਵੇਰੇਵ ਘਾਹ ਦੀ ਕੋਰਟ ’ਤੇ ਫਿਸਲ ਗਿਆ।
ਇਸ ਤੋਂ ਬਾਅਦ ਉਹ ਗੋਡੇ ਦੀ ਤਕਲੀਫ਼ ਨਾਲ ਜੂਝਦਾ ਨਜ਼ਰ ਆਇਆ ਜਿਸ ਦਾ ਸਿੱਧਾ ਅਸਰ ਉਸ ਦੇ ਖੇਡ ਪ੍ਰਦਰਸ਼ਨ 'ਤੇ ਵੀ ਪਿਆ।
ਸਿਨਰ ਨੇ ਆਪਣੇ ਕਰੀਅਰ ਦਾ ਇਹ ਪੰਜਵਾਂ ਗਰੈਂਡ ਸਲੈਮ ਖ਼ਿਤਾਬ ਅਜਿਹੇ ਸਮੇਂ ਜਿੱਤਿਆ ਹੈ, ਜਦੋਂ ਉਸ ਨੂੰ ਹਾਲ ਹੀ ਵਿੱਚ ਫਰੈਂਚ ਓਪਨ ਦੇ ਦੂਜੇ ਦੌਰ ਵਿੱਚ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।
ਸ਼ੁਰੂਆਤ ਵਿਚ ਲੀਡ ਹਾਸਲ ਕਰਨ ਦੇ ਬਾਵਜੂਦ ਖ਼ਿਤਾਬ ਤੋਂ ਖੁੰਝਿਆ ਜਰਮਨ ਖਿਡਾਰੀ
ਜ਼ਿਕਰਯੋਗ ਹੈ ਕਿ ਪਿਛਲੇ ਸਾਲ ਵੀ ਸਿਨਰ ਨੇ ਫਰੈਂਚ ਓਪਨ ਦੇ ਫਾਈਨਲ ਵਿੱਚ ਕਾਰਲੋਸ ਅਲਕਾਰੇਜ਼ ਖ਼ਿਲਾਫ਼ ਤਿੰਨ ਮੈਚ ਪੁਆਇੰਟ ਗੁਆਉਣ ਤੋਂ ਬਾਅਦ ਵਿੰਬਲਡਨ ਵਿੱਚ ਸ਼ਾਨਦਾਰ ਵਾਪਸੀ ਕੀਤੀ ਸੀ ਅਤੇ ਆਲ ਇੰਗਲੈਂਡ ਕਲੱਬ ਦੇ ਫਾਈਨਲ ਵਿੱਚ ਅਲਕਾਰੇਜ਼ ਨੂੰ ਹਰਾ ਕੇ ਖ਼ਿਤਾਬ ਜਿੱਤਿਆ ਸੀ। ਇਹ ਜ਼ਵੇਰੇਵ ਖ਼ਿਲਾਫ਼ ਸਿਨਰ ਦੀ ਲਗਾਤਾਰ 10ਵੀਂ ਜਿੱਤ ਵੀ ਹੈ। ਜਰਮਨ ਖਿਡਾਰੀ ਜ਼ਵੇਰੇਵ ਹਾਲ ਹੀ ਵਿੱਚ ਫਰੈਂਚ ਓਪਨ ਜਿੱਤ ਕੇ ਆਪਣੇ ਕਰੀਅਰ ਦਾ ਪਹਿਲਾ ਗਰੈਂਡ ਸਲੈਮ ਖ਼ਿਤਾਬ ਹਾਸਲ ਕਰਨ ਤੋਂ ਬਾਅਦ ਪੂਰੇ ਆਤਮਵਿਸ਼ਵਾਸ ਨਾਲ ਵਿੰਬਲਡਨ ਪਹੁੰਚਿਆ ਸੀ। ਫਾਈਨਲ ਮੈਚ ਦੇ ਪਹਿਲੇ ਦੋ ਸੈੱਟਾਂ ਵਿੱਚ ਉਸ ਨੇ ਸਿਨਰ ਨੂੰ ਸਖ਼ਤ ਟੱਕਰ ਦਿੱਤੀ, ਪਰ ਉਸ ਤੋਂ ਬਾਅਦ ਉਹ ਇਟਲੀ ਦੇ ਸਟਾਰ ਖਿਡਾਰੀ ਦੀ ਸ਼ਾਨਦਾਰ ਖੇਡ ਅੱਗੇ ਜ਼ਿਆਦਾ ਦੇਰ ਟਿਕ ਨਹੀਂ ਸਕੇ ਅਤੇ ਸਿਨਰ ਨੇ ਲਗਾਤਾਰ ਦੂਜੀ ਵਾਰ ਚੈਂਪੀਅਨ ਬਣਨ ਦਾ ਮਾਣ ਹਾਸਲ ਕੀਤਾ।
