IPL 2026: Rajasthan Royals ਨੇ Chennai Super Kings ਨੂੰ ਅੱਠ ਵਿਕਟਾਂ ਨਾਲ ਹਰਾਇਆ; Vaibhav Suryavanshi ਦੀ ਧਮਾਕੇਦਾਰ ਬੱਲੇਬਾਜ਼ੀ
Chennai Super Kings ਦੀ ਸ਼ਰਮਨਾਕ ਹਾਰ; Vaibhav Suryavanshi ਨੇ 15 ਗੇਂਦਾਂ ਵਿੱਚ ਜੜਿਆ ਅਰਧ-ਸੈਂਕੜਾ
ਗੁਹਾਟੀ ਵਿੱਚ ਅੱਜ ਖੇਡੇ ਗਏ ਆਈ.ਪੀ.ਐਲ. ਦੇ ਸ਼ੁਰੂਆਤੀ ਮੁਕਾਬਲੇ ਵਿੱਚ ਵੈਭਵ ਸੂਰਿਆਵੰਸ਼ੀ ਦੇ ਤੂਫ਼ਾਨੀ ਅਰਧ-ਸੈਂਕੜੇ ਅਤੇ ਗੇਂਦਬਾਜ਼ਾਂ ਦੇ ਸ਼ਾਨਦਾਰ ਪ੍ਰਦਰਸ਼ਨ ਦੀ ਬਦੌਲਤ ਰਾਜਸਥਾਨ ਰਾਇਲਜ਼ ਨੇ ਚੇਨਈ ਸੁਪਰ ਕਿੰਗਜ਼ (CSK) ਨੂੰ 8 ਵਿਕਟਾਂ ਨਾਲ ਕਰਾਰੀ ਹਾਰ ਦਿੱਤੀ। ਰਾਜਸਥਾਨ ਦੇ ਕਪਤਾਨ ਰਿਆਨ ਪਰਾਗ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ ਅਤੇ ਨਮੀ ਵਾਲੀ ਪਿੱਚ ਦਾ ਫਾਇਦਾ ਉਠਾਉਂਦੇ ਹੋਏ ਚੇਨਈ ਦੀ ਪੂਰੀ ਟੀਮ ਨੂੰ ਮਹਿਜ਼ 127 ਦੌੜਾਂ ’ਤੇ ਆਊਟ ਕਰ ਦਿੱਤਾ।
15 ਸਾਲਾ ਵੈਭਵ ਸੂਰਿਆਵੰਸ਼ੀ ਨੇ ਮੈਦਾਨ ਦੇ ਚਾਰੇ ਪਾਸੇ ਚੌਕਿਆਂ ਤੇ ਛੱਕਿਆਂ ਦੀ ਬਰਸਾਤ ਕਰਦਿਆਂ ਸਿਰਫ਼ 15 ਗੇਂਦਾਂ ਵਿੱਚ ਆਪਣਾ ਅਰਧ-ਸੈਂਕੜਾ ਪੂਰਾ ਕੀਤਾ, ਜੋ ਆਈ.ਪੀ.ਐਲ. ਇਤਿਹਾਸ ਦਾ ਤੀਜਾ ਸਭ ਤੋਂ ਤੇਜ਼ ਅਰਧ-ਸੈਂਕੜਾ ਹੈ। ਦੂਜੇ ਪਾਸੇ ਯਸ਼ਸਵੀ ਜੈਸਵਾਲ (38 ਨਾਬਾਦ) ਨੇ ਸੂਰਿਆਵੰਸ਼ੀ ਨੂੰ ਜ਼ਿਆਦਾਤਰ ਸਟਰਾਈਕ ਦੇ ਕੇ ਸਮਝਦਾਰੀ ਨਾਲ ਬੱਲੇਬਾਜ਼ੀ ਕੀਤੀ। ਰਾਜਸਥਾਨ ਨੇ ਜਿੱਤ ਲਈ ਮਿਲੇ 128 ਦੌੜਾਂ ਦੇ ਟੀਚੇ ਨੂੰ ਸਿਰਫ਼ 12.1 ਓਵਰਾਂ ਵਿੱਚ ਹੀ ਹਾਸਲ ਕਰ ਲਿਆ। ਸੂਰਿਆਵੰਸ਼ੀ ਦੇ ਆਊਟ ਹੋਣ ਤੋਂ ਬਾਅਦ ਜੈਸਵਾਲ ਅਤੇ ਰਿਆਨ ਪਰਾਗ (14 ਨਾਬਾਦ) ਨੇ ਬਾਕੀ ਰਹਿੰਦੀਆਂ ਦੌੜਾਂ ਪੂਰੀਆਂ ਕੀਤੀਆਂ।
ਇਸ ਸੀਜ਼ਨ ਤੋਂ ਪਹਿਲਾਂ ਦੋਵਾਂ ਟੀਮਾਂ ਨੇ ਆਪਣੇ ਸਟਾਰ ਖਿਡਾਰੀਆਂ ਰਾਵਿੰਦਰ ਜਡੇਜਾ ਅਤੇ ਸੰਜੂ ਸੈਮਸਨ ਦੀ ਅਦਲਾ-ਬਦਲੀ ਕੀਤੀ ਸੀ। ਜਡੇਜਾ ਲਈ ਰਾਜਸਥਾਨ ਰਾਇਲਜ਼ ਵਿੱਚ ਵਾਪਸੀ ਬੇਹੱਦ ਸਫਲ ਰਹੀ, ਜਿਨ੍ਹਾਂ ਨੇ ਆਪਣੇ ਪਹਿਲੇ ਹੀ ਓਵਰ ਵਿੱਚ ਦੋ ਵਿਕਟਾਂ ਝਟਕਾਈਆਂ। ਦੂਜੇ ਪਾਸੇ, ਭਾਰਤ ਦੀ ਟੀ-20 ਵਿਸ਼ਵ ਕੱਪ ਜਿੱਤ ਦੇ ਸਟਾਰ ਸੰਜੂ ਸੈਮਸਨ ਚੇਨਈ ਲਈ ਆਪਣੇ ਪਹਿਲੇ ਮੈਚ ਵਿੱਚ ਫੇਲ੍ਹ ਸਾਬਤ ਹੋਏ ਅਤੇ ਨਾਂਦਰੇ ਬਰਗਰ ਦੀ ਇੱਕ ਤੇਜ਼ ਗੇਂਦ 'ਤੇ ਬੋਲਡ ਹੋ ਗਏ। ਚੇਨਈ ਦੇ ਕਪਤਾਨ ਰਿਤੂਰਾਜ ਗਾਇਕਵਾੜ ਵੀ ਜੋਫਰਾ ਆਰਚਰ ਦੀ ਗੇਂਦ 'ਤੇ ਕਲੀਨ ਬੋਲਡ ਹੋ ਕੇ ਪੈਵੇਲੀਅਨ ਪਰਤ ਗਏ।
ਚੇਨਈ ਦੀ ਹਾਲਤ ਇੱਕ ਸਮੇਂ ਇੰਨੀ ਖ਼ਰਾਬ ਸੀ ਕਿ 8 ਓਵਰਾਂ ਵਿੱਚ ਉਸ ਦੀਆਂ 6 ਵਿਕਟਾਂ ਸਿਰਫ਼ 57 ਦੌੜਾਂ 'ਤੇ ਡਿੱਗ ਚੁੱਕੀਆਂ ਸਨ। ਜੇਮੀ ਓਵਰਟਨ (43 ਦੌੜਾਂ) ਦੀ ਪਾਰੀ ਸਦਕਾ ਚੇਨਈ 127 ਦੌੜਾਂ ਤੱਕ ਪਹੁੰਚਣ ਵਿੱਚ ਕਾਮਯਾਬ ਰਹੀ ਪਰ ਇਹ ਸਕੋਰ ਰਾਜਸਥਾਨ ਨੂੰ ਰੋਕਣ ਲਈ ਕਾਫ਼ੀ ਨਹੀਂ ਸੀ। ਰਾਜਸਥਾਨ ਵੱਲੋਂ ਆਰਚਰ, ਬਰਗਰ ਅਤੇ ਜਡੇਜਾ ਨੇ 2-2 ਵਿਕਟਾਂ ਹਾਸਲ ਕੀਤੀਆਂ।
