FIFA World Cup 2026 Results: ਬੈਲਜੀਅਮ ਨੇ ਨਿਊਜ਼ੀਲੈਂਡ ਨੂੰ 5-1 ਨਾਲ ਹਰਾਇਆ

ਬੈਲਜੀਅਮ ਨੇ ਲਿਐਂਡਰੋ ਟ੍ਰੋਸਾਰਡ ਦੇ ਦੋ ਸ਼ਾਨਦਾਰ ਗੋਲਾਂ ਦੀ ਬਦੌਲਤ ਨਿਊਜ਼ੀਲੈਂਡ ’ਤੇ 5-1 ਦੀ ਸ਼ਾਨਦਾਰ ਜਿੱਤ ਦਰਜ ਕੀਤੀ। ਇਸ ਜਿੱਤ ਨਾਲ ਬੈਲਜੀਅਮ ਦੀ ਟੀਮ ਗਰੁੱਪ ‘ਜੀ’ ਵਿੱਚ ਸਿਖਰ ’ਤੇ ਰਹਿੰਦਿਆਂ ਨੌਕਆਊਟ ਗੇੜ ਵਿੱਚ ਪਹੁੰਚ ਗਈ ਹੈ। ਬੈਲਜੀਅਮ ਦਾ ਮੁਕਾਬਲਾ ਹੁਣ ਬੁੱਧਵਾਰ ਨੂੰ ਸਿਆਟਲ ਵਿੱਚ ਤੀਜੇ ਸਥਾਨ ’ਤੇ ਰਹਿਣ ਵਾਲੀ ਟੀਮ (ਜਿਸ ਦਾ ਫੈਸਲਾ ਹੋਣਾ ਅਜੇ ਬਾਕੀ ਹੈ) ਨਾਲ ਹੋਵੇਗਾ। ਇਹ ਮੈਚ ਸਿਆਟਲ ਵਿੱਚ ਹੀ ਗਰੁੱਪ ਦੇ ਦੂਜੇ ਆਖਰੀ ਮੁਕਾਬਲੇ ਦੇ ਨਾਲ-ਨਾਲ ਖੇਡਿਆ ਜਾ ਰਿਹਾ ਸੀ, ਜੋ ਕਿ ਮਿਸਰ ਅਤੇ ਇਰਾਨ ਵਿਚਕਾਰ 1-1 ਦੀ ਬਰਾਬਰੀ ’ਤੇ ਖ਼ਤਮ ਹੋਇਆ। ਇਸ ਡਰਾਅ ਕਾਰਨ ਮਿਸਰ ਦੀ ਟੀਮ ਪਹਿਲੇ ਸਥਾਨ ਤੋਂ ਖਿਸਕ ਗਈ ਹੈ।

ਇਸੇ ਤਰ੍ਹਾਂ ਆਲਮੀ ਕੱਪ ਦੇ ਇਕ ਹੋਰ ਮੈਚ ਵਿੱਚ ਉਰੂਗੁਏ ਦੇ ਗੋਲਕੀਪਰ ਫਰਨਾਂਡੋ ਮੁਸਲੇਰਾ ਦੀ ਇੱਕ ਹੋਰ ਵੱਡੀ ਗਲਤੀ ਕਾਰਨ ਸਪੇਨ ਨੇ ਉਰੂਗੁਏ ਨੂੰ 1-0 ਨਾਲ ਹਰਾ ਦਿੱਤਾ। ਇਸ ਜਿੱਤ ਨਾਲ ਸਪੇਨ ਵਿਸ਼ਵ ਕੱਪ ਦੇ ਨੌਕਆਊਟ ਗੇੜ ਵਿੱਚ ਦਾਖਲ ਹੋ ਗਿਆ ਹੈ, ਜਦਕਿ ਦੱਖਣੀ ਅਮਰੀਕਾ ਦੀ ਇਸ ਮਜ਼ਬੂਤ ਟੀਮ (ਉਰੂਗੁਏ) ਦਾ ਸਫਰ ਖ਼ਤਮ ਹੋ ਗਿਆ ਹੈ। ਦੋ ਵਾਰ ਦੀ ਵਿਸ਼ਵ ਚੈਂਪੀਅਨ ਰਹੀ ਉਰੂਗੁਏ ਦੀ ਟੀਮ ਗਰੁੱਪ ‘ਐੱਚ’ ਦੇ ਆਪਣੇ ਤਿੰਨਾਂ ਮੈਚਾਂ ਵਿੱਚੋਂ ਇੱਕ ਵੀ ਜਿੱਤੇ ਬਿਨਾਂ ਘਰ ਪਰਤ ਰਹੀ ਹੈ। ਦੂਜੇ ਪਾਸੇ, ਮੌਜੂਦਾ ਯੂਰੋਪੀਅਨ ਚੈਂਪੀਅਨ ਸਪੇਨ ਨੇ ਸੱਤ ਅੰਕਾਂ ਨਾਲ ਆਪਣੇ ਗਰੁੱਪ ਵਿੱਚ ਪਹਿਲਾ ਸਥਾਨ ਹਾਸਲ ਕੀਤਾ ਹੈ। ਹੁਣ ਵੀਰਵਾਰ ਨੂੰ ਇੰਗਲਵੁੱਡ (ਕੈਲੀਫੋਰਨੀਆ) ਵਿੱਚ ਸਪੇਨ ਦਾ ਮੁਕਾਬਲਾ ਗਰੁੱਪ ‘ਜੇ’ ਵਿੱਚ ਦੂਜੇ ਸਥਾਨ ’ਤੇ ਰਹਿਣ ਵਾਲੀ ਟੀਮ ਆਸਟਰੀਆ ਜਾਂ ਅਲਜੀਰੀਆ ਵਿੱਚੋਂ ਕਿਸੇ ਇੱਕ ਨਾਲ ਹੋਵੇਗਾ।

ਇਸੇ ਦੌਰਾਨ ਇਕ ਹੋਰ ਮੈਚ ਵਿੱਚ ਛੋਟੇ ਜਿਹੇ ਦੇਸ਼ ਕੇਪ ਵਰਡੇ ਨੇ ਸਾਰੀਆਂ ਉਮੀਦਾਂ ਦੇ ਉਲਟ ਜਾ ਕੇ ਵਿਸ਼ਵ ਕੱਪ ਦੇ ਨੌਕਆਊਟ ਗੇੜ ਵਿੱਚ ਜਗ੍ਹਾ ਬਣਾਉਣ ਵਾਲਾ ਸਭ ਤੋਂ ਛੋਟਾ ਦੇਸ਼ ਬਣਨ ਦਾ ਮਾਣ ਹਾਸਲ ਕੀਤਾ ਹੈ। ਇਸ ਸਫਲਤਾ ਦੇ ਪਿੱਛੇ ਉਨ੍ਹਾਂ ਦੇ 40 ਸਾਲਾ ਤਜਰਬੇਕਾਰ ਗੋਲਕੀਪਰ ਵੋਜ਼ਿਨਹਾ ਦਾ ਸ਼ਾਨਦਾਰ ਪ੍ਰਦਰਸ਼ਨ ਰਿਹਾ, ਜੋ ਆਪਣੇ ਦੇਸ਼ ਦੇ ਜਜ਼ਬੇ ਦੀ ਜਿਉਂਦੀ-ਜਾਗਦੀ ਮਿਸਾਲ ਬਣ ਕੇ ਉੱਭਰਿਆ। ਕੇਪ ਵਰਡੇ ਨੇ ਸ਼ੁੱਕਰਵਾਰ ਰਾਤ ਨੂੰ ਸਊਦੀ ਅਰਬ ਵਿਰੁੱਧ ਖੇਡਿਆ ਮੁਕਾਬਲਾ 0-0 ਨਾਲ ਡਰਾਅ ਰੱਖਿਆ। ਵਿਸ਼ਵ ਕੱਪ ਵਿੱਚ ਲਗਾਤਾਰ ਤੀਜਾ ਮੈਚ ਡਰਾਅ ਖੇਡ ਕੇ ਟੀਮ ਨੇ ਗਰੁੱਪ ਪੜਾਅ ਦੇ ਇਸ ਅਸੰਭਵ ਲੱਗਣ ਵਾਲੇ ਸਫ਼ਰ ਨੂੰ ਸਫ਼ਲਤਾਪੂਰਵਕ ਪੂਰਾ ਕੀਤਾ ਅਤੇ ਟੂਰਨਾਮੈਂਟ ਦੇ ਅਗਲੇ ਗੇੜ ਵਿੱਚ ਦਾਖਲ ਹੋ ਗਿਆ।

ਇਸੇ ਤਰ੍ਹਾਂ ਆਲਮੀ ਕੱਪ ਦੇ ਇਕ ਹੋਰ ਮੈਚ ਵਿੱਚ ਸੈਨੇਗਲ ਨੇ ਇਰਾਕ ਨੂੰ 5-0 ਨਾਲ ਹਰਾਇਆ। ਸੈਨੇਗਲ ਨੇ ਸ਼ੁੱਕਰਵਾਰ ਨੂੰ 10 ਖਿਡਾਰੀਆਂ ਨਾਲ ਖੇਡ ਰਹੀ ਇਰਾਕ ਦੀ ਟੀਮ ਖ਼ਿਲਾਫ਼ ਗੋਲਾਂ ਦੀ ਬਾਰਿਸ਼ ਕਰਦਿਆਂ 5-0 ਨਾਲ ਸ਼ਾਨਦਾਰ ਜਿੱਤ ਦਰਜ ਕੀਤੀ। ਇਸ ਵੱਡੀ ਜਿੱਤ ਨਾਲ ਸੈਨੇਗਲ ਦੀ ਆਲਮੀ ਕੱਪ ਦੇ ਨੌਕਆਊਟ ਗੇੜ ਵਿੱਚ ਪਹੁੰਚਣ ਦੀਆਂ ਉਮੀਦਾਂ ਕਾਫੀ ਮਜ਼ਬੂਤ ਹੋ ਗਈਆਂ ਹਨ।