Roger Federer ਟੈਨਿਸ ਹਾਲ ਆਫ ਫੇਮ ਵਿੱਚ ਸ਼ਾਮਲ

ਆਪਣੇ ਸੰਬੋਧਨ ਦੌਰਾਨ 20 ਗਰੈਂਡ ਸਲੈਮ ਖ਼ਿਤਾਬ ਜਿੱਤਣ ਵਾਲੇ ਇਸ ਪਹਿਲੇ ਖਿਡਾਰੀ ਨੇ ਬਚਪਨ ਦੇ ਹੀਰੋ ਸਟੀਫਨ ਐਡਬਰਗ, ਕੋਚ ਸੇਵਰਿਨ ਲੂਥੀ ਅਤੇ ਪਤਨੀ ਦੇ ਸਾਥ ਨੂੰ ਯਾਦ ਕੀਤਾ। ਇਸ ਦੌਰਾਨ ਉਸ ਦੇ ਹੰਝੂ ਛਲਕ ਪਏ। ਹੰਝੂਆਂ ’ਤੇ ਕਾਬੂ ਪਾਉਂਦਿਆਂ ਉਸ ਨੇ ਮਜ਼ਾਕ ਵਿੱਚ ਕਿਹਾ ਕਿ ਹੁਣ ਉਸ ਨੂੰ ਟਿਸ਼ੂ ਅਤੇ ਐਨਕਾਂ ਦੀ ਲੋੜ ਹੈ।

ਆਪਣੇ ਬਿਹਤਰੀਨ ਖੇਡ ਕਰੀਅਰ ਦੌਰਾਨ ਫੈਡਰਰ ਏ ਟੀ ਪੀ ਰੈਂਕਿੰਗ ਵਿੱਚ ਲਗਾਤਾਰ 237 ਹਫ਼ਤੇ ਨੰਬਰ ਇੱਕ ’ਤੇ ਕਾਬਜ਼ ਰਿਹਾ ਸੀ। ਇਸ ਦੇ ਨਾਲ ਹੀ ਉਹ ਅੱਠ ਵਿੰਬਲਡਨ, ਛੇ ਆਸਟਰੇਲੀਆ ਓਪਨ, ਪੰਜ ਯੂ ਐੱਸ ਓਪਨ ਅਤੇ ਇੱਕ ਫਰੈਂਚ ਓਪਨ ਜਿੱਤਣ ਵਾਲਾ ਮਹਾਨ ਖਿਡਾਰੀ ਹੈ। ਉਸ ਨੇ ਹਾਲ ਆਫ ਫੇਮ ਵਿੱਚ 272ਵੇਂ ਮੈਂਬਰ ਵਜੋਂ ਸ਼ਾਮਲ ਹੋਣ ਨੂੰ ਇਤਿਹਾਸਕ ਪ੍ਰਾਪਤੀ ਦੱਸਿਆ।

ਇਸੇ ਦੌਰਾਨ ਫੈਡਰਰ ਦੇ ਨਾਲ ਸਾਬਕਾ ਪ੍ਰਸਾਰਕ ਮੈਰੀ ਕਾਰਿਲੋ ਨੂੰ ਵੀ ਸਨਮਾਨਿਤ ਕੀਤਾ ਗਿਆ। ਬਿਲੀ ਜੀਨ ਕਿੰਗ ਨੇ ਮੰਚ ’ਤੇ 69 ਸਾਲਾ ਕਾਰਿਲੋ ਨੂੰ ਪੇਸ਼ ਕੀਤਾ। ਇਸ ਮੌਕੇ ਕਾਰਿਲੋ ਨੇ ਕਿਹਾ ਕਿ ਮਹਾਨ ਖਿਡਾਰੀਆਂ ਦੀ ਕਤਾਰ ਵਿੱਚ ਖੜ੍ਹਨਾ ਉਸ ਲਈ ਸੁਪਨਾ ਪੂਰਾ ਹੋਣ ਵਰਗਾ ਹੈ।