ਹਾਕੀ: ਆਸਟਰੇਲੀਆ ਨੇ ਭਾਰਤ ਨੂੰ ਪੈਨਲਟੀ ਸ਼ੂਟਆਊਟ ’ਚ ਹਰਾਇਆ

ਭਾਰਤੀ ਪੁਰਸ਼ ਹਾਕੀ ਟੀਮ ਸ਼ਾਨਦਾਰ ਪ੍ਰਦਰਸ਼ਨ ਦੇ ਬਾਵਜੂਦ ਅੱਜ ਇੱਥੇ ਐੱਫ ਆਈ ਐੱਚ ਪ੍ਰੋ ਲੀਗ ਮੁਕਾਬਲੇ ਵਿੱਚ ਆਸਟਰੇਲੀਆ ਖ਼ਿਲਾਫ਼ ਪੈਨਲਟੀ ਸ਼ੂਟਆਊਟ ਵਿੱਚ ਹਾਰ ਗਈ। ਤੈਅ ਸਮੇਂ ਤੱਕ ਦੋਵੇਂ ਟੀਮਾਂ 2-2 ਗੋਲਾਂ ਨਾਲ ਬਰਾਬਰ ਰਹੀਆਂ। ਆਸਟਰੇਲੀਆ ਨੇ ਦੋ ਗੋਲ ਪੱਛੜਨ ਮਗਰੋਂ ਆਖ਼ਰੀ ਕੁਆਰਟਰ ਵਿੱਚ ਸ਼ਾਨਦਾਰ ਵਾਪਸੀ ਕੀਤੀ ਅਤੇ ਫਿਰ ਸ਼ੂਟਆਊਟ ਵਿੱਚ ਭਾਰਤ ’ਤੇ 5-4 ਗੋਲਾਂ ਨਾਲ ਜਿੱਤ ਦਰਜ ਕੀਤੀ। ਭਾਰਤ ਵੱਲੋਂ ਅਮਿਤ ਰੋਹਿਦਾਸ (15ਵੇਂ ਮਿੰਟ) ਅਤੇ ਜੁਗਰਾਜ ਸਿੰਘ (43ਵੇਂ) ਨੇ ਗੋਲ ਦਾਗ ਕੇ ਟੀਮ ਨੂੰ ਲੀਡ ਦਿਵਾਈ। ਆਸਟਰੇਲੀਆ ਦੇ ਜੋਏਲ ਰਿੰਟਾਲਾ (47ਵੇਂ ਤੇ 56ਵੇਂ ਮਿੰਟ) ਨੇ ਦੋ ਗੋਲ ਕਰ ਕੇ ਮੁਕਾਬਲੇ ਨੂੰ ਬਰਾਬਰੀ ’ਤੇ ਲਿਆਂਦਾ।

ਮੁਕਾਬਲੇ ਦੇ ਸ਼ੁਰੂ ਵਿੱਚ ਆਸਟਰੇਲੀਆ ਨੇ ਗੇਂਦ ’ਤੇ ਕਾਬੂ ਪਾਉਂਦਿਆਂ ਭਾਰਤੀ ਖਿਡਾਰੀਆਂ ਦੇ ਖੇਤਰ ਵਿੱਚ ਦਬਦਬਾ ਬਣਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਭਾਰਤੀ ਡਿਫੈਂਸ ਨੇ ਧੀਰਜ ਰੱਖਿਆ ਅਤੇ ਵਾਪਸੀ ਕਰਦਿਆਂ ਆਸਟਰੇਲੀਆ ’ਤੇ ਦਬਾਅ ਬਣਾਇਆ। ਇਹ ਨਤੀਜਾ ਅਜਿਹੇ ਸਮੇਂ ਆਇਆ ਹੈ, ਜਦੋਂ ਭਾਰਤ ਇਸ ਸਾਲ ਐੱਫ ਆਈ ਐੱਚ ਪ੍ਰੋ ਲੀਗ ਵਿੱਚ ਲਗਾਤਾਰ ਪੰਜ ਮੁਕਾਬਲੇ ਹਾਰ ਚੁੱਕਾ ਸੀ। ਭਾਰਤੀ ਟੀਮ ਹੋਬਾਰਟ ਗੇੜ ਦੇ ਆਪਣੇ ਪਹਿਲੇ ਮੁਕਾਬਲੇ ਵਿੱਚ ਸ਼ਨਿਚਰਵਾਰ ਨੂੰ ਸਪੇਨ ਤੋਂ 0-2 ਨਾਲ ਹਾਰ ਗਈ ਸੀ। ਭਾਰਤ ਹੁਣ ਹੋਬਾਰਟ ਗੇੜ ਦੇ ਆਪਣੇ ਤੀਜੇ ਮੁਕਾਬਲੇ ਵਿੱਚ ਮੰਗਲਵਾਰ ਨੂੰ ਸਪੇਨ ਨਾਲ ਭਿੜੇਗਾ।