ਸਬ ਜੂਨੀਅਰ ਕੌਮੀ ਮੁਕਾਬਲਿਆਂ ਲਈ ਦਿਲਪ੍ਰੀਤ ਦੀ ਚੋਣ
ਭੋਤਨਾ ਖੇਡ ਮੈਦਾਨ ਤੋਂ ਸ਼ੁਰੂ ਹੋਇਆ ਖਿਡਾਰਨ ਦਾ ਕੌਮੀ ਸਫ਼ਰ
ਮਜ਼ਦੂਰ ਪਰਿਵਾਰ ਦੀ ਧੀ ਦਿਲਪ੍ਰੀਤ ਕੌਰ (16) ਦੀ ਰਾਂਚੀ ਵਿੱਚ 1 ਅਪਰੈਲ ਤੋਂ ਸ਼ੁਰੂ ਹੋ ਰਹੀ ਸਬ-ਜੂਨੀਅਰ (ਅੰਡਰ-17) ਕੌਮੀ ਹਾਕੀ ਚੈਂਪੀਅਨਸ਼ਿਪ ਲਈ ਚੋਣ ਹੋਈ ਹੈ। ਉਹ ਪੰਜਾਬ ਦੀ ਟੀਮ ਵੱਲੋਂ ਇਹ ਟੂਰਨਾਮੈਂਟ ਖੇਡੇਗੀ। ਪੰਜਾਬ ਦੀ ਕੁੱਲ 18 ਮੈਂਬਰੀ ਟੀਮ ਆਪਣੇ ਪੂਲ ਵਿੱਚ ਉੜੀਸਾ ਅਤੇ ਅਰੁਣਾਚਲ ਪ੍ਰਦੇਸ਼ ਨਾਲ ਮੁਕਾਬਲਾ ਕਰੇਗੀ। ਇਸ ਤੋਂ ਪਹਿਲਾਂ ਵੀ ਦਿਲਪ੍ਰੀਤ ਦਿੱਲੀ ਅਤੇ ਪਾਣੀਪਤ ਵਿੱਚ ਕੌਮੀ ਖੇਡ ਮੁਕਾਬਲਿਆਂ ’ਚ ਖੇਡ ਚੁੱਕੀ ਹੈ।
ਦਿਲਪ੍ਰੀਤ ਹਲਕਾ ਮਹਿਲ ਕਲਾਂ ਦੇ ਪਿੰਡ ਭੋਤਨਾ ਦੇ ਮਜ਼ਦੂਰ ਪਰਿਵਾਰ ਦੀ ਧੀ ਹੈ। ਕਰੀਬ ਚਾਰ ਸਾਲ ਪਹਿਲਾਂ ਪਿੰਡ ਬਾਦਲ ਵਿੱਚ ਪੰਜਾਬ ਸਟੇਟ ਇੰਸਟੀਚਿਊਟ ਆਫ ਸਪੋਰਟਸ ਦੀ ਹਾਕੀ ਅਕੈਡਮੀ ਲਈ ਉਸ ਦੀ ਚੋਣ ਹੋਈ ਸੀ। ਇਸ ਵੇਲੇ ਦਿਲਪ੍ਰੀਤ 10ਵੀਂ ਦੀ ਪੜ੍ਹਾਈ ਦੇ ਨਾਲ-ਨਾਲ ਹਾਕੀ ਦੀ ਸਿਖਲਾਈ ਲੈ ਰਹੀ ਹੈ। ਦਿਲਪ੍ਰੀਤ ਨੇ 12 ਸਾਲ ਦੀ ਉਮਰ ਵਿੱਚ ਪਿੰਡ ਭੋਤਨਾ ਦੇ ਖੇਡ ਮੈਦਾਨ ਤੋਂ ਹਾਕੀ ਖੇਡਣੀ ਸ਼ੁਰੂ ਕੀਤੀ ਅਤੇ ਇੱਕ ਸਾਲ ਬਾਅਦ ਹੀ ਉਹ ਅਕੈਡਮੀ ਲਈ ਚੁਣੀ ਗਈ। ਉਹ ਫਾਰਵਰਡ ਲਾਈਨ ’ਤੇ ਰਾਈਟ ਇਨ ਪੁਜ਼ੀਸ਼ਨ ’ਤੇ ਖੇਡਦੀ ਹੈ।
ਦਿਲਪ੍ਰੀਤ ਦੇ ਪਿਤਾ ਕੁਲਵਿੰਦਰ ਸਿੰਘ ਤੇ ਮਾਤਾ ਜਸਵੀਰ ਕੌਰ ਮਜ਼ਦੂਰੀ ਕਰਦੇ ਹਨ ਅਤੇ ਉਨ੍ਹਾਂ ਧੀ ਨੂੰ ਖੇਡਣ ਦੀ ਖੁੱਲ੍ਹ ਦਿੱਤੀ। ਜ਼ਿਕਰਯੋਗ ਹੈ ਕਿ ਪਿੰਡ ਭੋਤਨਾ ’ਚ ਪਿਛਲੇ ਕੁਝ ਸਾਲਾਂ ਤੋਂ ਬਿਨਾਂ ਕਿਸੇ ਸਰਕਾਰੀ ਮਦਦ ਤੋਂ ਹਾਕੀ ਦਾ ਖੇਡ ਮੈਦਾਨ ਚੱਲ ਰਿਹਾ ਹੈ। ਇਸ ਮੈਦਾਨ ਤੋਂ ਦਿਲਪ੍ਰੀਤ ਸਣੇ 4 ਕੁੜੀਆਂ ਅਤੇ 7 ਲੜਕਿਆਂ ਦੀ ਚੋਣ ਵੱਖ-ਵੱਖ ਹਾਕੀ ਅਕੈਡਮੀਆਂ ਲਈ ਹੋਈ ਹੈ। ਪ੍ਰਬੰਧਕ ਇਸ ਪ੍ਰਾਪਤੀ ਨੂੰ ਮਿਹਨਤ ਦਾ ਫਲ ਦੱਸ ਰਹੇ ਹਨ।
