‘ਭਾਰਤ ਵਿੱਚ ਇੱਕ ਰੋਜ਼ਾ ਲੜੀ ਜਿੱਤਣ ’ਤੇ ਮਾਣ’
ਨਿਊਜ਼ੀਲੈਂਡ ਦੇ ਸਟਾਰ ਬੱਲੇਬਾਜ਼ ਨੇ ਜਿੱਤ ਦਾ ਸਿਹਰਾ ਟੀਮ ਦੇ ਸ਼ਾਂਤ ਸੁਭਾਅ ਤੇ ਸਹੀ ਫ਼ੈਸਲਿਆਂ ਨੂੰ ਦਿੱਤਾ
ਭਾਰਤ ਵਿੱਚ ਪਹਿਲੀ ਵਾਰ ਦੁਵੱਲੀ ਇੱਕ ਰੋਜ਼ਾ ਲੜੀ ਜਿੱਤ ਕੇ ਇਤਿਹਾਸ ਰਚਣ ਵਾਲੀ ਨਿਊਜ਼ੀਲੈਂਡ ਟੀਮ ਦੇ ਸਟਾਰ ਬੱਲੇਬਾਜ਼ ਡੈਰਿਲ ਮਿਚੈੱਲ ਨੇ ਇਸ ਜਿੱਤ ਦਾ ਸਿਹਰਾ ਟੀਮ ਦੇ ਸ਼ਾਂਤ ਸੁਭਾਅ ਅਤੇ ਸਹੀ ਫੈਸਲਿਆਂ ਨੂੰ ਦਿੱਤਾ ਹੈ। ਉਸ ਨੇ ਕਿਹਾ ਕਿ ਜਦੋਂ ਵਿਰਾਟ ਕੋਹਲੀ ਅਤੇ ਹਰਸ਼ਿਤ ਰਾਣਾ ਬੱਲੇਬਾਜ਼ੀ ਕਰ ਰਹੇ ਸਨ ਤਾਂ ਦਬਾਅ ਵਧ ਰਿਹਾ ਸੀ ਪਰ ਟੀਮ ਨੇ ਸਬਰ ਰੱਖਿਆ ਅਤੇ ਆਪਣੀ ਯੋਜਨਾ ’ਤੇ ਅਮਲ ਕੀਤਾ।
ਫੈ਼ਸਲਾਕੁਨ ਮੈਚ ਵਿੱਚ 137 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡਣ ਵਾਲੇ ਮਿਚੈੱਲ ਨੇ ਕਿਹਾ ਕਿ ਪਹਿਲਾਂ ਵੀ ਕਈ ਵਾਰ ਕੀਵੀ ਟੀਮਾਂ ਭਾਰਤ ਆਈਆਂ ਅਤੇ ਕੁੱਝ ਨਾ ਕੁੱਝ ਸਿੱਖ ਕੇ ਗਈਆਂ ਪਰ ਇਸ ਟੀਮ ਦੀ ਜਿੱਤ ਬਹੁਤ ਮਾਣ ਵਾਲੀ ਗੱਲ ਹੈ। ਉਸ ਨੇ ਇਸ ਜਿੱਤ ਨੂੰ ਹਾਲ ਹੀ ਵਿੱਚ ਮਿਲੀ ਟੈਸਟ ਲੜੀ ਦੀ ਜਿੱਤ ਜਿੰਨਾ ਹੀ ਖਾਸ ਦੱਸਿਆ। ਉਸ ਨੇ ਮੰਨਿਆ ਕਿ ਚੇਨੱਈ ਅਤੇ ਰਾਜਸਥਾਨ ਲਈ ਆਈ ਪੀ ਐੱਲ ਖੇਡਣ ਦਾ ਤਜਰਬਾ ਉਸ ਦੇ ਕਾਫੀ ਕੰਮ ਆਇਆ।
ਉਸ ਨੇ ਭਾਰਤੀ ਸਪਿੰਨਰ ਕੁਲਦੀਪ ਯਾਦਵ ਨੂੰ ਵਿਸ਼ਵ ਪੱਧਰੀ ਗੇਂਦਬਾਜ਼ ਦੱਸਦਿਆਂ ਕਿਹਾ ਕਿ ਉਸ ਖ਼ਿਲਾਫ਼ ਹਮਲਾਵਰ ਰੁਖ਼ ਅਪਣਾਉਣਾ ਟੀਮ ਦੀ ਰਣਨੀਤੀ ਦਾ ਹਿੱਸਾ ਸੀ। ਗਲੈੱਨ ਫਿਲਿਪਸ (106) ਨਾਲ ਸੈਂਕੜੇ ਦੀ ਭਾਈਵਾਲੀ ਬਾਰੇ ਉਸ ਨੇ ਕਿਹਾ ਕਿ ਦੋਵਾਂ ਦੀ ਖੇਡ ਸ਼ੈਲੀ ਵੱਖਰੀ ਹੋਣ ਕਰਕੇ ਇਹ ਜੋੜੀ ਕਾਮਯਾਬ ਰਹੀ। ਉਸ ਨੇ ਕਿਹਾ ਕਿ ਫਿਲਿਪਸ ਦਾ ਸੱਟ ਤੋਂ ਉਭਰ ਕੇ ਅਜਿਹਾ ਪ੍ਰਦਰਸ਼ਨ ਕਰਨਾ ਸ਼ਲਾਘਾਯੋਗ ਹੈ।
