Deepak Asian Games: ਭਾਰਤੀ ਪਹਿਲਵਾਨ ਦੀਪਕ ਡੋਪ ਟੈਸਟ ਵਿੱਚ ਫੇਲ੍ਹ
ਕਲੋਮੀਫ਼ਿਨ ਪਾਜ਼ੇਟਿਵ ਆਉਣ ਕਾਰਨ ਏਸ਼ੀਅਨ ਗੇਮਜ਼ ਵਿਚੋਂ ਬਾਹਰ; ਭਾਰਤੀ ਕੁਸ਼ਤੀ ਨੂੰ ਵੱਡਾ ਝਟਕਾ
Deepak Asian Games: ਭਾਰਤੀ ਕੁਸ਼ਤੀ ਲਈ ਅੱਜ ਦਾ ਦਿਨ ਨਮੋਸ਼ੀਜਨਕ ਰਿਹਾ। ਏਸ਼ਿਆਈ ਖੇਡਾਂ ਵਿੱਚ ਹਿੱਸਾ ਲੈਣ ਵਾਲੇ ਗ੍ਰੀਕੋ ਰੋਮਨ ਪਹਿਲਵਾਨ ਦੀਪਕ ਨੇ ਡੋਪ ਟੈਸਟ ਪਾਸ ਨਹੀਂ ਕੀਤਾ, ਜਿਸ ਕਾਰਨ ਨੈਸ਼ਨਲ ਫੈਡਰੇਸ਼ਨ ਨੂੰ ਉਸ ਨੂੰ ਟੀਮ ਵਿੱਚੋਂ ਬਾਹਰ ਕਰਨਾ ਪਿਆ ਹੈ। ਇਸ ਨਾਲ ਮੁਕਾਬਲਿਆਂ ਵਿੱਚ ਭਾਰਤੀ ਚੁਣੌਤੀ ਕਮਜ਼ੋਰ ਹੋ ਗਈ ਹੈ। ਇਸ ਤੋਂ ਪਹਿਲਾਂ ਵੀ ਭਾਰਤ ਮੁਕੁਲ ਦਾਹੀਆ (ਫਰੀਸਟਾਈਲ 86 ਕਿਲੋਗ੍ਰਾਮ) ਅਤੇ ਦੀਪਾਂਸ਼ੂ (ਗ੍ਰੀਕੋ ਰੋਮਨ 130 ਕਿਲੋਗ੍ਰਾਮ) ਨਾਲ ਜੁੜੇ ਡੋਪਿੰਗ ਮਾਮਲਿਆਂ ਕਾਰਨ ਏਸ਼ਿਆਈ ਖੇਡਾਂ ਵਿੱਚ ਕੁਸ਼ਤੀ ਦੇ ਦੋ ਕੋਟੇ ਗੁਆ ਚੁੱਕਾ ਹੈ।
ਦੀਪਕ ਦਿੱਲੀ ਦਾ ਰਹਿਣ ਵਾਲਾ ਹੈ ਤੇ ਇਹ 25 ਸਾਲਾ ਖਿਡਾਰੀ ਭਾਰਤੀ ਡਾਕ ਸੇਵਾ ਤੋਂ ਏਸ਼ਿਆਈ ਖੇਡਾਂ ਲਈ ਭਾਰਤੀ ਟੀਮ ਵਿੱਚ ਜਗ੍ਹਾ ਬਣਾਉਣ ਵਾਲਾ ਪਹਿਲਾ ਪਹਿਲਵਾਨ ਹੈ। ਉਸ ਨੇ 31 ਮਈ ਨੂੰ ਲਖਨਊ ਵਿੱਚ ਹੋਏ ਚੋਣ ਟ੍ਰਾਇਲਸ ਵਿੱਚ ਫੈਡਰੇਸ਼ਨ ਕੱਪ ਵਿੱਚ ਤਮਗਾ ਜਿੱਤਣ ਤੋਂ ਬਾਅਦ ਜਿੱਤ ਹਾਸਲ ਕੀਤੀ ਸੀ। ਨੈਸ਼ਨਲ ਐਂਟੀ-ਡੋਪਿੰਗ ਏਜੰਸੀ (ਨਾਡਾ) ਵੱਲੋਂ ਜਾਰੀ ਨੋਟਿਸ ਅਨੁਸਾਰ ਚੋਣ ਟ੍ਰਾਇਲਸ ਦੌਰਾਨ ਇਕੱਠੇ ਕੀਤੇ ਗਏ ਦੀਪਕ ਦੇ ਪਿਸ਼ਾਬ ਦੇ ਨਮੂਨੇ ਵਿੱਚ ਕਲੋਮੀਫ਼ਿਨ (Clomifene) ਪਾਇਆ ਗਿਆ ਹੈ ਜੋ WADA ਦੀ ਪਾਬੰਦੀਸ਼ੁਦਾ ਸੂਚੀ ਤਹਿਤ ਹਾਰਮੋਨ ਅਤੇ ਮੈਟਾਬੋਲਿਕ ਮੋਡੂਲੇਟਰ ਵਜੋਂ ਸ਼ਾਮਲ ਹੈ।
ਹਾਲਾਂਕਿ ਨਾਡਾ ਦੇ ਨੋਟਿਸ ਵਿੱਚ ਇਹ ਸਪੱਸ਼ਟ ਨਹੀਂ ਕੀਤਾ ਗਿਆ ਹੈ ਕਿ ਦੀਪਕ ਨੂੰ ਆਰਜ਼ੀ ਤੌਰ 'ਤੇ ਮੁਅੱਤਲ ਕੀਤਾ ਗਿਆ ਹੈ ਪਰ ਫੈਡਰੇਸ਼ਨ ਦਾ ਕਹਿਣਾ ਹੈ ਕਿ ਉਹ ਖੇਡਾਂ ਦੌਰਾਨ ਕੋਈ ਜੋਖਮ ਨਹੀਂ ਲੈ ਸਕਦੇ ਕਿਉਂਕਿ ਜੇਕਰ ਉਹ ਪਾਜ਼ੇਟਿਵ ਪਾਏ ਜਾਂਦੇ ਹਨ ਤਾਂ ਵਿਸ਼ਵ ਪੱਧਰੀ ਸੰਸਥਾ UWW ਵੱਲੋਂ ਭਾਰਤੀ ਕੁਸ਼ਤੀ ਫੈਡਰੇਸ਼ਨ (WFI) ’ਤੇ 20 ਲੱਖ ਰੁਪਏ ਦਾ ਜੁਰਮਾਨਾ ਲਗਾਇਆ ਜਾ ਸਕਦਾ ਹੈ।
ਡਬਲਿਊ ਐੱਫ ਆਈ ਦੇ ਅਧਿਕਾਰੀ ਨੇ ਦੱਸਿਆ ਕਿ ਦੀਪਕ ਕਦੇ ਵੀ ਨੈਸ਼ਨਲ ਕੈਂਪ ਦਾ ਹਿੱਸਾ ਨਹੀਂ ਰਹੇ ਸਨ ਜਿਸ ਕਰਕੇ ਉਨ੍ਹਾਂ ਦਾ ਜ਼ਿਆਦਾ ਟੈਸਟ ਨਹੀਂ ਹੋ ਸਕਿਆ। ਫੈਡਰੇਸ਼ਨ ਨੇ ਮੰਨਿਆ ਕਿ ਜੇਕਰ ਉਨ੍ਹਾਂ ਨੂੰ ਸਮੇਂ ਸਿਰ ਨਤੀਜੇ ਮਿਲ ਜਾਂਦੇ ਤਾਂ ਉਹ ਹੋਰ ਖਿਡਾਰੀਆਂ ਨੂੰ ਮੌਕਾ ਦੇ ਸਕਦੇ ਸਨ। ਨਾਡਾ ਦੀ ਰਿਪੋਰਟ ਮੁਤਾਬਕ ਦੀਪਕ ਨੇ ਡੋਪਿੰਗ ਫਾਰਮ ਵਿੱਚ ਕਿਸੇ ਵੀ ਦਵਾਈ ਦਾ ਖੁਲਾਸਾ ਨਹੀਂ ਕੀਤਾ ਸੀ ਅਤੇ ਨਾ ਹੀ ਖੁਰਾਕੀ ਪੂਰਕਾਂ (dietary supplements) ਲਈ ਕੋਈ ਬਿੱਲ ਜਾਂ ਰਿਕਾਰਡ ਪੇਸ਼ ਕੀਤਾ। ਦੀਪਕ ਕੋਲ ਬੀ-ਸੈਂਪਲ (B-sample) ਦੀ ਜਾਂਚ ਦੀ ਮੰਗ ਕਰਨ ਦਾ ਅਧਿਕਾਰ ਹੈ ਜਿਸ ਲਈ ਉਨ੍ਹਾਂ ਨੂੰ ਸੱਤ ਦਿਨ ਦਾ ਸਮਾਂ ਮਿਲਿਆ ਹੈ।
