Pakistan Cricket Board ਵੱਲੋਂ ਇੰਗਲੈਂਡ ਦੌਰੇ ਦੌਰਾਨ ਖਿਡਾਰੀਆਂ ਦੇ ਮੋਬਾਈਲ ਫੋਨ ‘ਜ਼ਬਤ’
ਮੈਚ ਫਿਕਸਿੰਗ ਜਾਂ ਭ੍ਰਿਸ਼ਟਾਚਾਰ ਦੇ ਖ਼ਦਸ਼ੇ ਤਹਿਤ ਜਾਂਚ ਸ਼ੁਰੂ; ਆਖਰੀ ਟੈਸਟ ਤੱਕ ਬੋਰਡ ਕੋਲ ਰਹਿਣਗੇ ਫੋਨ
ਇੰਗਲੈਂਡ ਵਿਰੁੱਧ ਚੱਲ ਰਹੀ ਤਿੰਨ ਟੈਸਟ ਮੈਚਾਂ ਦੀ ਲੜੀ ਦੌਰਾਨ ਪਾਕਿਸਤਾਨ ਕ੍ਰਿਕਟ ਬੋਰਡ (PCB) ਵੱਲੋਂ ਆਪਣੀ ਹੀ ਟੀਮ ਦੇ ਕੁਝ ਖਿਡਾਰੀਆਂ ਦੇ ਮੋਬਾਈਲ ਫੋਨ ਜ਼ਬਤ ਕਰਨ ਦੀ ਖ਼ਬਰ ਸਾਹਮਣੇ ਆਈ ਹੈ। ਰਿਪੋਰਟਾਂ ਅਨੁਸਾਰ ਪੀ.ਸੀ.ਬੀ. ਵੱਲੋਂ ਇਹ ਕਾਰਵਾਈ ਕਿਸੇ ਮਾਮਲੇ ਦੀ ਗੰਭੀਰ ਜਾਂਚ ਦੇ ਸਿਲਸਿਲੇ ਵਿੱਚ ਕੀਤੀ ਗਈ ਹੈ, ਹਾਲਾਂਕਿ ਬੋਰਡ ਵੱਲੋਂ ਅਜੇ ਤੱਕ ਖਿਡਾਰੀਆਂ ਦੇ ਨਾਵਾਂ ਜਾਂ ਅਸਲ ਕਾਰਨ ਦਾ ਖੁਲਾਸਾ ਨਹੀਂ ਕੀਤਾ ਗਿਆ ਹੈ।
ਮੀਡੀਆ ਰਿਪੋਰਟਾਂ ਮੁਤਾਬਕ, ਕ੍ਰਿਕਟ ਬੋਰਡ ਆਪਣੇ ਨਿਯਮਾਂ ਅਨੁਸਾਰ ਸਿਰਫ਼ ਬੇਹੱਦ ਖਾਸ ਜਾਂ ਗੰਭੀਰ ਸਥਿਤੀਆਂ, ਜਿਵੇਂ ਕਿ ਮੈਚ ਫਿਕਸਿੰਗ, ਸੱਟੇਬਾਜ਼ੀ ਜਾਂ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਦੀ ਜਾਂਚ ਵੇਲੇ ਹੀ, ਖਿਡਾਰੀਆਂ ਦੇ ਨਿੱਜੀ ਮੋਬਾਈਲ ਫੋਨ ਆਪਣੇ ਕਬਜ਼ੇ ਵਿੱਚ ਲੈ ਸਕਦਾ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਇਹ ਮੋਬਾਈਲ ਫੋਨ ਲੰਡਨ ’ਚ ਚੱਲ ਰਹੇ ਆਖਰੀ ਟੈਸਟ ਮੈਚ ਦੇ ਖ਼ਤਮ ਹੋਣ ਤੱਕ ਪੀ.ਸੀ.ਬੀ. ਦੇ ਅਧਿਕਾਰੀਆਂ ਦੀ ਨਿਗਰਾਨੀ ਹੇਠ ਹੀ ਰਹਿਣਗੇ। ਬੋਰਡ ਵੱਲੋਂ ਮਾਮਲੇ ਦੀ ਪੂਰੀ ਜਾਂਚ ਤੋਂ ਬਾਅਦ ਹੀ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।
ਦੱਸ ਦਈਏ ਕਿ ਲਾਰਡਜ਼ ਟੈਸਟ ਵਿੱਚ 194 ਦੌੜਾਂ ਦੀ ਕਰਾਰੀ ਹਾਰ ਨਾਲ ਇੰਗਲੈਂਡ ਨੇ ਸੀਰੀਜ਼ ਵਿੱਚ 2-0 ਦੀ ਅਜੇਤੂ ਬੜ੍ਹਤ ਬਣਾ ਲਈ ਹੈ। ਇਸ ਹਾਰ ਤੋਂ ਬਾਅਦ ਪਾਕਿਸਤਾਨ ਕ੍ਰਿਕਟ ਬੋਰਡ (PCB) ਨੇ ਏਜਬੈਸਟਨ ਵਿਖੇ ਹੋਣ ਵਾਲੇ ਤੀਜੇ ਅਤੇ ਆਖਰੀ ਟੈਸਟ ਮੈਚ ਤੋਂ ਪਹਿਲਾਂ ਹੈੱਡ ਕੋਚ ਸਰਫਰਾਜ਼ ਅਹਿਮਦ ਨੂੰ ਹਟਾਉਣ ਦੇ ਨਾਲ-ਨਾਲ ਟੀਮ ਅਤੇ ਸਪੋਰਟ ਸਟਾਫ਼ ਵਿੱਚ ਕਈ ਵੱਡੇ ਬਦਲਾਅ ਕੀਤੇ ਹਨ ਅਤੇ ਕਈ ਸੀਨੀਅਰ ਖਿਡਾਰੀਆਂ ਨੂੰ ਬਾਹਰ ਦਾ ਰਸਤਾ ਦਿਖਾਇਆ ਹੈ।
ਪਾਕਿਸਤਾਨੀ ਟੀਮ ਹੈਡਿੰਗਲੇ ਅਤੇ ਲਾਰਡਜ਼ ਵਿੱਚ ਖੇਡੇ ਗਏ ਪਹਿਲੇ ਦੋ ਟੈਸਟ ਮੈਚਾਂ ਦੀਆਂ ਚਾਰੇ ਪਾਰੀਆਂ ਵਿੱਚੋਂ ਇੱਕ ਵਾਰ ਵੀ 200 ਦੌੜਾਂ ਦਾ ਅੰਕੜਾ ਪਾਰ ਨਹੀਂ ਕਰ ਸਕੀ, ਜਿਸ ਕਾਰਨ ਪ੍ਰਸ਼ੰਸਕਾਂ ਅਤੇ ਸਾਬਕਾ ਖਿਡਾਰੀਆਂ ਵੱਲੋਂ ਟੀਮ ਦੀ ਤਿੱਖੀ ਨਿੰਦਾ ਕੀਤੀ ਜਾ ਰਹੀ ਹੈ।
ਹਾਲਾਂਕਿ ਪੀ.ਸੀ.ਬੀ. ਵੱਲੋਂ ਮੋਬਾਈਲ ਫੋਨ ਜ਼ਬਤ ਕਰਨ ਸਬੰਧੀ ਅਜੇ ਤੱਕ ਕੋਈ ਅਧਿਕਾਰਤ ਸਪੱਸ਼ਟੀਕਰਨ ਨਹੀਂ ਦਿੱਤਾ ਗਿਆ ਹੈ, ਪਰ ਕ੍ਰਿਕਟ ਦੇ ਭ੍ਰਿਸ਼ਟਾਚਾਰ ਵਿਰੋਧੀ ਨਿਯਮਾਂ (Anti-corruption framework) ਤਹਿਤ ਜਾਂਚਕਰਤਾਵਾਂ ਕੋਲ ਮਾਮਲੇ ਦੀ ਜਾਂਚ ਲਈ ਖਿਡਾਰੀਆਂ ਦੇ ਡਿਜੀਟਲ ਉਪਕਰਨਾਂ ਅਤੇ ਫੋਨਾਂ ਦੀ ਜਾਂਚ ਕਰਨ ਦਾ ਪੂਰਾ ਅਧਿਕਾਰ ਹੁੰਦਾ ਹੈ।
🚨Some players’ mobile phones are in the PCB’s custody in London, with an investigation currently underway.#pakistancricket #pakistanvsengland pic.twitter.com/LlUAE5cwQI
— Amber Ali🇵🇰 (@aliamber04) September 5, 2026
