ਹਾਕੀ: ਐੱਫ ਸੀ ਆਈ ਦਿੱਲੀ ਤੇ ਆਈ ਟੀ ਬੀ ਪੀ ਜਲੰਧਰ ਜੇਤੂ

ਇੱਥੋਂ ਦੇ ਸੈਕਟਰ 63 ਦੇ ਬਲਬੀਰ ਸਿੰਘ ਸੀਨੀਅਰ ਕੌਮਾਂਤਰੀ ਹਾਕੀ ਸਟੇਡੀਅਮ ਵਿੱਚ ਚੱਲ ਰਹੇ ਪਹਿਲੇ ਆਲ ਇੰਡੀਆ ਮੁਹਾਲੀ ਗੋਲਡ ਕੱਪ ਪੁਰਸ਼ ਹਾਕੀ ਟੂਰਨਾਮੈਂਟ 2025 ਦੇ 5ਵੇਂ ਦਿਨ ਐੱਫ ਸੀ ਆਈ ਨਵੀਂ ਦਿੱਲੀ ਤੇ ਆਈ ਟੀ ਬੀ ਪੀ ਜਲੰਧਰ ਦੀਆਂ ਟੀਮਾਂ ਨੇ ਜਿੱਤਾਂ ਦਰਜ ਕੀਤੀਆਂ ਹਨ।

ਅੱਜ ਦੇ ਮੈਚਾਂ ਦੌਰਾਨ ਕਈ ਕੌਮਾਂਤਰੀ ਖਿਡਾਰੀਆਂ ਨੇ ਮਹਿਮਾਨ ਵਜੋਂ ਵਿਸ਼ੇਸ਼ ਤੌਰ ’ਤੇ ਸ਼ਿਰਕਤ ਕੀਤੀ। ਆਰ ਸੀ ਐੱਫ ਕਪੂਰਥਲਾ ਤੇ ਐੱਫ ਸੀ ਆਈ ਨਵੀਂ ਦਿੱਲੀ ਵਿਚਕਾਰ ਖੇਡੇ ਗਏ ਮੈਚ ਵਿੱਚ ਐੱਫ ਸੀ ਆਈ ਨੇ ਆਰ ਸੀ ਐਫ ਨੂੰ 4-1 ਦੇ ਫ਼ਰਕ ਨਾਲ ਹਰਾਇਆ।

ਇਸ ਮੌਕੇ ਜੇਤੂ ਟੀਮ ਦੇ ਖਿਡਾਰੀ ਪਰਮਵੀਰ ਸਿੰਘ ਨੂੰ ਪਲੇਅਰ ਆਫ ਦਿ ਮੈਚ ਐਲਾਨਿਆ ਗਿਆ। ਇਸੇ ਤਰਾਂ ਪੂਲ ਬੀ ਦੇ ਚੰਡੀਗੜ੍ਹ-ਇਲੈਵਨ ਤੇ ਆਈ ਟੀ ਬੀ ਪੀ ਜਲੰਧਰ ਵਿਚਕਾਰ ਅੱਜ ਖੇਡੇ ਗਏ ਦੂਜੇ ਮੈਚ ਵਿਚ ਜਲੰਧਰ ਨੇ ਚੰਡੀਗੜ੍ਹ-ਇਲੈਵਨ ਨੂੰ 2-1 ਗੋਲਾਂ ਦੇ ਫ਼ਰਕ ਨਾਲ ਮਾਤ ਦਿੱਤੀ। ਇਸ ਮੌਕੇ ਜੇਤੂ ਟੀਮ ਦੇ ਖਿਡਾਰੀ ਵਿਜੇ ਗੌੜ ਨੂੰ ਪਲੇਅਰ ਆਫ ਦਿ ਮੈਚ ਐਲਾਨਿਆ ਗਿਆ। 29 ਨਵੰਬਰ ਨੂੰ 2 ਸੈਮੀਫਾਈਨਲ ਮੈਚ ਕਰਵਾਏ ਜਾਣਗੇ, ਪਹਿਲਾ ਸੈਮੀਫਾਈਨਲ ਮੈਚ ਪੀ ਐੱਸ ਬੀ ਜਲੰਧਰ ਤੇ ਐੱਫ ਸੀ ਆਈ ਦਿੱਲੀ ਵਿਚਕਾਰ ਦੁਪਹਿਰ 1:30 ਵਜੇ ਖੇਡਿਆ ਜਾਵੇਗਾ, ਜਦ ਕਿ ਦੂਜਾ ਸੈਮੀਫਾਈਨਲ ਮੈਚ ਆਰਮੀ ਇਲੈਵਨ ਜਲੰਧਰ ਬਨਾਮ ਆਰ ਸੀ ਐੱਫ ਕਪੂਰਥਲਾ ਵਿਚਕਾਰ ਬਾਅਦ ਦੁਪਹਿਰ 3:00 ਵਜੇ ਖੇਡਿਆ ਜਾਵੇਗਾ।