ISSF World Cup: 25 ਮੀਟਰ ਪਿਸਟਲ ਮੁਕਾਬਲੇ ’ਚ ਈਸ਼ਾ ਨੇ ਸੋਨ ਤਗ਼ਮਾ ਜਿੱਤਿਆ

21 ਸਾਲਾ ਈਸ਼ਾ ਨੇ ਫਾਈਨਲ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਸੋਨ ਤਗ਼ਮਾ ਜਿੱਤਣ ਲਈ 40 ਨਿਸ਼ਾਨੇ ਸਹੀ ਲਗਾਏ, ਜਦਕਿ ਪੈਰਿਸ 2024 ਦੀ ਡਬਲ ਓਲੰਪਿਕ ਤਗ਼ਮਾ ਜੇਤੂ ਮਨੂ ਨੇ ਤਣਾਅਪੂਰਨ ਅਤੇ ਸਖ਼ਤ ਮੁਕਾਬਲੇ ਵਿੱਚੋਂ ਲੰਘਦਿਆਂ ਇੱਕ ਅਹਿਮ ਸ਼ੂਟ-ਆਫ ਜਿੱਤਿਆ ਅਤੇ ਕਾਂਸੀ ਦਾ ਤਗ਼ਮਾ ਸੁਰੱਖਿਅਤ ਕਰਨ ਲਈ 28 ਹਿੱਟ ਨਾਲ ਸਮਾਪਤ ਕੀਤਾ। ਭਾਰਤੀ ਟੀਮ ਨੇ ਕੁਆਲੀਫਾਈਂਗ ਗੇੜ ਵਿੱਚ ਹੀ ਮਾਪਦੰਡ ਕਾਇਮ ਕਰ ਦਿੱਤੇ ਸਨ।

ਮਨੂ ਨੇ 586-20x ਦੇ ਸ਼ਾਨਦਾਰ ਸਕੋਰ ਨਾਲ ਕੁਆਲੀਫਾਇੰਗ ਸੂਚੀ ਵਿੱਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ ਅਤੇ ਈਸ਼ਾ 585-18x ਨਾਲ ਦੂਜੇ ਸਥਾਨ ’ਤੇ ਰਹਿ ਕੇ ਅੱਠ ਨਿਸ਼ਾਨੇਬਾਜ਼ਾਂ ਦੇ ਫਾਈਨਲ ਵਿੱਚ ਆਸਾਨੀ ਨਾਲ ਪਹੁੰਚ ਗਈ। ਸਾਬਕਾ ਏਸ਼ਿਆਈ ਖੇਡਾਂ ਦੀ ਸੋਨ ਤਗ਼ਮਾ ਜੇਤੂ ਰਾਹੀ ਸਰਨਾਬਤ ਨੇ 582-16x ਸਕੋਰ ਬਣਾਇਆ, ਜਦਕਿ ਸਿਮਰਨਪ੍ਰੀਤ ਕੌਰ ਬਰਾੜ (576-20x) ਅਤੇ ਅਭਿਗਿਆ ਅਸ਼ੋਕ ਪਾਟਿਲ (573-16x) ਨੇ ਰੈਂਕਿੰਗ ਪੁਆਇੰਟਸ ਓਨਲੀ (ਆਰ ਪੀ ਓ) ਸਥਿਤੀ ਤਹਿਤ ਮੁਕਾਬਲਾ ਕਰਦਿਆਂ ਬੱਝਵਾਂ ਪ੍ਰਦਰਸ਼ਨ ਕੀਤਾ।

ਵਿਸ਼ਵ ਕੱਪ ਸੋਨ ਤਗ਼ਮੇ ਤੋਂ ਬਾਅਦ ਮਾਨਸਿਕ ਦਬਾਅ ’ਤੇ ਕਾਬੂ ਪਾਉਣ ਬਾਰੇ ਗੱਲ ਕਰਦਿਆਂ ਈਸ਼ਾ ਨੇ ਕਿਹਾ, ‘‘ਪਿਛਲੇ ਤਗ਼ਮੇ ਕਾਰਨ ਇਹ ਮੈਚ ਮੇਰੇ ਲਈ ਬਹੁਤ ਦਬਾਅ ਵਾਲਾ ਸੀ। ਮੈਂ ਖੁਸ਼ ਹਾਂ ਕਿ ਮੈਂ ਅੱਜ ਇਸ ਤੋਂ ਪਾਰ ਪਾਉਣ ਵਿੱਚ ਸਫਲ ਰਹੀ ਅਤੇ ਸ਼ੁਕਰਗੁਜ਼ਾਰ ਹਾਂ ਕਿ ਮੇਰੇ ਵਿੱਚ ਇਸ ਨੂੰ ਸਹਿਣ ਕਰਨ ਦੀ ਸਮਰੱਥਾ ਸੀ।’’

ਮੈਚ ਤੋਂ ਬਾਅਦ ਮਨੂ ਨੇ ਕਿਹਾ, ‘‘ਇਹ ਤਗ਼ਮਾ ਬਹੁਤ ਮਹੱਤਵਪੂਰਨ ਹੈ ਕਿਉਂਕਿ ਇਹ ਇੱਕ ਪੌੜੀ ਦਾ ਕੰਮ ਕਰਦਾ ਹੈ। ਇਹ ਮੈਨੂੰ ਸਪੱਸ਼ਟਤਾ ਦਿੰਦਾ ਹੈ ਕਿ ਮੈਂ ਕਿਸ ਦਿਸ਼ਾ ਵਿੱਚ ਜਾਣਾ ਚਾਹੁੰਦੀ ਹਾਂ।’’