Badminton: ਸੱਟ ਕਾਰਨ ਲਕਸ਼ੈ ਥੌਮਸ ਕੱਪ ਦੇ ਸੈਮੀ ਫਾਈਨਲ ’ਚੋਂ ਬਾਹਰ

ਭਾਰਤੀ ਬੈਡਮਿੰਟਨ ਐਸੋਸੀਏਸ਼ਨ (ਬੀ ਏ ਆਈ) ਦੇ ਜਨਰਲ ਸਕੱਤਰ ਸੰਜੈ ਮਿਸ਼ਰਾ ਨੇ ਦੱਸਿਆ ਕਿ ਲਕਸ਼ੈ ਦੀ ਸਿਹਤ ਨੂੰ ਧਿਆਨ ਵਿੱਚ ਰੱਖਦਿਆਂ ਇਹ ਫ਼ੈਸਲਾ ਲਿਆ ਗਿਆ ਹੈ। ਲਕਸ਼ੈ ਦੇ ਕੋਚ ਵਿਮਲ ਕੁਮਾਰ ਅਨੁਸਾਰ ਉਹ ਪੈਰਾਂ ਦੇ ਛਾਲਿਆਂ ਨਾਲ ਵੀ ਜੂਝ ਰਿਹਾ ਹੈ। ਲਕਸ਼ੈ ਦੀ ਗ਼ੈਰ-ਮੌਜੂਦਗੀ ਵਿੱਚ ਹੁਣ ਨੌਜਵਾਨ ਆਯੂਸ਼ ਸ਼ੈੱਟੀ ਪਹਿਲੇ ਸਿੰਗਲਜ਼ ਮੈਚ ਦੌਰਾਨ ਸੰਸਾਰ ਦੇ ਚੌਥੇ ਨੰਬਰ ਦੇ ਖਿਡਾਰੀ ਕਰਿਸਟੋ ਪੋਪੋਵ ਨਾਲ ਭਿੜੇਗਾ। ਦੂਜੇ ਸਿੰਗਲਜ਼ ਵਿੱਚ ਤਜਰਬੇਕਾਰ ਕਿਦਾਂਬੀ ਸ੍ਰੀਕਾਂਤ ਦਾ ਸਾਹਮਣਾ ਐਲੇਕਸ ਲੇਨੀਅਰ ਨਾਲ ਹੋਵੇਗਾ। ਤੀਜੇ ਸਿੰਗਲਜ਼ ਵਿੱਚ ਐੱਚ ਐੱਸ ਪ੍ਰਣੌਏ ਕੋਰਟ ’ਚ ਉਤਰੇਗਾ।

ਟੂਰਨਾਮੈਂਟ ਦੇ ਨਿਯਮਾਂ ਅਨੁਸਾਰ ਜੇ ਕੋਈ ਖਿਡਾਰੀ ਸਿੰਗਲਜ਼ ਅਤੇ ਡਬਲਜ਼ ਦੋਵਾਂ ਵਿੱਚ ਖੇਡਦਾ ਹੈ, ਤਾਂ ਪਹਿਲਾਂ ਸਿੰਗਲਜ਼ ਮੈਚ ਕਰਵਾਏ ਜਾਂਦੇ ਹਨ, ਜਿਸ ਕਾਰਨ ਇਸ ਟਾਈ ਵਿੱਚ ਪਹਿਲਾਂ ਸਾਰੇ ਸਿੰਗਲਜ਼ ਮੁਕਾਬਲੇ ਹੋਣਗੇ। ਭਾਰਤੀ ਟੀਮ ਸੈਮੀ ਫਾਈਨਲ ਵਿੱਚ ਪਹੁੰਚ ਕੇ ਪਹਿਲਾਂ ਹੀ ਤਗ਼ਮਾ ਪੱਕਾ ਕਰ ਚੁੱਕੀ ਹੈ।