ISSF World Cup: ਚੀਨ ’ਚ ਨਿਸ਼ਾਨੇਬਾਜ਼ੀ ਆਲਮੀ ਕੱਪ ਅੱਜ ਤੋਂ

ਆਈ ਐੱਸ ਐੱਸ ਐੱਫ ਨਿਸ਼ਾਨੇਬਾਜ਼ੀ ਵਿਸ਼ਵ ਕੱਪ ਬੁੱਧਵਾਰ 22 ਜੁਲਾਈ ਤੋਂ ਚੀਨ ਦੇ ਹਾਂਗਜ਼ੂ ਵਿੱਚ ਸ਼ੁਰੂ ਹੋਵੇਗਾ। ਭਾਰਤੀ ਖਿਡਾਰੀਆਂ ਲਈ ਏਸ਼ਿਆਈ ਖੇਡਾਂ ’ਤੇ ਧਿਆਨ ਕੇਂਦਰਤ ਕਰਨ ਤੋਂ ਪਹਿਲਾਂ ਆਲਮੀ ਕੱਪ ’ਚ ਦੁਨੀਆ ਦੇ ਬਿਹਤਰੀਨ ਖਿਡਾਰੀਆਂ ਖ਼ਿਲਾਫ਼ ਖ਼ੁਦ ਨੂੰ ਪਰਖਣ ਦਾ ਇਹ ਆਖ਼ਰੀ ਮੌਕਾ ਹੋਵੇਗਾ। ਇਹ ਟੂਰਨਾਮੈਂਟ ਭਾਰਤ ਨੂੰ ਚੀਨ ਖ਼ਿਲਾਫ਼ ਆਪਣੀ ਪ੍ਰਗਤੀ ਦੇ ਮੁਲਾਂਕਣ ਦਾ ਮੌਕਾ ਵੀ ਦੇਵੇਗਾ। ਏਸ਼ਿਆਈ ਖੇਡਾਂ 19 ਸਤੰਬਰ ਤੋਂ 4 ਅਕਤੂਬਰ ਤੱਕ ਜਪਾਨ ’ਚ ਹੋਣੀਆਂ ਹਨ। ਚੀਨ ਦਾ ਹਾਲ ਹੀ ਦੌਰਾਨ ਸਪੇਨ ’ਚ ਨਿਸ਼ਾਨੇਬਾਜ਼ੀ ਵਿਸ਼ਵ ਕੱਪ ’ਚ ਪ੍ਰਦਰਸ਼ਨ ਸ਼ਾਨਦਾਰ ਰਿਹਾ ਹੈ ਜਿੱਥੇ ਉਹ 8 ਸੋਨ ਤਗ਼ਮਿਆਂ ਨਾਲ ਸਿਖਰ ’ਤੇ ਰਿਹਾ ਸੀ। ਭਾਰਤ ਉਥੇ ਸਿਰਫ ਇੱਕ ਸੋਨ ਤਗ਼ਮਾ ਜਿੱਤ ਸਕਿਆ ਸੀ।ਭਾਰਤ ਨੂੰ ਹੁਣ ਮਹਿਲਾ ਨਿਸ਼ਾਨੇਬਾਜ਼ ਸਰੁਚੀ ਇੰਦਰ ਸਿੰਘ ਤੇ ਈਸ਼ਾ ਸਿੰਘ ਤੋਂ ਕਾਫ਼ੀ ਉਮੀਦਾਂ ਹਨ। ਸਾਬਕਾ ਵਿਸ਼ਵ ਚੈਂਪੀਅਨ ਰੁਦਰਾਂਕਸ਼ ਪਾਟਿਲ 10 ਮੀਟਰ ਏਅਰ ਰਾਈਫਲ ’ਚ ਸਿਰਫ਼ ਅੰਕਾਂ (ਆਰ ਪੀ ਓ) ਲਈ ਮੁਕਾਬਲਾ ਕਰੇਗਾ ਅਤੇ ਵਿਸ਼ਵ ਚੈਂਪੀਅਨਸ਼ਿਪ ’ਚ ਚਾਂਦੀ ਦਾ ਤਗ਼ਮਾ ਜੇਤੂ ਐਸ਼ਵਰਿਆ ਪ੍ਰਤਾਪ ਸਿੰਘ ਤੋਮਰ 50 ਮੀਟਰ ਰਾਈਫਲ 3 ਪੁਜ਼ੀਸ਼ਨ ਵਿੱਚ ਭਾਰਤੀ ਚੁਣੌਤੀ ਦੀ ਅਗਵਾਈ ਕਰੇਗਾ। ਅਨੀਸ਼ ਭਾਨਵਾਲਾ ਤੋਂ 25 ਮੀਟਰ ਰੈਪਿਡ-ਫਾਇਰ ਪਿਸਟਲ ਮੁਕਾਬਲੇ ’ਚ ਚੰਗੇ ਪ੍ਰਦਰਸ਼ਨ ਦੀ ਉਮੀਦ ਹੈ। ਦੋ ਓਲੰਪਿਕ ਤਗ਼ਮੇ ਜੇਤੂ ਮਨੂ ਭਾਕਰ 10 ਮੀਟਰ ਏਅਰ ਪਿਸਟਲ ਅਤੇ 25 ਮੀਟਰ ਪਿਸਟਲ ਈਵੈਂਟ ’ਚ ਮੁਕਾਬਲਾ ਕਰੇਗੀ। ਉਹ ਏਸ਼ਿਆਈ ਖੇਡਾਂ ’ਚ ਵੀ ਇਨ੍ਹਾਂ ਦੋਵਾਂ ਮੁਕਾਬਲਿਆਂ ’ਚ ਹਿੱਸਾ ਲਵੇਗੀ।