Neeraj Chopra, ਰੋਹਿਤ ਅਤੇ ਯਸ਼ਵੀਰ Javelin ਦੇ Final ’ਚ

ਓਲੰਪਿਕ ਹੀਰੋ ਨੀਰਜ ਚੋਪੜਾ ਸਣੇ ਤਿੰਨੋਂ ਭਾਰਤੀ ਐਥਲੀਟ ਰਾਸ਼ਟਰਮੰਡਲ ਖੇਡਾਂ ਦੇ ਪੁਰਸ਼ਾਂ ਦੇ ਨੇਜਾਬਾਜ਼ੀ ਮੁਕਾਬਲੇ ਦੇ ਫਾਈਨਲ ਵਿੱਚ ਪਹੁੰਚ ਗਏ ਹਨ। ਅੱਜ ਇੱਥੇ ਤੇਜ਼ ਅਤੇ ਬਦਲਦੀਆਂ ਹਵਾਵਾਂ ਕਾਰਨ ਕੋਈ ਵੀ ਐਥਲੀਟ ਆਟੋਮੈਟਿਕ ਕੁਆਲੀਫਾਇੰਗ ਮਾਰਕ ਨੂੰ ਹਾਸਲ ਨਹੀਂ ਕਰ ਸਕਿਆ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਚੋਟੀ ਦੇ 12 ਵਿੱਚ ਰਹਿ ਕੇ ਕੁਆਲੀਫਾਈ ਕੀਤਾ। ਨੀਰਜ ਚੋਪੜਾ ਜਿਸ ਨੇ 2018 ਵਿੱਚ ਨੇਜਾਬਾਜ਼ੀ ਦਾ ਖ਼ਿਤਾਬ ਜਿੱਤਿਆ ਸੀ, ਨੇ 79.61 ਮੀਟਰ ਦੇ ਸਰਬੋਤਮ ਯਤਨ ਨਾਲ ਪੰਜਵਾਂ ਸਥਾਨ ਹਾਸਲ ਕੀਤਾ, ਜਦੋਂ ਕਿ ਰੋਹਿਤ ਯਾਦਵ (78.37 ਮੀਟਰ) ਅਤੇ ਯਸ਼ਵੀਰ ਸਿੰਘ (78.36 ਮੀਟਰ) ਨੇ ਕ੍ਰਮਵਾਰ ਨੌਵੇਂ ਅਤੇ ਦਸਵੇਂ ਸਥਾਨ ’ਤੇ ਰਹਿ ਕੇ ਤਗ਼ਮੇ ਵਾਲੇ ਗੇੜ ਵਿੱਚ ਪੂਰੀ ਭਾਰਤੀ ਨੁਮਾਇੰਦਗੀ ਯਕੀਨੀ ਬਣਾਈ। 28 ਸਾਲਾ ਚੋਪੜਾ ਜੋ ਹਰ ਗੇੜ ਵਿੱਚ ਆਖ਼ਰੀ ਥਰੋਅ ਸੁੱਟਣ ਵਾਲਾ ਖਿਡਾਰੀ ਸੀ, ਨੇ ਆਪਣੀ ਤੀਜੀ ਅਤੇ ਆਖ਼ਰੀ ਕੋਸ਼ਿਸ਼ ਨਹੀਂ ਕੀਤੀ ਕਿਉਂਕਿ ਉਹ ਉਦੋਂ ਤੱਕ ਫਾਈਨਲ ਵਿੱਚ ਪਹੁੰਚ ਚੁੱਕਿਆ ਸੀ। ਸਿਰਫ਼ ਚਾਰ ਪ੍ਰਤੀਯੋਗੀ ਹੀ 80 ਮੀਟਰ ਦੇ ਅੰਕ ਨੂੰ ਪਾਰ ਕਰ ਸਕੇ। ਇਸ ਸੀਜ਼ਨ ਵਿੱਚ ਦੋਹਾ ਅਤੇ ਰੋਮ ਡਾਇਮੰਡ ਲੀਗ ਮੀਟਿੰਗਾਂ ਦੇ ਜੇਤੂ ਸ੍ਰੀਲੰਕਾ ਦੇ ਰਮੇਸ਼ ਥਰੰਗਾ ਪਾਤੀਰਾਗੇ ਨੇ ਪਹਿਲੇ ਗੇੜ ਵਿੱਚ 82.84 ਮੀਟਰ ਦੀ ਥਰੋਅ ਨਾਲ ਕੁਆਲੀਫਿਕੇਸ਼ਨ ਵਿੱਚ ਪਹਿਲਾ ਸਥਾਨ ਹਾਸਲ ਕੀਤਾ।