ਹਾਕੀ: ਸਪੇਨ ਨੇ ਭਾਰਤ ਨੂੰ 2-0 ਨਾਲ ਹਰਾਇਆ

ਭਾਰਤੀ ਪੁਰਸ਼ ਹਾਕੀ ਟੀਮ ਦੀ ਐੱਫ ਆਈ ਐੱਚ ਪ੍ਰੋ ਲੀਗ ਵਿੱਚ ਵਾਪਸੀ ਦੀਆਂ ਉਮੀਦਾਂ ਨੂੰ ਅੱਜ ਉਸ ਵੇਲੇ ਵੱਡਾ ਝਟਕਾ ਲੱਗਾ, ਜਦੋਂ ਸਪੇਨ ਨੇ ਉਸ ਨੂੰ 0-2 ਨਾਲ ਹਰਾ ਦਿੱਤਾ। ਟੀਮ ਦੀ ਮਾੜੀ ਲੈਅ ਲਗਾਤਾਰ ਜਾਰੀ ਹੈ। ਹੁਣ ਭਾਰਤ ਦਾ ਅਗਲਾ ਮੁਕਾਬਲਾ ਐਤਵਾਰ ਨੂੰ ਹੋਬਾਰਟ ਗੇੜ ਦੇ ਦੂਜੇ ਮੈਚ ਵਿੱਚ ਮੇਜ਼ਬਾਨ ਆਸਟਰੇਲੀਆ ਨਾਲ ਹੋਵੇਗਾ। ਬੈਲਜੀਅਮ ਅਤੇ ਅਰਜਨਟੀਨਾ ਤੋਂ ਹਾਰਨ ਮਗਰੋਂ ਨਵੇਂ ਕਪਤਾਨ ਹਾਰਦਿਕ ਸਿੰਘ ਦੀ ਅਗਵਾਈ ਹੇਠ ਭਾਰਤੀ ਟੀਮ ਤੋਂ ਚੰਗੇ ਪ੍ਰਦਰਸ਼ਨ ਦੀ ਆਸ ਸੀ।

ਮੈਚ ਦੇ ਛੇਵੇਂ ਮਿੰਟ ਵਿੱਚ ਹੀ ਸਪੇਨ ਦੇ ਇਗਨਾਸੀਓ ਅਬਾਜੋ ਨੇ ਗੋਲ ਕਰ ਕੇ ਆਪਣੀ ਟੀਮ ਨੂੰ ਸ਼ੁਰੂਆਤੀ ਲੀਡ ਦਿਵਾ ਦਿੱਤੀ। ਮਗਰੋਂ ਭਾਰਤੀ ਖਿਡਾਰੀ ਅਭਿਸ਼ੇਕ ਨੇ ਬਰਾਬਰੀ ਲਈ ਜ਼ੋਰਦਾਰ ਸ਼ਾਟ ਲਾਇਆ, ਜਿਸ ਨੂੰ ਸਪੈਨਿਸ਼ ਗੋਲਕੀਪਰ ਲੁਈਸ ਕੈਲਜ਼ਾਡੋ ਨੇ ਰੋਕ ਦਿੱਤਾ। ਦੂਜੇ ਕੁਆਰਟਰ ਦੇ 24ਵੇਂ ਮਿੰਟ ਵਿੱਚ ਸਪੇਨ ਨੂੰ ਪੈਨਲਟੀ ਕਾਰਨਰ ਮਿਲਿਆ, ਜਿਸ ਨੂੰ ਭਾਰਤੀ ਗੋਲਕੀਪਰ ਸੂਰਜ ਕਰਕੇਰਾ ਨੇ ਨਾਕਾਮ ਕਰ ਦਿੱਤਾ। ਅੱਧੇ ਸਮੇਂ ਤੱਕ ਸਪੇਨ 1-0 ਨਾਲ ਅੱਗੇ ਸੀ।

ਦੂਜੇ ਅੱਧ ਵਿੱਚ ਵੀ ਸਪੇਨ ਦਾ ਹਮਲਾਵਰ ਰੁਖ ਜਾਰੀ ਰਿਹਾ। 36ਵੇਂ ਮਿੰਟ ਵਿੱਚ ਇਗਨਾਸੀਓ ਕੋਬੋਸ ਨੇ ਸਰਕਲ ਦੇ ਅੰਦਰੋਂ ਗੋਲ ਕਰ ਕੇ ਲੀਡ ਦੁੱਗਣੀ ਕਰ ਦਿੱਤੀ। ਸਪੇਨ ਨੇ ਲਗਾਤਾਰ ਦਬਾਅ ਬਣਾ ਕੇ ਰੱਖਿਆ ਅਤੇ ਤੀਜੇ ਕੁਆਰਟਰ ਦੇ ਅਖੀਰ ਵਿੱਚ ਪੰਜ ਪੈਨਲਟੀ ਕਾਰਨਰ ਹਾਸਲ ਕੀਤੇ, ਹਾਲਾਂਕਿ ਭਾਰਤੀ ਡਿਫੈਂਸ ਨੇ ਹੋਰ ਗੋਲ ਨਹੀਂ ਹੋਣ ਦਿੱਤਾ।