SAFF Women Championship 2026: ਚੈਂਪੀਅਨਸ਼ਿਪ ਲਈ ਭਾਰਤੀ ਟੀਮ ਦਾ ਐਲਾਨ
ਤਿੰਨ ਖਿਡਾਰਨਾਂ ਟੀਮ ਵਿੱਚੋਂ ਬਾਹਰ
ਭਾਰਤ ਨੇ 25 ਮਈ ਤੋਂ 6 ਜੂਨ ਤੱਕ ਗੋਆ ਦੇ ਮਡਗਾਓਂ ਵਿੱਚ ਖੇਡੀ ਜਾਣ ਵਾਲੀ 'ਸੈਫ਼ ਮਹਿਲਾ ਚੈਂਪੀਅਨਸ਼ਿਪ 2026' ਲਈ ਸ਼ਨਿਚਰਵਾਰ ਨੂੰ ਆਪਣੀ 23 ਮੈਂਬਰੀ ਟੀਮ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਤੋਂ ਪਹਿਲਾਂ ਮੰਗਲਵਾਰ ਨੂੰ 26 ਖਿਡਾਰਨਾਂ ਦੀ ਸ਼ੁਰੂਆਤੀ ਟੀਮ ਦਾ ਐਲਾਨ ਕੀਤਾ ਗਿਆ ਸੀ ਜਿਸ ਵਿੱਚੋਂ ਹੁਣ ਡਿਫੈਂਡਰ ਸ਼ੁਭਾਂਗੀ ਸਿੰਘ, ਮਿਡਫੀਲਡਰ ਪ੍ਰਿਯਦਰਸ਼ਿਨੀ ਸੇਲਾਦੁਰਈ ਅਤੇ ਫਾਰਵਰਡ ਰਿੰਪਾ ਹਲਦਰ ਨੂੰ ਅੰਤਿਮ ਸੂਚੀ ਵਿੱਚੋਂ ਬਾਹਰ ਕਰ ਦਿੱਤਾ ਗਿਆ ਹੈ।
ਪੇਰੂ ਦੇ ਕਲੱਬ 'ਅਲਿਆਂਜਾ ਲੀਮਾ' ਲਈ ਖੇਡਣ ਵਾਲੀ ਸਟਾਰ ਖਿਡਾਰਨ ਮਨੀਸ਼ਾ ਕਲਿਆਣ 1 ਜੂਨ ਨੂੰ ਫੀਫਾ (FIFA) ਅੰਤਰਰਾਸ਼ਟਰੀ ਮੈਚ ਵਿੰਡੋ ਸ਼ੁਰੂ ਹੋਣ ਤੋਂ ਬਾਅਦ ਹੀ ਭਾਰਤੀ ਟੀਮ ਨਾਲ ਜੁੜ ਸਕੇਗੀ ਅਤੇ ਫਿਲਹਾਲ ਟ੍ਰੇਨਿੰਗ ਕੈਂਪ ਵਿੱਚ 22 ਖਿਡਾਰਨਾਂ ਮੌਜੂਦ ਹਨ। ਭਾਰਤੀ ਟੀਮ ਨੂੰ ਗਰੁੱਪ ਬੀ ਵਿੱਚ ਰੱਖਿਆ ਗਿਆ ਹੈ ਜਿੱਥੇ ਉਹ 25 ਮਈ ਨੂੰ ਮਾਲਦੀਵ ਖ਼ਿਲਾਫ਼ ਮੈਚਾਂ ਦੀ ਸ਼ੁਰੂਆਤ ਕਰੇਗੀ ਜਦੋਂ ਕਿ ਉਸ ਦਾ ਦੂਜਾ ਮੁਕਾਬਲਾ 31 ਮਈ ਨੂੰ ਬੰਗਲਾਦੇਸ਼ ਨਾਲ ਹੋਵੇਗਾ। ਦੂਜੇ ਪਾਸੇ ਗਰੁੱਪ ਏ ਵਿੱਚ ਨੇਪਾਲ, ਸ਼੍ਰੀਲੰਕਾ ਅਤੇ ਭੂਟਾਨ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਦੋਵਾਂ ਗਰੁੱਪਾਂ ਵਿੱਚੋਂ ਸਿਖਰਲੀਆਂ ਦੋ-ਦੋ ਟੀਮਾਂ ਸੈਮੀਫਾਈਨਲ ਵਿੱਚ ਪਹੁੰਚਣਗੀਆਂ ਜੋ 3 ਜੂਨ ਨੂੰ ਖੇਡੇ ਜਾਣਗੇ ਅਤੇ ਟੂਰਨਾਮੈਂਟ ਦਾ ਖ਼ਿਤਾਬੀ ਮੁਕਾਬਲਾ (ਫਾਈਨਲ) 6 ਜੂਨ ਨੂੰ ਖੇਡਿਆ ਜਾਵੇਗਾ।
ਗੋਲਕੀਪਰ: ਪੰਥੋਈ ਚਾਨੂ ਏਲਾਂਗਬਮ, ਰਿਬਾਂਸੀ, ਸ਼੍ਰੇਆ ਹੁੱਡਾ।
ਡਿਫੈਂਡਰ: ਅਸਤਮ ਉਰਾਓਂ, ਜੂਲੀ ਕਿਸ਼ਨ, ਨਿਰਮਲਾ ਦੇਵੀ ਫੰਜੌਬਮ, ਪੂਰਨਿਮਾ ਕੁਮਾਰੀ, ਰੰਜਨਾ ਚਾਨੂ ਸੋਰੋਖੈਬਮ, ਸਰਿਤਾ ਯੁਮਨਾਮ, ਥੋਇਬੀਸਾਨਾ ਚਾਨੂ ਤੋਇਜਮ।
ਮਿਡਫੀਲਡਰ: ਅਵੇਕਾ ਸਿੰਘ, ਜਸੋਦਾ ਮੁੰਡਾ, ਪ੍ਰਿਯੰਕਾ ਦੇਵੀ ਨੋਰਮ, ਸਨਫਿਦਾ ਨੋਂਗਰੂਮ, ਸੰਗੀਤਾ ਬਸਫੋਰ, ਸ਼ਿਲਕੀ ਦੇਵੀ ਹੇਮਮ।
ਫਾਰਵਰਡ: ਗ੍ਰੇਸ ਡਾਂਗਮੇਈ, ਕਰਿਸ਼ਮਾ ਸ਼ਿਰਵੋਈਕਰ, ਲਿੰਡਾ ਕੋਮ ਸੇਰਟੋ, ਮਾਲਵਿਕਾ ਪੀ, ਮਨੀਸ਼ਾ ਕਲਿਆਣ, ਪਿਆਰੀ ਖਾਖਾ, ਸੌਮਿਆ ਗੁਗੂਲੂਥ।
ਕੋਚਿੰਗ ਸਟਾਫ਼: ਟੀਮ ਦੇ ਮੁੱਖ ਕੋਚ ਕ੍ਰਿਸਪਿਨ ਛੇਤਰੀ ਹਨ, ਜਦੋਂ ਕਿ ਸਹਾਇਕ ਕੋਚ ਵਜੋਂ ਸੁਜਾਤਾ ਕਰ ਅਤੇ ਨਿਵੇਥਾ ਰਾਮਦਾਸ ਜ਼ਿੰਮੇਵਾਰੀ ਸੰਭਾਲਣਗੇ। ਇਸ ਤੋਂ ਇਲਾਵਾ ਮਾਰੀਓ ਅਗੁਈਆਰ ਗੋਲਕੀਪਿੰਗ ਕੋਚ ਅਤੇ ਅਮਿਤ ਯਾਦਵ ਸਟ੍ਰੈਂਥ ਐਂਡ ਕੰਡੀਸ਼ਨਿੰਗ ਕੋਚ ਵਜੋਂ ਟੀਮ ਨਾਲ ਮੌਜੂਦ ਰਹਿਣਗੇ।
