ਭਾਰਤੀ ਮੁੱਕੇਬਾਜ਼ਾਂ ਦਾ ਸ਼ਾਨਦਾਰ ਆਗਾਜ਼

ਹਿਤੇਸ਼ ਗੁਲੀਆ (70 ਕਿਲੋ) ਅਤੇ ਪ੍ਰੀਤੀ (54 ਕਿਲੋ) ਦੀਆਂ ਸ਼ਾਨਦਾਰ ਜਿੱਤਾਂ ਸਦਕਾ ਭਾਰਤ ਨੇ ਬਾਕਸੈਮ ਇਲੀਟ ਇੰਟਰਨੈਸ਼ਨਲ 2026 ਮੁੱਕੇਬਾਜ਼ੀ ਟੂਰਨਾਮੈਂਟ ਵਿੱਚ ਆਪਣੀ ਮੁਹਿੰਮ ਦੀ ਸ਼ਾਨਦਾਰ ​​ਸ਼ੁਰੂਆਤ ਕੀਤੀ। ਇਸ ਟੂਰਨਾਮੈਂਟ ਵਿੱਚ 21 ਦੇਸ਼ਾਂ ਦੇ 214 ਮੁੱਕੇਬਾਜ਼ ਹਿੱਸਾ ਲੈ ਰਹੇ ਹਨ। ਹਿਤੇਸ਼ ਨੇ 70 ਕਿਲੋਗ੍ਰਾਮ ਭਾਰ ਵਰਗ ਵਿੱਚ ਇਲੀਟ ਪੁਰਸ਼ ਵਰਗ ਵਿੱਚ ਦਬਦਬਾ ਕਾਇਮ ਰੱਖਦਿਆਂ ਨੈਦਰਲੈਂਡ ਦੇ ਫਿੱਨ ਬੋਸ ਨੂੰ 5-0 ਨਾਲ ਹਰਾਇਆ। ਇਸ ਤੋਂ ਪਹਿਲਾਂ ਪ੍ਰੀਤੀ ਨੇ ਮਹਿਲਾਵਾਂ ਦੇ ਇਲੀਟ 54 ਕਿਲੋਗ੍ਰਾਮ ਵਰਗ ਵਿੱਚ ਕਜ਼ਾਖਿਸਤਾਨ ਦੀ ਅਲਿਆਸਕਰ ਸਿੰਬੈਤ ’ਤੇ 5-0 ਨਾਲ ਸ਼ਾਨਦਾਰ ਜਿੱਤ ਦਰਜ ਕੀਤੀ। ਇਸ ਤੋਂ ਇਲਾਵਾ ਭਾਰਤੀ ਮੁੱਕੇਬਾਜ਼ਾਂ ਪ੍ਰਾਚੀ (57 ਕਿਲੋਗ੍ਰਾਮ), ਪ੍ਰਿਆ (60 ਕਿਲੋਗ੍ਰਾਮ) ਤੇ ਕਾਜਲ (65 ਕਿਲੋਗ੍ਰਾਮ) ਨੇ ਵੀ ਵਧੀਆ ਪ੍ਰਦਰਸ਼ਨ ਕੀਤਾ ਅਤੇ ਅਗਲੇ ਗੇੜ ਵਿੱਚ ਥਾਂ ਬਣਾਈ। ਆਕਾਸ਼ (75 ਕਿਲੋਗ੍ਰਾਮ) ਅਤੇ ਅੰਕੁਸ਼ (80 ਕਿਲੋਗ੍ਰਾਮ) ਨੇ ਵੀ 4-1 ਨਾਲ ਜਿੱਤ ਦਰਜ ਕੀਤੀ।