ਲੁਧਿਆਣਾ ਦੇ ਆਰਾਧਿਆ ਸ਼ੁਕਲਾ ਨੂੰ ਭਾਰਤੀ ਟੀਮ ’ਚ ਮਿਲੀ ਜਗ੍ਹਾ; ਅਫ਼ਗਾਨਿਸਤਾਨ ਟੈਸਟ ਲਈ ਬਣੇ ਨੈੱਟ ਗੇਂਦਬਾਜ਼

ਸਖ਼ਤ ਮਿਹਨਤ, ਦ੍ਰਿੜ੍ਹਤਾ ਅਤੇ ਆਪਣੀ ਕਾਬਲੀਅਤ ’ਤੇ ਅਟੁੱਟ ਵਿਸ਼ਵਾਸ ਨੇ ਅਖ਼ੀਰ ਲੁਧਿਆਣਾ ਦੇ ਪ੍ਰਤਿਭਾਸ਼ਾਲੀ ਤੇਜ਼ ਗੇਂਦਬਾਜ਼ ਆਰਾਧਿਆ ਸ਼ੁਕਲਾ ਦੀ ਝੋਲੀ ਵੱਡੀ ਸਫ਼ਲਤਾ ਪਾ ਦਿੱਤੀ ਹੈ। ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ ਆਰਾਧਿਆ ਨੂੰ ਅਫ਼ਗਾਨਿਸਤਾਨ ਖ਼ਿਲਾਫ਼ ਹੋਣ ਵਾਲੇ ਆਗਾਮੀ ਟੈਸਟ ਮੈਚ ਲਈ ਭਾਰਤੀ ਸੀਨੀਅਰ ਕ੍ਰਿਕਟ ਟੀਮ ਦੇ ‘ਨੈੱਟ ਗੇਂਦਬਾਜ਼’ (Net Bowler) ਵਜੋਂ ਚੁਣਿਆ ਹੈ। ਇਹ ਟੈਸਟ ਮੈਚ 6 ਤੋਂ 10 ਜੂਨ ਤੱਕ ਮਹਾਰਾਜਾ ਯਾਦਵਿੰਦਰਾ ਸਿੰਘ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ, ਮੁਲਾਂਪੁਰ (ਮੁਹਾਲੀ) ਵਿਖੇ ਖੇਡਿਆ ਜਾਵੇਗਾ। ਇਹ ਵੱਕਾਰੀ ਜ਼ਿੰਮੇਵਾਰੀ ਇਸ ਨੌਜਵਾਨ ਕ੍ਰਿਕਟਰ ਦੇ ਤੇਜ਼ੀ ਨਾਲ ਵਧ ਰਹੇ ਕਰੀਅਰ ਵਿੱਚ ਇੱਕ ਹੋਰ ਮੀਲ ਪੱਥਰ ਹੈ, ਜਿਸ ਨੂੰ ਭਾਰਤੀ ਕ੍ਰਿਕਟ ਦੇ ਉੱਚੇ ਮੁਕਾਮ ਵੱਲ ਇੱਕ ਵੱਡਾ ਕਦਮ ਮੰਨਿਆ ਜਾ ਰਿਹਾ ਹੈ। ਜੂਨੀਅਰ ਪੱਧਰ 'ਤੇ ਪਹਿਲਾਂ ਹੀ ਭਾਰਤ ਦੀ ਨੁਮਾਇੰਦਗੀ ਕਰ ਚੁੱਕੇ ਆਰਾਧਿਆ ਲਈ ਦੇਸ਼ ਦੇ ਚੋਟੀ ਦੇ ਕ੍ਰਿਕਟ ਸਿਤਾਰਿਆਂ ਨਾਲ ਡਰੈਸਿੰਗ ਰੂਮ ਅਤੇ ਟ੍ਰੇਨਿੰਗ ਸਹੂਲਤਾਂ ਸਾਂਝੀਆਂ ਕਰਨ ਦਾ ਇਹ ਮੌਕਾ ਉਸ ਦੇ ਹਾਲੀਆ ਸ਼ਾਨਦਾਰ ਪ੍ਰਦਰਸ਼ਨ ਦਾ ਇਨਾਮ ਹੈ।

ਅੰਡਰ-19 ਵਿਸ਼ਵ ਕੱਪ 'ਚ ਵੀ ਦਿਖਾਇਆ ਸੀ ਦਮ

ਆਰਾਧਿਆ ਕੌਮੀ ਪੱਧਰ ’ਤੇ ਪਛਾਣ ਲਈ ਕੋਈ ਨਵਾਂ ਨਾਮ ਨਹੀਂ ਹਨ। ਇਸ ਸੱਜੇ ਹੱਥ ਦੇ ਤੇਜ਼ ਗੇਂਦਬਾਜ਼ ਨੇ ਦੁਬਈ ਵਿੱਚ ਹੋਏ ‘ਏਸੀਸੀ ਅੰਡਰ-19 ਏਸ਼ੀਆ ਕੱਪ’ ਵਿੱਚ ਭਾਰਤੀ ਅੰਡਰ-19 ਟੀਮ ਦੀ ਨੁਮਾਇੰਦਗੀ ਕੀਤੀ ਸੀ ਅਤੇ ਬਾਅਦ ਵਿੱਚ ਦੱਖਣੀ ਅਫ਼ਰੀਕਾ ਵਿੱਚ ਹੋਏ ‘ਆਈਸੀਸੀ ਅੰਡਰ-19 ਵਿਸ਼ਵ ਕੱਪ’ ਵਿੱਚ ਵੀ ਆਪਣੀ ਅਨੁਸ਼ਾਸਿਤ ਗੇਂਦਬਾਜ਼ੀ ਅਤੇ ਦਬਾਅ ਦੇ ਹਾਲਾਤ ਵਿੱਚ ਬਿਹਤਰ ਪ੍ਰਦਰਸ਼ਨ ਲਈ ਖ਼ੂਬ ਵਾਹ-ਵਾਹ ਖੱਟੀ ਸੀ। ਹਾਲਾਂਕਿ, ਇਸ ਤੋਂ ਬਾਅਦ ਦਾ ਸਫ਼ਰ ਚੁਣੌਤੀਆਂ ਭਰਿਆ ਰਿਹਾ।ਫ਼ਿਟਨੈੱਸ ਦੀਆਂ ਸਮੱਸਿਆਵਾਂ ਨਾਲ ਜੂਝਣ ਅਤੇ ਆਪਣੀ ਸਰੀਰਕ ਕੰਡੀਸ਼ਨਿੰਗ ’ਤੇ ਲੰਬਾ ਸਮਾਂ ਮਿਹਨਤ ਕਰਨ ਤੋਂ ਬਾਅਦ, ਆਰਾਧਿਆ ਨੇ ਇਸ ਸੀਜ਼ਨ ਵਿੱਚ ਨਵੇਂ ਇਰਾਦੇ ਨਾਲ ਪ੍ਰਤੀਯੋਗੀ ਕ੍ਰਿਕਟ ਵਿੱਚ ਵਾਪਸੀ ਕੀਤੀ। ਉਨ੍ਹਾਂ ਦੀ ਇਹ ਵਾਪਸੀ ਬੇਹੱਦ ਸ਼ਾਨਦਾਰ ਰਹੀ।

ਸਪਿਨ-ਪੱਖੀ ਪਿੱਚਾਂ 'ਤੇ ਝਟਕਾਈਆਂ 21 ਵਿਕਟਾਂਇਸ ਨੌਜਵਾਨ ਗੇਂਦਬਾਜ਼ ਨੇ ਪੀਸੀਏ (PCA) ਅੰਡਰ-23 ਮਲਟੀ-ਡੇਅ ਸਟੇਟ ਚੈਂਪੀਅਨਸ਼ਿਪ ਵਿੱਚ ਪੰਜਾਬ ਵੱਲੋਂ ਸਭ ਤੋਂ ਵੱਧ ਵਿਕਟਾਂ ਲੈਣ ਦਾ ਮਾਣ ਹਾਸਲ ਕੀਤਾ। ਉਨ੍ਹਾਂ ਨੇ ਮਹਿਜ਼ 5 ਮੈਚਾਂ ਵਿੱਚ 21 ਵਿਕਟਾਂ ਝਟਕਾਈਆਂ। ਇਸ ਪ੍ਰਾਪਤੀ ਦੀ ਖ਼ਾਸ ਗੱਲ ਇਹ ਸੀ ਕਿ ਜ਼ਿਆਦਾਤਰ ਮੈਚ ਅਜਿਹੀਆਂ ਪਿੱਚਾਂ ’ਤੇ ਖੇਡੇ ਗਏ ਸਨ ਜੋ ਸਪਿਨਰਾਂ ਲਈ ਮਦਦਗਾਰ ਸਨ, ਜਿੱਥੇ ਤੇਜ਼ ਗੇਂਦਬਾਜ਼ਾਂ ਲਈ ਵਿਕਟਾਂ ਕੱਢਣਾ ਬੇਹੱਦ ਔਖਾ ਸੀ। ਇਸ ਦੇ ਬਾਵਜੂਦ ਆਰਾਧਿਆ ਨੇ ਆਪਣੀ ਰਫ਼ਤਾਰ, ਸਟੀਕ ਲਾਈਨ-ਲੈਂਥ ਅਤੇ ਨਵੀਂ-ਪੁਰਾਣੀ ਗੇਂਦ ਦੀ ਬਿਹਤਰੀਨ ਵਰਤੋਂ ਨਾਲ ਬੱਲੇਬਾਜ਼ਾਂ ਨੂੰ ਲਗਾਤਾਰ ਪ੍ਰੇਸ਼ਾਨ ਕੀਤਾ।

ਕੋਚ ਅਮਨਦੀਪ ਸਿੰਘ ਨੂੰ ਅਰਾਧਿਆ ’ਤੇ ਮਾਣ

ਆਰਾਧਿਆ ਦੇ ਕੋਚ ਅਮਨਦੀਪ ਸਿੰਘ ਦਾ ਮੰਨਣਾ ਹੈ ਕਿ ਇਸ ਨੌਜਵਾਨ ਦੀ ਹਾਲੀਆ ਸਫ਼ਲਤਾ ਉਸ ਦੀ ਅਣਥੱਕ ਮਿਹਨਤ ਅਤੇ ਖੇਡ ਪ੍ਰਤੀ ਪੇਸ਼ੇਵਰ ਪਹੁੰਚ ਦਾ ਨਤੀਜਾ ਹੈ।ਕੋਚ ਅਮਨਦੀਪ ਸਿੰਘ ਨੇ ਕਿਹਾ, “ ਆਰਾਧਿਆ ਨੇ ਪਿਛਲੇ ਇੱਕ ਸਾਲ ਵਿੱਚ ਸ਼ਾਨਦਾਰ ਪ੍ਰਤੀਬੱਧਤਾ ਦਿਖਾਈ ਹੈ। ਉਸ ਨੇ ਆਪਣੀ ਫ਼ਿਟਨੈੱਸ ਅਤੇ ਗੇਂਦਬਾਜ਼ੀ 'ਤੇ ਦਿਨ-ਰਾਤ ਕੰਮ ਕੀਤਾ, ਜਿਸ ਦੇ ਨਤੀਜੇ ਹੁਣ ਸਭ ਦੇ ਸਾਹਮਣੇ ਹਨ। ਉਹ ਸਟੀਕਤਾ ਬਣਾਈ ਰੱਖਦੇ ਹੋਏ ਤੇਜ਼ ਗੇਂਦਬਾਜ਼ੀ ਕਰਨ ਦੀ ਸਮਰੱਥਾ ਰੱਖਦਾ ਹੈ ਅਤੇ ਨਵੀਂ ਤੇ ਪੁਰਾਣੀ, ਦੋਵਾਂ ਗੇਂਦਾਂ ਨਾਲ ਬਰਾਬਰ ਪ੍ਰਭਾਵਸ਼ਾਲੀ ਹੈ। ਭਾਰਤੀ ਟੀਮ ਵਿੱਚ ਨੈੱਟ ਗੇਂਦਬਾਜ਼ ਵਜੋਂ ਚੁਣਿਆ ਜਾਣਾ ਉਸ ਦੀਆਂ ਕੋਸ਼ਿਸ਼ਾਂ ਦੀ ਸਹੀ ਪ੍ਰਸ਼ੰਸਾ ਹੈ।”

ਉਨ੍ਹਾਂ ਅੱਗੇ ਕਿਹਾ ਕਿ ਅਜਿਹੇ ਮੌਕੇ ਉੱਭਰਦੇ ਕ੍ਰਿਕਟਰਾਂ ਲਈ ਹਮੇਸ਼ਾ ਇੱਕ ਮੀਲ ਦਾ ਪੱਥਰ ਸਾਬਤ ਹੁੰਦੇ ਹਨ, ਜਿੱਥੇ ਉਨ੍ਹਾਂ ਨੂੰ ਅੰਤਰਰਾਸ਼ਟਰੀ ਪੱਧਰ ਦੇ ਮਿਆਰਾਂ ਨੂੰ ਸਮਝਣ ਦਾ ਮੌਕਾ ਮਿਲਦਾ ਹੈ।ਆਰਾਧਿਆ ਅਤੇ ਉਨ੍ਹਾਂ ਦੇ ਪਰਿਵਾਰ ਨੇ ਇਸ ਮੌਕੇ ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ (PCA) ਦਾ ਨਿਰੰਤਰ ਉਤਸ਼ਾਹ ਵਧਾਉਣ, ਸਮਰਥਨ ਅਤੇ ਉਨ੍ਹਾਂ ਦੀਆਂ ਯੋਗਤਾਵਾਂ ਵਿੱਚ ਵਿਸ਼ਵਾਸ ਜਤਾਉਣ ਲਈ ਤਹਿ ਦਿਲੋਂ ਧੰਨਵਾਦ ਕੀਤਾ ਹੈ। ਜਦੋਂ ਆਰਾਧਿਆ ਮੁਲਾਂਪੁਰ ਵਿੱਚ ਦੇਸ਼ ਦੇ ਸਰਵੋਤਮ ਕ੍ਰਿਕਟਰਾਂ ਨਾਲ ਨੈੱਟਸ ਵਿੱਚ ਪਸੀਨਾ ਵਹਾਉਣਗੇ, ਤਾਂ ਪੂਰਾ ਲੁਧਿਆਣਾ ਮਾਣ ਨਾਲ ਉਨ੍ਹਾਂ ਨੂੰ ਦੇਖੇਗਾ ਅਤੇ ਉਮੀਦ ਕਰੇਗਾ ਕਿ ਇਹ ਮੌਕਾ ਉਨ੍ਹਾਂ ਦੇ ਕ੍ਰਿਕਟ ਸਫ਼ਰ ਦੇ ਇੱਕ ਹੋਰ ਵੱਡੇ ਅਧਿਆਏ ਦੀ ਸ਼ੁਰੂਆਤ ਬਣੇਗਾ।