ਜੋਕੋਵਿਚ ਤੇ ਅਲਕਰਾਜ਼ ’ਚ ਹੋਵੇਗਾ ਖਿਤਾਬੀ ਮੁਕਾਬਲਾ

ਕਾਰਲੋਸ ਅਲਕਰਾਜ਼ ਅਤੇ ਨੋਵਾਕ ਜੋਕੋਵਿਚ ਐਤਵਾਰ ਨੂੰ ਆਸਟਰੇਲੀਅਨ ਓਪਨ ਦੇ ਫਾਈਨਲ ਵਿੱਚ ਇੱਕ-ਦੂਜੇ ਦੇ ਆਹਮੋ-ਸਾਹਮਣੇ ਹੋਣਗੇ। ਦੋਵਾਂ ਖਿਡਾਰੀਆਂ ਨੇ ਅੱਜ ਪੰਜ ਸੈੱਟਾਂ ਤੱਕ ਚੱਲੇ ਰੋਮਾਂਚਕ ਸੈਮੀਫਾਈਨਲ ਮੁਕਾਬਲਿਆਂ ਵਿੱਚ ਜਿੱਤ ਦਰਜ ਕੀਤੀ। ਦੁਨੀਆ ਦੇ ਨੰਬਰ ਇੱਕ ਖਿਡਾਰੀ ਕਾਰਲੋਸ ਅਲਕਰਾਜ਼ ਨੇ ਜਰਮਨੀ ਦੇ ਅਲੈਗਜ਼ੈਂਡਰ ਜ਼ਵੈਰੇਵ ਨੂੰ 6-4, 7-6, 6-7, 6-7, 7-5 ਨਾਲ ਹਰਾਇਆ। ਇਹ ਮੈਚ 5 ਘੰਟੇ ਅਤੇ 27 ਮਿੰਟ ਤੱਕ ਚੱਲਿਆ ਜੋ ਕਿ ਆਸਟਰੇਲੀਅਨ ਓਪਨ ਦੇ ਇਤਿਹਾਸ ਦਾ ਸਭ ਤੋਂ ਲੰਮਾ ਸੈਮੀਫਾਈਨਲ ਬਣ ਗਿਆ ਹੈ। 24 ਵਾਰ ਦੇ ਗ੍ਰੈਂਡ ਸਲੈਮ ਜੇਤੂ ਨੋਵਾਕ ਜੋਕੋਵਿਚ ਨੇ ਮੌਜੂਦਾ ਚੈਂਪੀਅਨ ਜਾਨਿਕ ਸਿਨਰ ਨੂੰ 3-6, 6-3, 4-6, 6-4, 6-4 ਨਾਲ ਮਾਤ ਦਿੱਤੀ। ਅਲਕਰਾਜ਼ ਪਹਿਲੀ ਵਾਰ ਮੈਲਬਰਨ ਪਾਰਕ ਵਿੱਚ ਫਾਈਨਲ ਖੇਡਣਗੇ। ਜੇਕਰ ਉਹ ਜਿੱਤ ਜਾਂਦੇ ਹਨ, ਤਾਂ ਉਹ ਕਰੀਅਰ ਗ੍ਰੈਂਡ ਸਲੈਮ, ਚਾਰੇ ਮੁੱਖ ਟੂਰਨਾਮੈਂਟ ਜਿੱਤਣ ਵਾਲੇ ਸਭ ਤੋਂ ਘਟ ਉਮਰ ਦੇ ਖਿਡਾਰੀ ਬਣ ਜਾਣਗੇ।

ਮਿਕਸਡ ਡਬਲਜ਼ ’ਚ ਗਾਡੇਕੀ ਤੇ ਪੀਅਰਸ ਦੀ ਜੋੜੀ ਜੇਤੂ

ਓਲੀਵੀਆ ਗਾਡੇਕੀ ਅਤੇ ਜੌਨ ਪੀਅਰਸ ਦੀ ਆਸਟਰੇਲੀਆਈ ਜੋੜੀ ਨੇ ਫਰਾਂਸ ਦੀ ਕ੍ਰਿਸਟੀਨਾ ਮਲਾਡੇਨੋਵਿਕ ਅਤੇ ਮੈਨੁਅਲ ਗੁਇਨਾਰਡ ਨੂੰ 4-6, 6-3, 10-8 ਨਾਲ ਹਰਾ ਕੇ ਆਸਟਰੇਲੀਅਨ ਓਪਨ ਮਿਕਸਡ ਡਬਲਜ਼ ਦਾ ਖਿਤਾਬ ਆਪਣੇ ਨਾਂ ਕੀਤਾ। ਉਹ 1989 ਤੋਂ ਬਾਅਦ ਲਗਾਤਾਰ ਦੋ ਵਾਰ ਆਸਟਰੇਲੀਅਨ ਓਪਨ ਮਿਕਸਡ ਡਬਲਜ਼ ਖਿਤਾਬ ਜਿੱਤਣ ਵਾਲੀ ਪਹਿਲੀ ਟੀਮ ਬਣ ਗਈ ਹੈ। ਫਾਈਨਲ ਸੈੱਟ ਵਿੱਚ ਆਸਟਰੇਲੀਆਈ ਜੋੜੀ ਇੱਕ ਸਮੇਂ 7-5 ਨਾਲ ਪਿੱਛੇ ਸੀ, ਪਰ ਉਨ੍ਹਾਂ ਨੇ ਸ਼ਾਨਦਾਰ ਵਾਪਸੀ ਕਰਦੇ ਹੋਏ 9-7 ਦੀ ਲੀਡ ਬਣਾਈ।