India vs Sri Lanka first test: ਸੋਨਲ ਦਿਨੁਸ਼ਾ ਦੇ ਸੈਂਕੜੇ ਦੇ ਬਾਵਜੂਦ ਭਾਰਤ ਨੂੰ 178 ਦੌੜਾਂ ਦੀ ਲੀਡ
ਸ੍ਰੀਲੰਕਾ ਦੀ ਪਹਿਲੀ ਪਾਰੀ 284 ਦੌੜਾਂ ’ਤੇ ਸਿਮਟੀ
India vs Sri Lanka first test: ਗਾਲੇ ਵਿਚ ਖੇਡੇ ਜਾ ਰਹੇ ਦੋ ਮੈਚਾਂ ਦੀ ਲੜੀ ਦੇ ਪਹਿਲੇ ਟੈਸਟ ਦੇ ਤੀਜੇ ਦਿਨ ਸੋਮਵਾਰ ਨੂੰ ਭਾਰਤ ਮਜ਼ਬੂਤ ਸਥਿਤੀ ਵਿਚ ਪੁੱਜ ਗਿਆ ਹੈ। ਸ੍ਰੀਲੰਕਾ ਦੇ ਬੱਲੇਬਾਜ਼ ਸੋਨਲ ਦਿਨੁਸ਼ਾ ਦੀ ਸ਼ਾਨਦਾਰ ਸੈਂਕੜੇ ਵਾਲੀ ਪਾਰੀ ਦੇ ਬਾਵਜੂਦ ਮਾਨਵ ਸੁਥਰ (76 ਦੌੜਾਂ ਦੇ ਕੇ 4 ਵਿਕਟਾਂ) ਅਤੇ ਰਾਵਿੰਦਰ ਜਡੇਜਾ (57 ਦੌੜਾਂ ਦੇ ਕੇ 3 ਵਿਕਟਾਂ) ਦੀ ਵਧੀਆ ਗੇਂਦਬਾਜ਼ੀ ਦੇ ਅੱਗੇ ਸ੍ਰੀਲੰਕਾ ਦੀ ਪੂਰੀ ਟੀਮ ਪਹਿਲੀ ਪਾਰੀ ਵਿੱਚ 284 ਦੌੜਾਂ ’ਤੇ ਆਊਟ ਹੋ ਗਈ। ਇਸ ਦੇ ਨਾਲ ਹੀ ਭਾਰਤ ਨੂੰ ਪਹਿਲੀ ਪਾਰੀ ਦੇ ਆਧਾਰ 'ਤੇ 178 ਦੌੜਾਂ ਦੀ ਅਹਿਮ ਲੀਡ ਮਿਲ ਗਈ ਹੈ। ਮੈਚ ਦੇ ਸ਼ੁਰੂਆਤੀ ਸੈਸ਼ਨ ਵਿੱਚ ਭਾਰਤੀ ਗੇਂਦਬਾਜ਼ਾਂ ਦੇ ਸਾਹਮਣੇ ਸ਼੍ਰੀਲੰਕਾ ਦੀ ਅੱਧੀ ਟੀਮ ਲੰਚ ਤੋਂ ਪਹਿਲਾਂ ਹੀ 90 ਦੌੜਾਂ ਦੇ ਸਕੋਰ 'ਤੇ ਪੈਵੇਲੀਅਨ ਪਰਤ ਚੁੱਕੀ ਸੀ।
ਸ਼ੁਰੂਆਤੀ ਝਟਕਿਆਂ ਤੋਂ ਬਾਅਦ, ਆਪਣਾ ਚੌਥਾ ਟੈਸਟ ਖੇਡ ਰਹੇ ਸੋਨਲ ਦਿਨੁਸ਼ਾ ਨੇ ਇਸ ਫਾਰਮੈਟ ਵਿੱਚ ਆਪਣਾ ਪਹਿਲਾ ਅੰਤਰਰਾਸ਼ਟਰੀ ਸੈਂਕੜਾ ਜੜਦਿਆਂ 168 ਗੇਂਦਾਂ 'ਤੇ 100 ਦੌੜਾਂ ਦੀ ਪਾਰੀ ਖੇਡੀ। ਉਨ੍ਹਾਂ ਨੂੰ ਟੀਮ ਵਿੱਚ ਵਾਪਸੀ ਕਰ ਰਹੇ ਵਿਕਟਕੀਪਰ ਬੱਲੇਬਾਜ਼ ਨਿਰੋਸ਼ਨ ਡਿਕਵੇਲਾ (115 ਗੇਂਦਾਂ 'ਤੇ 80 ਦੌੜਾਂ) ਦਾ ਸਾਥ ਮਿਲਿਆ। ਦੋਵਾਂ ਬੱਲੇਬਾਜ਼ਾਂ ਨੇ ਛੇਵੇਂ ਵਿਕਟ ਲਈ 216 ਗੇਂਦਾਂ ਵਿੱਚ 146 ਦੌੜਾਂ ਦੀ ਮਹੱਤਵਪੂਰਨ ਭਾਈਵਾਲੀ ਕਰਕੇ ਭਾਰਤੀ ਗੇਂਦਬਾਜ਼ਾਂ ਨੂੰ ਲੰਬਾ ਸਮਾਂ ਸਫਲਤਾ ਤੋਂ ਦੂਰ ਰੱਖਿਆ। ਇਸ ਜੋੜੀ ਨੇ ਦੂਜੇ ਸੈਸ਼ਨ ਵਿੱਚ ਬਿਨਾਂ ਕੋਈ ਵਿਕਟ ਗੁਆਏ 116 ਦੌੜਾਂ ਜੋੜੀਆਂ ਅਤੇ ਸਪਿੰਨ ਗੇਂਦਬਾਜ਼ਾਂ ਵਿਰੁੱਧ ਸਵੀਪ ਸ਼ਾਟ ਦੀ ਪ੍ਰਭਾਵਸ਼ਾਲੀ ਵਰਤੋਂ ਕੀਤੀ। ਹਾਲਾਂਕਿ, ਆਖਰੀ ਸੈਸ਼ਨ ਵਿੱਚ ਪ੍ਰਸਿਧ ਕ੍ਰਿਸ਼ਨਾ ਨੇ ਡਿਕਵੇਲਾ ਨੂੰ ਆਉਟ ਕਰਕੇ ਇਸ ਭਾਈਵਾਲੀ ਨੂੰ ਤੋੜਿਆ।
ਡਿਕਵੇਲਾ ਦੇ ਆਉਟ ਹੋਣ ਤੋਂ ਤੁਰੰਤ ਬਾਅਦ, ਰਾਵਿੰਦਰ ਜਡੇਜਾ ਨੇ ਕੇਸ਼ਰਾ ਨੁਵੰਤਾ ਨੂੰ ਆਉਟ ਕਰਕੇ ਟੈਸਟ ਕ੍ਰਿਕਟ ਵਿੱਚ ਆਪਣੇ 350 ਵਿਕਟ ਪੂਰੇ ਕੀਤੇ। ਇਸ ਦੇ ਨਾਲ ਹੀ ਜਡੇਜਾ ਟੈਸਟ ਕ੍ਰਿਕੇਟ ਵਿੱਚ 4,000 ਤੋਂ ਵੱਧ ਦੌੜਾਂ ਅਤੇ 350 ਵਿਕਟ ਲੈਣ ਵਾਲੇ ਮਹਾਨ ਕਪਿਲ ਦੇਵ ਤੋਂ ਬਾਅਦ ਭਾਰਤ ਦੇ ਸਿਰਫ਼ ਦੂਜੇ ਅਤੇ ਕੁੱਲ ਚੌਥੇ ਆਲਰਾਊਂਡਰ ਬਣ ਗਏ ਹਨ। ਜਡੇਜਾ ਨੇ ਇਸ ਤੋਂ ਅਗਲੀ ਹੀ ਗੇਂਦ 'ਤੇ ਦਿਨੁਸ਼ਾ ਨੂੰ ਵੀ ਐਲ.ਬੀ.ਡਬਲਯੂ. ਆਉਟ ਕਰ ਦਿੱਤਾ। ਇਸ ਤੋਂ ਪਹਿਲਾਂ, ਭਾਰਤ ਨੇ ਦਿਨ ਦੀ ਸ਼ੁਰੂਆਤ ਸਵੇਰੇ 9 ਵਿਕਟਾਂ 'ਤੇ 460 ਦੌੜਾਂ ਤੋਂ ਅੱਗੇ ਕੀਤੀ ਅਤੇ ਸਿਰਫ਼ ਚਾਰ ਗੇਂਦਾਂ ਦੇ ਅੰਦਰ ਆਪਣੇ ਸਕੋਰ ਵਿੱਚ 2 ਦੌੜਾਂ ਜੋੜ ਕੇ ਆਪਣੀ ਪਹਿਲੀ ਪਾਰੀ 462 ਦੌੜਾਂ 'ਤੇ ਸਮਾਪਤ ਕੀਤੀ। ਜਵਾਬ ਵਿੱਚ ਗੇਂਦਬਾਜ਼ੀ ਕਰਦਿਆਂ ਮੁਹੰਮਦ ਸਿਰਾਜ ਨੇ ਪਾਰੀ ਦੀ ਦੂਜੀ ਹੀ ਗੇਂਦ 'ਤੇ ਨਿਸ਼ਾਨ ਫਰਨਾਂਡੋ ਨੂੰ ਬਿਨਾਂ ਖਾਤਾ ਖੋਲ੍ਹੇ ਆਉਟ ਕਰਕੇ ਸ਼੍ਰੀਲੰਕਾ ਨੂੰ ਸ਼ੁਰੂਆਤੀ ਝਟਕਾ ਦਿੱਤਾ ਸੀ, ਜਿਸ ਤੋਂ ਬਾਅਦ ਸਪਿੰਨਰਾਂ ਨੇ ਆਪਣਾ ਸ਼ਿਕੰਜਾ ਕੱਸਣਾ ਸ਼ੁਰੂ ਕਰ ਦਿੱਤਾ।
ਸ੍ਰੀ ਲੰਕਾ ਵਿਰੁੱਧ ਪਹਿਲੇ ਟੈਸਟ ਮੈਚ ਦੇ ਤੀਜੇ ਦਿਨ ਸੋਮਵਾਰ ਨੂੰ ਭਾਰਤੀ ਟੀਮ ਆਪਣੀ ਪਹਿਲੀ ਪਾਰੀ ਵਿੱਚ 462 ਦੌੜਾਂ 'ਤੇ ਸਿਮਟ ਗਈ। ਭਾਰਤ ਵੱਲੋਂ ਦੇਵਦੱਤ ਪਡੀਕਲ ਨੇ ਸਭ ਤੋਂ ਵੱਧ 167 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ, ਜਿਹੜੀ ਐਤਵਾਰ ਨੂੰ ਸਮਾਪਤ ਹੋਈ ਸੀ।
ਪਾਰੀ ਦੀ ਸ਼ੁਰੂਆਤ 460 ਦੌੜਾਂ 'ਤੇ 9 ਵਿਕਟਾਂ ਨਾਲ ਕਰਨ ਵਾਲੀ ਭਾਰਤੀ ਟੀਮ ਆਖਰੀ ਵਿਕਟ ਡਿੱਗਣ ਤੋਂ ਪਹਿਲਾਂ ਸਿਰਫ਼ 2 ਦੌੜਾਂ ਹੀ ਹੋਰ ਜੋੜ ਸਕੀ, ਜਿੱਥੇ ਅਸੀਥਾ ਫਰਨਾਂਡੋ ਨੇ ਕ੍ਰਿਸ਼ਨਾ ਨੂੰ ਆਊਟ ਕੀਤਾ।
ਸ੍ਰੀ ਲੰਕਾ ਵੱਲੋਂ ਪ੍ਰਭਾਤ ਜੈਸੂਰੀਆ ਸਭ ਤੋਂ ਸਫ਼ਲ ਗੇਂਦਬਾਜ਼ ਰਹੇ, ਜਿਨ੍ਹਾਂ ਨੇ 109 ਦੌੜਾਂ ਦੇ ਕੇ 4 ਵਿਕਟਾਂ ਹਾਸਲ ਕੀਤੀਆਂ। ਕੇਸ਼ਰਾ ਨੁਵੰਥਾ ਨੇ 175 ਦੌੜਾਂ ਦੇ ਕੇ 3 ਅਤੇ ਫਰਨਾਂਡੋ ਨੇ 63 ਦੌੜਾਂ ਦੇ ਕੇ 2 ਵਿਕਟਾਂ ਲਈਆਂ।
ਭਾਰਤ ਦਾ ਇਹ ਸਕੋਰ ਪਡੀਕਲ ਦੀ ਸ਼ਾਨਦਾਰ ਪਾਰੀ ਦੇ ਆਧਾਰ ’ਤੇ ਬਣਿਆ, ਜਿਸ ਨੇ ਪਹਿਲੀ ਪਾਰੀ ਦੀ ਖੇਡ ਨੂੰ ਸੰਭਾਲ ਕੇ ਰੱਖਿਆ। ਟੈਸਟ ਦੇ ਦੂਜੇ ਦਿਨ ਲਗਾਤਾਰ ਮੀਂਹ ਪੈਣ ਕਾਰਨ ਪਹਿਲੇ ਦੋ ਸੈਸ਼ਨ ਪ੍ਰਭਾਵਿਤ ਹੋਏ ਸਨ (ਖੇਡ ਨਹੀਂ ਹੋ ਸਕੀ ਸੀ)।
ਸੰਖੇਪ ਸਕੋਰ: ਭਾਰਤ 462 ਦੌੜਾਂ (ਆਲ ਆਊਟ), 116.4 ਓਵਰ (ਕੇ.ਐੱਲ. ਰਾਹੁਲ 82, ਦੇਵਦੱਤ ਪਡੀਕਲ 167, ਧਰੁਵ ਜੁਨੇਲ 51; ਪ੍ਰਭਾਤ ਜੈਸੂਰੀਆ 4/109, ਕੇਸ਼ਰਾ ਨੁਵੰਥਾ 3/175, ਅਸੀਥਾ ਫਰਨਾਂਡੋ 2/63)।
