IPL: ਤਿਲਕ ਵਰਮਾ ਦੇ ਸੈਂਕੜੇ ਨੇ ਗੁਜਰਾਤ ਦੇ ਗੜ੍ਹ ’ਚ ਮੁੰਬਈ ਦਾ ਝੰਡਾ ਕੀਤਾ ਬੁਲੰਦ
ਗੁਜਰਾਤ ਟਾਈਟਨਜ਼ ਦੀ ਬੱਲੇਬਾਜ਼ੀ ਹੋਈ ਫ਼ੇਲ੍ਹ; ਮੁੰਬਈ ਨੇ 99 ਦੌੜਾਂ ਨਾਲ ਦਰਜ ਕੀਤੀ ਵੱਡੀ ਜਿੱਤ
ਗੁਜਰਾਤ, 11:37 PM Apr 20, 2026 IST
ਮੈਚ ਦੌਰਾਨ ਮੁੰਬਈ ਇੰਡੀਅਨਜ਼ ਦੇ ਜਸਪ੍ਰੀ ਬੁਮਰਾਹ। (ਫੋਟੋ PTI)
Advertisement
ਨਰਿੰਦਰ ਮੋਦੀ ਸਟੇਡੀਅਮ ਵਿੱਚ ਖੇਡੇ ਗਏ ਆਈਪੀਐਲ ਦੇ ਮੁਕਾਬਲੇ ਵਿੱਚ ਮੁੰਬਈ ਇੰਡੀਅਨਜ਼ ਨੇ ਗੁਜਰਾਤ ਟਾਈਟਨਜ਼ ਨੂੰ 99 ਦੌੜਾਂ ਦੇ ਵੱਡੇ ਫ਼ਰਕ ਨਾਲ ਸ਼ਿਕਸਤ ਦੇ ਕੇ ਟੂਰਨਾਮੈਂਟ ਵਿੱਚ ਆਪਣੀ ਦਾਅਵੇਦਾਰੀ ਮੁੜ ਮਜ਼ਬੂਤ ਕਰ ਲਈ ਹੈ। ਮੁੰਬਈ ਦੀ ਇਸ ਜਿੱਤ ਦੇ ਸੂਤਰਧਾਰ ਨੌਜਵਾਨ ਬੱਲੇਬਾਜ਼ ਤਿਲਕ ਵਰਮਾ ਰਹੇ, ਜਿਨ੍ਹਾਂ ਨੇ ਗੁਜਰਾਤ ਦੇ ਗੇਂਦਬਾਜ਼ੀ ਹਮਲੇ ਦਾ ਡਟਵਾਂ ਜਵਾਬ ਦਿੰਦੇ ਹੋਏ ਨਾਬਾਦ ਸੈਂਕੜਾ ਬਣਾਇਆ।
ਵਰਮਾ ਦੀ ਸ਼ਾਨਦਾਰ ਬੱਲੇਬਾਜ਼ੀ
ਟਾਸ ਹਾਰਨ ਤੋਂ ਬਾਅਦ, ਪਹਿਲਾਂ ਬੱਲੇਬਾਜ਼ੀ ਕਰਨ ਆਈ ਮੁੰਬਈ ਦੀ ਟੀਮ ਦੀ ਸ਼ੁਰੂਆਤ ਬੇਹੱਦ ਨਿਰਾਸ਼ਾਜਨਕ ਰਹੀ। ਪਾਵਰ ਪਲੇਅ ਦੌਰਾਨ ਹੀ ਮੁੰਬਈ ਦੇ ਤਿੰਨ ਮੋਹਰੀ ਬੱਲੇਬਾਜ਼ ਪਵੇਲੀਅਨ ਪਰਤ ਗਏ ਸਨ। ਅਜਿਹੇ ਸੰਕਟਮਈ ਸਮੇਂ ਤਿਲਕ ਵਰਮਾ ਨੇ ਮੈਦਾਨ 'ਤੇ ਨਿਧੜਕ ਬੱਲੇਬਾਜ਼ੀ ਦਾ ਮੁਜ਼ਾਹਰਾ ਕੀਤਾ। ਉਨ੍ਹਾਂ ਨੇ ਮਹਿਜ਼ 45 ਗੇਂਦਾਂ ਵਿੱਚ 8 ਚੌਕਿਆਂ ਅਤੇ 6 ਛੱਕਿਆਂ ਦੀ ਮਦਦ ਨਾਲ ਆਪਣੀ 101 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ। ਨਮਨ ਧੀਰ (45 ਦੌੜਾਂ) ਨੇ ਦੂਜੇ ਪਾਸੇ ਤੋਂ ਵਰਮਾ ਦਾ ਭਰਪੂਰ ਸਾਥ ਦਿੱਤਾ, ਜਿਸ ਸਦਕਾ ਮੁੰਬਈ ਨੇ ਨਿਰਧਾਰਿਤ 20 ਓਵਰਾਂ ਵਿੱਚ 5 ਵਿਕਟਾਂ ਗੁਆ ਕੇ 199 ਦੌੜਾਂ ਦਾ ਸਕੋਰ ਖੜ੍ਹਾ ਕਰ ਦਿੱਤਾ।
ਦੂਜੇ ਪਾਸੇ 200 ਦੌੜਾਂ ਦੇ ਵੱਡੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਗੁਜਰਾਤ ਟਾਈਟਨਜ਼ ਦੀ ਪਾਰੀ ਸ਼ੁਰੂਆਤ ਤੋਂ ਹੀ ਤਿੜਕਦੀ ਨਜ਼ਰ ਆਈ। ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਨੇ ਪਹਿਲੀ ਹੀ ਗੇਂਦ 'ਤੇ ਸਾਈ ਸੁਦਰਸ਼ਨ ਨੂੰ ਆਊਟ ਕਰ ਦਿੱਤਾ। ਮੁੰਬਈ ਦੇ ਗੇਂਦਬਾਜ਼ ਅਸ਼ਵਨੀ ਕੁਮਾਰ ਨੇ ਆਪਣੀ ਫ਼ਿਰਕੀ ਦੇ ਜਾਲ ਵਿੱਚ ਗੁਜਰਾਤ ਦੇ ਬੱਲੇਬਾਜ਼ਾਂ ਨੂੰ ਅਜਿਹਾ ਉਲਝਾਇਆ ਕਿ ਪੂਰੀ ਟੀਮ 15.5 ਓਵਰਾਂ ਵਿੱਚ ਮਹਿਜ਼ 100 ਦੌੜਾਂ 'ਤੇ ਹੀ ਢੇਰੀ ਹੋ ਗਈ। ਅਸ਼ਵਨੀ ਨੇ 4 ਮਹੱਤਵਪੂਰਨ ਵਿਕਟਾਂ ਹਾਸਲ ਕੀਤੀਆਂ।
ਤਿਲਕ ਵਰਮਾ ਨੂੰ ਉਨ੍ਹਾਂ ਦੇ ਸ਼ਾਨਦਾਰ ਬੱਲੇਬਾਜ਼ੀ ਪ੍ਰਦਰਸ਼ਨ ਲਈ ‘ਮੈਨ ਆਫ਼ ਦਿ ਮੈਚ’ ਦੇ ਖ਼ਿਤਾਬ ਨਾਲ ਨਿਵਾਜਿਆ ਗਿਆ। ਇਸ ਜਿੱਤ ਨੇ ਜਿੱਥੇ ਮੁੰਬਈ ਇੰਡੀਅਨਜ਼ ਦੇ ਖ਼ੇਮੇ ਵਿੱਚ ਉਤਸ਼ਾਹ ਭਰ ਦਿੱਤਾ ਹੈ, ਉੱਥੇ ਹੀ ਗੁਜਰਾਤ ਲਈ ਆਉਣ ਵਾਲੇ ਮੈਚਾਂ ਵਿੱਚ ਰਾਹ ਮੁਸ਼ਕਲ ਕਰ ਦਿੱਤੀ ਹੈ।
Advertisement
×
Copyright @2025 Punjabi Tribune
Designed and developed by : 