ਇੰਡੀਆ ਓਪਨ: ਲਿਨ ਤੇ ਯੰਗ ਬਣੇ ਚੈਂਪੀਅਨ

ਚੀਨੀ ਤਾਇਪੇ ਦੇ ਲਿਨ ਚੁਨ ਯੀ ਅਤੇ ਦੱਖਣੀ ਕੋਰੀਆ ਦੀ ਵਿਸ਼ਵ ਨੰਬਰ ਇੱਕ ਖਿਡਾਰਨ ਐਨ ਸੇ ਯੰਗ ਨੇ ਇੱਥੇ ਇੰਡੀਆ ਓਪਨ ਬੈਡਮਿੰਟਨ ਟੂਰਨਾਮੈਂਟ ਵਿੱਚ ਕ੍ਰਮਵਾਰ ਪੁਰਸ਼ ਅਤੇ ਮਹਿਲਾ ਸਿੰਗਲਜ਼ ਦੇ ਖਿਤਾਬ ਜਿੱਤ ਲਏ ਹਨ। 26 ਸਾਲਾ ਲਿਨ ਨੇ ਫਾਈਨਲ ਵਿੱਚ ਇੰਡੋਨੇਸ਼ੀਆ ਦੇ ਤੀਜਾ ਦਰਜਾ ਪ੍ਰਾਪਤ ਜੌਨਾਥਨ ਕ੍ਰਿਸਟੀ ਨੂੰ 21-10, 21-18 ਨਾਲ ਹਰਾ ਕੇ ਆਪਣੇ ਕਰੀਅਰ ਦਾ ਪਹਿਲਾ ਸੁਪਰ 750 ਖਿਤਾਬ ਜਿੱਤਿਆ। ਖੱਬੇ ਹੱਥ ਦੇ ਇਸ ਖਿਡਾਰੀ ਨੇ ਸੱਟ ਦੇ ਬਾਵਜੂਦ ਸ਼ਾਨਦਾਰ ਖੇਡ ਦਾ ਪ੍ਰਦਰਸ਼ਨ ਕੀਤਾ। ਪਹਿਲੀ ਗੇਮ ਵਿੱਚ ਉਸ ਨੇ ਜੌਨਾਥਨ ਨੂੰ ਕੋਈ ਮੌਕਾ ਨਹੀਂ ਦਿੱਤਾ। ਦੂਜੀ ਗੇਮ ਵਿੱਚ ਜੌਨਾਥਨ ਨੇ ਵਾਪਸੀ ਦੀ ਕੋਸ਼ਿਸ਼ ਕੀਤੀ ਅਤੇ ਇੱਕ ਵਾਰ 18-15 ਦੀ ਲੀਡ ਵੀ ਲਈ, ਪਰ ਲਿਨ ਨੇ ਲਗਾਤਾਰ ਛੇ ਅੰਕ ਲੈ ਕੇ ਮੈਚ ਅਤੇ ਖਿਤਾਬ ਆਪਣੇ ਨਾਮ ਕਰ ਲਿਆ। ਮਹਿਲਾ ਸਿੰਗਲਜ਼ ਵਿੱਚ ਸਿਖਰਲਾ ਦਰਜਾ ਪ੍ਰਾਪਤ ਅਤੇ ਮੌਜੂਦਾ ਚੈਂਪੀਅਨ ਐਨ ਸੇ ਯੰਗ ਨੇ ਆਪਣੀ ਬਾਦਸ਼ਾਹਤ ਕਾਇਮ ਰੱਖਦਿਆਂ ਚੀਨ ਦੀ ਵਿਸ਼ਵ ਨੰਬਰ ਦੋ ਖਿਡਾਰਨ ਵਾਂਗ ਜ਼ੀਯੀ ਨੂੰ 21-13, 21-11 ਨਾਲ ਮਾਤ ਦਿੱਤੀ। ਇਹ ਇਸ ਸੀਜ਼ਨ ਵਿੱਚ ਉਸ ਦਾ ਦੂਜਾ ਖਿਤਾਬ ਹੈ। ਯੰਗ ਪੂਰੇ ਮੈਚ ਵਿੱਚ ਹਾਵੀ ਰਹੀ ਅਤੇ ਵਾਂਗ ਨੂੰ ਸੰਭਲਣ ਦਾ ਮੌਕਾ ਨਹੀਂ ਦਿੱਤਾ।