Gulveer Singh ਨੇ ਪੰਜ ਹਜ਼ਾਰ ਮੀਟਰ ਦੌੜ ’ਚ National Record ਬਣਾਇਆ
ਲਾਸ ਏਂਜਲਸ ’ਚ ਹੋਏ ਟੂਰਨਾਮੈਂਟ ਵਿੱਚ ਦੂਜਾ ਸਥਾਨ ਹਾਸਲ ਕੀਤਾ
ਭਾਰਤ ਦੇ ਲੰਮੀ ਦੂਰੀ ਦੇ ਸਿਖਰਲੇ ਦੌੜਾਕ ਗੁਲਵੀਰ ਸਿੰਘ ਨੇ ਲਾਸ ਏਂਜਲਸ ’ਚ ਕਰਵਾਏ ਗਏ ਐੱਲ ਏ ਟਰੈਕ ਫੈਸਟ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਪੁਰਸ਼ਾਂ ਦੀ ਪੰਜ ਹਜ਼ਾਰ ਮੀਟਰ ਦੌਰ ’ਚ ਨਵਾਂ ਆਊਟਡੋਰ ਕੌਮੀ ਰਿਕਾਰਡ ਕਾਇਮ ਕਰਦਿਆਂ ਦੂਜਾ ਸਥਾਨ ਹਾਸਲ ਕੀਤਾ ਹੈ। ਵਰਲਡ ਐਥਲੈਟਿਕਸ ਕੌਂਟੀਨੈਂਟਲ ਟੂਰ ਸਿਵਲਰ ਪੱਧਰ ਦੇ ਇਸ ਮੁਕਾਬਲੇ ’ਚ ਗੁਲਵੀਰ ਨੇ 13 ਮਿੰਟ 03.93 ਸਕਿੰਟ ਦਾ ਸਮਾਂ ਲਿਆ।
ਇਸ ਦੇ ਨਾਲ ਹੀ ਉਸ ਨੇ ਆਪਣੇ ਹੀ ਆਊਟਡੋਰ ਕੌਮੀ ਰਿਕਾਰਡ 13:11:82 ’ਚ ਸੁਧਾਰ ਕੀਤਾ ਹੈ। ਇਸ 27 ਸਾਲਾ ਦੌੜਾਕ ਨੇ ਪਿਛਲੇ ਸਾਲ ਬੋਸਟਨ ’ਚ ਟੈਰੀਅਰ ਡੀ ਐੱਮ ਆਰ ਚੈਂਲੇਂਜ ਇਨਡੋਰ ਮੁਕਾਬਲੇ ’ਚ 12 ਮਿੰਟ 59.77 ਸਕਿੰਟ ਦਾ ਸਮਾਂ ਕੱਢਿਆ ਸੀ ਜੋ ਪੰਜ ਹਜ਼ਾਰ ਮੀਟਰ ’ਚ ਉਸ ਦਾ ਓਵਰਆਲ ਕੌਮੀ ਰਿਕਾਰਡ ਬਣਿਆ ਹੋਇਆ ਹੈ।
ਲਾਸ ਏਂਜਲਸ ’ਚ ਦਰਜ ਕੀਤਾ ਗਿਆ ਸਮਾਂ ਉਸ ਦੇ ਕਰੀਅਰ ਦਾ ਦੂਜਾ ਸਰਵੋਤਮ ਪ੍ਰਦਰਸ਼ਨ ਰਿਹਾ। ਐੱਲ ਏ ਟਰੈਕ ਫੈਸਟ ’ਚ ਹੈਬਟੋਮ ਸੈਮੁਅਲ ਨੇ 12:57:23 ਦੇ ਸਮੇਂ ਨਾਲ ਪਹਿਲਾ ਸਥਾਨ ਹਾਸਲ ਕੀਤਾ। ਗੁਲਵੀਰ ਮੌਜੂਦਾ ਏਸ਼ਿਆਈ ਚੈਂਪੀਅਨ ਵੀ ਹੈ ਅਤੇ ਉਸ ਦੇ ਨਾਂ 10 ਹਜ਼ਾਰ ਮੀਟਰ ਅਤੇ ਹਾਫ ਮੈਰਾਥਨ ਦੇ ਕੌਮੀ ਰਿਕਾਰਡ ਵੀ ਦਰਜ ਹਨ।
