ਰਾਸ਼ਟਰਮੰਡਲ ਖੇਡਾਂ: ਲਾਅਨ ਬਾਊਲਜ਼ ’ਚ ਸੋਨੋਵਾਲ ਨੇ ਵਿਸ਼ਵ ਚੈਂਪੀਅਨ ਨੂੰ ਹਰਾਇਆ

ਲਾਅਨ ਬਾਊਲਜ਼ ਪੁਰਸ਼ ਸਿੰਗਲਜ਼ ਮੁਕਾਬਲੇ ਵਿੱਚ ਪੁਤੁਲ ਸੋਨੋਵਾਲ ਨੇ ਕੈਨੇਡਾ ਦੇ 2023 ਦੇ ਵਿਸ਼ਵ ਚੈਂਪੀਅਨ ਰਿਆਨ ਬੈਸਟਰ ਨੂੰ ਟਾਈ-ਬ੍ਰੇਕ ਵਿੱਚ ਹਰਾ ਕੇ ਵੱਡਾ ਉਲਟਫੇਰ ਕੀਤਾ ਹੈ, ਜਿਸ ਨਾਲ ਭਾਰਤ ਨੇ ਅੱਜ ਇੱਥੇ ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ ਵਿੱਚ ਆਪਣੀ ਸ਼ੁਰੂਆਤ ਪੂਰੇ ਆਤਮ-ਵਿਸ਼ਵਾਸ ਨਾਲ ਕੀਤੀ। ਲਾਅਨ ਬਾਊਲਜ਼ ਮੁਕਾਬਲਿਆਂ ਦੀ ਸ਼ੁਰੂਆਤ ਨਾਲ ਹੀ ਰੂਪਾ ਰਾਣੀ ਟਿਰਕੀ ਅਤੇ ਪਿੰਕੀ ਸਿੰਘ ਨੇ ਮਹਿਲਾ ਪੇਅਰਜ਼ ਦੇ ਆਪਣੇ ਪਹਿਲੇ ਮੈਚ ਵਿੱਚ ਮਾਲਟਾ ਵਿਰੁੱਧ ਟਾਈ-ਬ੍ਰੇਕ ’ਚ ਜਿੱਤ ਦਰਜ ਕੀਤੀ।

ਆਪਣੀਆਂ ਪਹਿਲੀਆਂ ਰਾਸ਼ਟਰਮੰਡਲ ਖੇਡਾਂ ਖੇਡ ਰਹੇ ਸੋਨੋਵਾਲ ਨੇ ਪਹਿਲਾ ਸੈੱਟ 5-4 ਨਾਲ ਆਪਣੇ ਨਾਮ ਕੀਤਾ, ਜਿਸ ਮਗਰੋਂ ਰਾਸ਼ਟਰਮੰਡਲ ਖੇਡਾਂ ਵਿੱਚ ਕਈ ਤਗ਼ਮੇ ਜਿੱਤ ਚੁੱਕੇ ਬੈਸਟਰ ਨੇ ਸ਼ਾਨਦਾਰ ਵਾਪਸੀ ਕਰਦਿਆਂ 7-3 ਨਾਲ ਜਿੱਤ ਦਰਜ ਕਰ ਕੇ ਮੁਕਾਬਲੇ ਨੂੰ ਟਾਈ-ਬ੍ਰੇਕ ਵਿੱਚ ਪਹੁੰਚਾ ਦਿੱਤਾ। ਮੌਜੂਦਾ ਏਸ਼ਿਆਈ ਚੈਂਪੀਅਨ ਅਸਾਮ ਦੇ ਇਸ ਖਿਡਾਰੀ ਨੇ ਧੀਰਜ ਬਣਾਈ ਰੱਖਿਆ ਅਤੇ ਸੈਕਸ਼ਨ ‘ਡੀ’ ਵਿੱਚ ਆਪਣੇ ਉਦਘਾਟਨੀ ਮੈਚ ’ਚ ਸ਼ਾਨਦਾਰ ਜਿੱਤ ਦਰਜ ਕਰਨ ਲਈ ਟਾਈ-ਬ੍ਰੇਕ ਆਪਣੇ ਨਾਮ ਕਰ ਲਿਆ। ਉਸ ਦੇ ਇਸ ਪ੍ਰਦਰਸ਼ਨ ਨਾਲ ਭਾਰਤ ਨੂੰ ਲਾਅਨ ਬਾਊਲਜ਼ ਪੁਰਸ਼ ਸਿੰਗਲਜ਼ ਮੁਕਾਬਲੇ ਵਿੱਚ ਤਗਮੇ ਦੀ ਆਸ ਬੱਝ ਗਈ ਹੈ।