Durand Cup: ਨੇਰੋਕਾ ਨੇ ਰੇਂਗਦਾਈ ਨੂੰ 3-1 ਨਾਲ ਹਰਾਇਆ

ਨੇਰੋਕਾ ਐੱਫ ਸੀ ਨੇ ਅੱਜ ਇੱਥੇ 135ਵੇਂ ਡੂਰੰਡ ਕੱਪ ਦੇ ਗਰੁੱਪ ਡੀ ਮੁਕਾਬਲੇ ਵਿੱਚ ਪੱਛੜਨ ਮਗਰੋਂ ਸ਼ਾਨਦਾਰ ਵਾਪਸੀ ਕਰਦਿਆਂ 9 ਖਿਡਾਰੀਆਂ ਨਾਲ ਖੇਡ ਰਹੀ ਐੱਫ ਸੀ ਰੇਂਗਦਾਈ ਨੂੰ 3-1 ਨਾਲ ਹਰਾ ਦਿੱਤਾ। ਜਿੱਤ ਦੇ ਬਾਵਜੂਦ ਨੇਰੋਕਾ ਦੀ ਟੂਰਨਾਮੈਂਟ ਵਿੱਚ ਮੁਹਿੰਮ...

PTI

ਇੰਫਾਲ, 02:31 AM Aug 13, 2026 IST

ਗੇਂਦ ’ਤੇ ਕਬਜ਼ੇ ਦੀ ਕੋਸ਼ਿਸ਼ ਕਰਦੇ ਹੋਏ ਦੋਹਾਂ ਟੀਮਾਂ ਦੇ ਖਿਡਾਰੀ।

ਮੈਚ ਦੇ 19ਵੇਂ ਮਿੰਟ ਵਿੱਚ ਜੋਨਾਹ ਕਾਮੇਈ ਨੇ ਗੋਲ ਕਰ ਕੇ ਰੇਂਗਦਾਈ ਨੂੰ ਲੀਡ ਦਿਵਾਈ ਸੀ ਪਰ 8 ਮਿੰਟ ਮਗਰੋਂ ਥੌਦਮ ਨਾਨੀ ਸਿੰਘ ਨੇ ਆਤਮਘਾਤੀ ਗੋਲ ਕਰ ਕੇ ਸਕੋਰ 1-1 ਨਾਲ ਬਰਾਬਰ ਕਰ ਦਿੱਤਾ। 55ਵੇਂ ਮਿੰਟ ਵਿੱਚ ਪੀ ਐੱਮ ਰਾਕੇਵੇਈਚੇ ਨੂੰ ਖ਼ਤਰਨਾਕ ਖੇਡ ਕਾਰਨ ਲਾਲ ਕਾਰਡ ਮਿਲਿਆ ਤੇ 3 ਮਿੰਟ ਬਾਅਦ ਸੋਰੈਸ਼ਮ ਸੁਰਜਕਾਂਤ ਸਿੰਘ ਨੂੰ ਦੂਜਾ ਪੀਲਾ ਕਾਰਡ ਮਿਲਣ ਕਾਰਨ ਬਾਹਰ ਜਾਣਾ ਪਿਆ। ਇਸ ਤਰ੍ਹਾਂ ਰੇਂਗਦਾਈ ਦੀ ਟੀਮ ਬਾਕੀ ਮੈਚ ਸਿਰਫ 9 ਖਿਡਾਰੀਆਂ ਨਾਲ ਖੇਡੀ।

ਨੇਰੋਕਾ ਨੇ ਇਸ ਦਾ ਪੂਰਾ ਲਾਹਾ ਲੈਂਦਿਆਂ ਆਖ਼ਰੀ ਮਿੰਟਾਂ ਵਿੱਚ ਹਮਲੇ ਤੇਜ਼ ਕਰ ਦਿੱਤੇ। ਮੈਚ ਦੇ 89ਵੇਂ ਮਿੰਟ ਵਿੱਚ ਬਦਲਵੇਂ ਖਿਡਾਰੀ ਵਜੋਂ ਉਤਰੇ ਚਬੁੰਗਬਾਮ ਲਿੰਕੀ ਮੈਤੇਈ ਨੇ ਹੈਡਰ ਰਾਹੀਂ ਗੋਲ ਕਰ ਕੇ ਟੀਮ ਨੂੰ ਅੱਗੇ ਕਰ ਦਿੱਤਾ। ਇਸ ਤੋਂ ਬਾਅਦ ਯੁਮਨਾਮ ਰੇਨੇਡੀ ਮੈਤੇਈ ਨੇ ਹੋਰ ਗੋਲ ਕਰ ਕੇ 3-1 ਨਾਲ ਟੀਮ ਦੀ ਜਿੱਤ ਪੱਕੀ ਕਰ ਦਿੱਤੀ।

ਇਸ ਤਰ੍ਹਾਂ ਨੇਰੋਕਾ ਨੇ 3 ਮੈਚਾਂ ’ਚ 4 ਅੰਕਾਂ ਨਾਲ ਆਪਣਾ ਸਫ਼ਰ ਖ਼ਤਮ ਕੀਤਾ। ਉਧਰ 6 ਅੰਕਾਂ ਨਾਲ ਰੇਂਗਦਾਈ ਦੀ ਟੀਮ ਪਹਿਲਾਂ ਹੀ ਕੁਆਰਟਰ ਫਾਈਨਲ ਵਿੱਚ ਪਹੁੰਚ ਚੁੱਕੀ ਹੈ। ਰੇਂਗਦਾਈ ਦੇ ਫਾਰਵਰਡ ਮਿਦੁਲ ਨੂੰ ਗਰੁੱਪ ਡੀ ਦਾ ਉੱਭਰਦਾ ਖਿਡਾਰੀ ਚੁਣਿਆ ਗਿਆ ਅਤੇ 1 ਲੱਖ ਰੁਪਏ ਦਾ ਇਨਾਮ ਦਿੱਤਾ ਗਿਆ।

Tags :