Rapid ਗੇੜ ਮਗਰੋਂ R Praggnanandhaa ਲੀਡ ’ਤੇ
ਜੀ ਸੀ ਟੀ ਫਾਈਨਲ ਵਿੱਚ ਪੁੱਜਣ ਦੀਆਂ ਆਸਾਂ ਨੂੰ ਜਿਊਂਦਾ ਰੱਖਿਆ
ਭਾਰਤੀ ਗਰੈਂਡਮਾਸਟਰ ਆਰ ਪ੍ਰਗਿਆਨੰਦ ਨੇ ਸੇਂਟ ਲੁਈਸ ਰੈਪਿਡ ਐਂਡ ਬਲਿਟਜ਼ ਦੇ ਰੈਪਿਡ ਭਾਗ ਵਿੱਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ ਹੈ। ਉਸ ਨੇ 18 ਵਿੱਚੋਂ 12 ਅੰਕ ਪ੍ਰਾਪਤ ਕਰ ਕੇ ਇਸ ਸਾਲ ਦੇ ਅੰਤ ਵਿੱਚ ਹੋਣ ਵਾਲੇ ਗਰੈਂਡ ਚੈੱਸ ਟੂਰ (ਜੀ ਸੀ ਟੀ) ਫਾਈਨਲ ਵਿੱਚ ਪਹੁੰਚਣ ਦੀਆਂ ਆਪਣੀਆਂ ਆਸਾਂ ਨੂੰ ਜਿਊਂਦਾ ਰੱਖਿਆ ਹੈ। ਭਾਰਤੀ ਖਿਡਾਰੀ ਜੋ ਹੁਣ 2026 ਆਲਮੀ ਚੈਂਪੀਅਨਸ਼ਿਪ ਦਾ ਹਿੱਸਾ ਨਹੀਂ ਹੈ, ਨੇ ਰੈਪਿਡ ਭਾਗ ਵਿੱਚ ਸ਼ਾਨਦਾਰ ਤਕਨੀਕ ਅਤੇ ਜਿੱਤਣ ਦੀ ਇੱਛਾ ਦਾ ਪ੍ਰਦਰਸ਼ਨ ਕੀਤਾ। ਇਹ ਸਾਲਾਨਾ ਮੁਕਾਬਲਾ ਪਿਛਲੇ ਕਈ ਸਾਲਾਂ ਤੋਂ ਪੇਸ਼ੇਵਰ ਸ਼ਤਰੰਜ ਦਾ ਹਿੱਸਾ ਰਿਹਾ ਹੈ ਅਤੇ ਇਸ ਵਿੱਚ ਨੌਂ ਗੇੜ ਖੇਡੇ ਗਏ। ਪ੍ਰਗਿਆਨੰਦ ਰੈਪਿਡ ਭਾਗ ਦੇ ਨੌਵੇਂ ਤੇ ਆਖਰੀ ਗੇੜ ਵਿੱਚ ਡੱਚ ਜੀ ਐੱਮ ਜੌਰਡਨ ਵੈਨ ਫੋਰੀਸਟ ਵਿਰੁੱਧ ਮੈਚ ਹਾਰ ਗਿਆ, ਫਿਰ ਵੀ ਉਹ ਇੱਕ ਅੰਕ ਦੀ ਲੀਡ ਬਣਾਉਣ ਵਿੱਚ ਸਫਲ ਰਿਹਾ। ਉਹ ਉਜ਼ਬੇਕਿਸਤਾਨ ਦੇ ਜਾਵੋਖਿਰ ਸਿੰਦਾਰੋਵ ਤੋਂ ਅੱਗੇ ਰਿਹਾ, ਜੋ ਇਸ ਸਾਲ ਦੇ ਅੰਤ ਵਿੱਚ ਆਲਮੀ ਚੈਂਪੀਅਨਸ਼ਿਪ ਦੇ ਖਿਤਾਬੀ ਮੁਕਾਬਲੇ ਵਿੱਚ ਡੀ ਗੁਕੇਸ਼ ਨੂੰ ਚੁਣੌਤੀ ਦੇਵੇਗਾ; ਹਾਲਾਂਕਿ ਜੀ ਸੀ ਟੀ ਦਾ ਆਖਰੀ ਰੈਪਿਡ ਅਤੇ ਬਲਿਟਜ਼ ਮੁਕਾਬਲਾ ਸਿਰਫ ਰੈਪਿਡ ਭਾਗ ’ਤੇ ਆਧਾਰਿਤ ਨਹੀਂ ਹੈ, ਸਗੋਂ ਜੇਤੂ ਦਾ ਫੈਸਲਾ ਹੋਣ ਤੋਂ ਪਹਿਲਾਂ 18 ਹੋਰ ਬਲਿਟਜ਼ ਗੇਮਾਂ ਖੇਡੀਆਂ ਜਾਣੀਆਂ ਹਨ।
ਜੇਕਰ ਪ੍ਰਗਿਆਨੰਦ ਨੇ ਵੈਨ ਫੋਰੀਸਟ ਨੂੰ ਹਰਾ ਦਿੱਤਾ ਹੁੰਦਾ, ਤਾਂ ਉਹ ਬਲਿਟਜ਼ ਭਾਗ ਵਿੱਚ ਵਧੇਰੇ ਵਧੀਆ ਲੀਡ ਨਾਲ ਦਾਖਲ ਹੁੰਦਾ, ਅਜਿਹਾ ਫ਼ਰਕ ਜੋ ਸਮੁੱਚੇ ਖਿਤਾਬ ਦੀ ਦੌੜ ਵਿੱਚ ਮਹੱਤਵਪੂਰਨ ਸਾਬਤ ਹੋ ਸਕਦਾ ਸੀ। ਆਖਰੀ ਗੇੜ ਵਿੱਚ ਇੱਕੋ-ਇੱਕ ਹਾਰ ਦੇ ਬਾਵਜੂਦ, ਚਾਰ ਜਿੱਤਾਂ (ਹਰੇਕ ਦੇ ਦੋ ਅੰਕ) ਅਤੇ ਚਾਰ ਡਰਾਅ ਦੀ ਮਦਦ ਨਾਲ ਪ੍ਰਗਿਆਨੰਦ 12 ਅੰਕਾਂ ਨਾਲ ਸਿਖਰ ’ਤੇ ਰਿਹਾ।
