India A ਨੇ Test match series ਜਿੱਤੀ
ਸ੍ਰੀਲੰਕਾ ‘ਏ’ ਨੂੰ 1-0 ਨਾਲ ਹਰਾਇਆ; Gurnoor Brar ਨੇ 10 ਵਿਕਟਾਂ ਲਈਆਂ
ਗੁਰਨੂਰ ਬਰਾੜ ਨੇ ਮੈਚ ਦਾ ਪਾਸਾ ਪਲਟਣ ਵਾਲਾ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਸ੍ਰੀਲੰਕਾ ‘ਏ’ ਦੇ ਬੱਲੇਬਾਜ਼ਾਂ ਨੂੰ ਢਹਿ-ਢੇਰੀ ਕਰ ਦਿੱਤਾ। ਉਸ ਦੀ ਇਸ ਕਾਰਗੁਜ਼ਾਰੀ ਸਦਕਾ ਭਾਰਤ ‘ਏ’ ਕ੍ਰਿਕਟ ਟੀਮ ਨੂੰ ਜਿੱਤ ਲਈ ਸਿਰਫ਼ 33 ਦੌੜਾਂ ਦਾ ਆਸਾਨ ਟੀਚਾ ਮਿਲਿਆ, ਜਿਸ ਨੂੰ ਪੂਰਾ ਕਰ ਕੇ ਟੀਮ ਨੇ ਅੱਜ ਗਾਲੇ ਵਿੱਚ ਖੇਡੀ ਗਈ ਅਣਅਧਿਕਾਰਤ ਟੈਸਟ ਲੜੀ 1-0 ਨਾਲ ਆਪਣੇ ਨਾਮ ਕਰ ਲਈ।
ਬਰਾੜ ਨੇ ਪਹਿਲੀ ਪਾਰੀ ਵਿੱਚ ਚਾਰ ਵਿਕਟਾਂ ਲੈਣ ਮਗਰੋਂ ਦੂਜੀ ਪਾਰੀ ’ਚ ਛੇ ਵਿਕਟਾਂ ਝਟਕਾਈਆਂ। ਉਸ ਨੇ ਮੈਚ ਵਿੱਚ 145 ਦੌੜਾਂ ਦੇ ਕੇ 10 ਵਿਕਟਾਂ ਲੈਣ ਦਾ ਬੇਮਿਸਾਲ ਰਿਕਾਰਡ ਬਣਾਇਆ, ਜੋ ਕਿ ਉਸ ਦੇ ਸ਼ੁਰੂਆਤੀ ਫਸਟ-ਕਲਾਸ ਕਰੀਅਰ ਦਾ ਹੁਣ ਤੱਕ ਦਾ ਸਭ ਤੋਂ ਵਧੀਆ ਪ੍ਰਦਰਸ਼ਨ ਹੈ। ਸ੍ਰੀਲੰਕਾ ‘ਏ’ ਨੇ ਆਪਣੀ ਦੂਜੀ ਪਾਰੀ ਦੀ ਸ਼ੁਰੂਆਤ 177 ਦੌੜਾਂ ਪਿੱਛੇ ਰਹਿ ਕੇ ਕੀਤੀ ਸੀ ਅਤੇ ਪੂਰੀ ਟੀਮ 209 ਦੌੜਾਂ ’ਤੇ ਹੀ ਆਊਟ ਹੋ ਗਈ। ਉਸ ਤੋਂ ਬਾਅਦ ਭਾਰਤ ‘ਏ’ ਨੇ ਬਿਨਾਂ ਕਿਸੇ ਮੁਸ਼ਕਲ ਦੇ ਮੈਚ ਜਿੱਤ ਲਿਆ।
ਭਾਰਤ ‘ਏ’ ਨੇ ਦਿਨ ਦੀ ਸ਼ੁਰੂਆਤ ਆਪਣੀ ਪਹਿਲੀ ਪਾਰੀ ਵਿੱਚ 8 ਵਿਕਟਾਂ ’ਤੇ 541 ਦੌੜਾਂ ਨਾਲ ਕੀਤੀ ਸੀ। ਇਸ ਵਿਸ਼ਾਲ ਸਕੋਰ ਵਿੱਚ ਬੀ ਸਾਈ ਸੁਦਰਸ਼ਨ ਦੀਆਂ ਸ਼ਾਨਦਾਰ 168 ਦੌੜਾਂ ਅਤੇ ਦੇਵਦੱਤ ਪੱਡੀਕਲ, ਧਰੁਵ ਜੁਰੇਲ ਅਤੇ ਸਾਰਾਂਸ਼ ਜੈਨ (ਜੋ ਯਸ਼ ਠਾਕੁਰ ਦੇ ਨਾਲ ਬੱਲੇਬਾਜ਼ੀ ਕਰ ਰਿਹਾ ਸੀ) ਦੇ ਕੀਮਤੀ ਨੀਮ-ਸੈਂਕੜਿਆਂ ਦਾ ਅਹਿਮ ਯੋਗਦਾਨ ਰਿਹਾ। ਭਾਰਤ ‘ਏ’ ਦੇ ਵੱਡੇ ਸਕੋਰ ਨੇ ਮੈਚ ਦਾ ਰੁਖ਼ ਪਹਿਲਾਂ ਹੀ ਤੈਅ ਕਰ ਦਿੱਤਾ ਸੀ। ਉਪਰੰਤ ਗੁਰਨੂਰ ਬਰਾੜ ਨੇ ਮੋਰਚਾ ਸੰਭਾਲਿਆ, ਜਿਸ ਨੂੰ ਆਕਿਬ ਨਬੀ ਅਤੇ ਯਸ਼ ਠਾਕੁਰ ਦਾ ਸਾਥ ਮਿਲਿਆ। ਨਬੀ ਤੇ ਯਸ਼ ਨੇ ਇੱਕ-ਇੱਕ ਵਿਕਟ ਲਈ।
