Badminton: ਕੈਨੇਡਾ ਦੇ ਲਾਈ ਤੋਂ ਹਾਰ ਕੇ ਲਕਸ਼ੈ ਬਾਹਰ

2021 ਦੀਆਂ ਆਲਮੀ ਚੈਂਪੀਅਨਸ਼ਿਪਾਂ ਦੇ ਕਾਂਸੀ ਤਗ਼ਮਾ ਜੇਤੂ ਲਕਸ਼ੈ ਨੇ ਗ਼ਲਤੀਆਂ ਨਾਲ ਭਰਪੂਰ ਖੇਡ ਖੇਡੀ ਅਤੇ 38 ਮਿੰਟਾਂ ਵਿੱਚ ਦੁਨੀਆ ਦੇ 9ਵੇਂ ਨੰਬਰ ਦੇ ਖਿਡਾਰੀ ਕੈਨੇਡਾ ਦੇ ਵਿਕਟਰ ਲਾਈ ਤੋਂ 14-21, 7-21 ਨਾਲ ਹਾਰ ਗਿਆ। ਵਿਕਟਰ ਲਾਈ ਨੇ ਪਿਛਲੇ ਮਹੀਨੇ ਆਲਮੀ ਚੈਂਪੀਅਨਸ਼ਿਪ ਵਿੱਚ ਆਪਣਾ ਦੂਜਾ ਕਾਂਸੀ ਦਾ ਤਗ਼ਮਾ ਜਿੱਤਿਆ ਸੀ। ਕੈਨੇਡੀਅਨ ਖਿਡਾਰੀ ਵਿਰੁੱਧ ਲਕਸ਼ੈ ਦੀ ਇਹ ਤੀਜੀ ਹਾਰ ਸੀ, ਜਦੋਂ ਕਿ ਉਸ ਦੀ ਇਕੱਲੀ ਜਿੱਤ ਇਸ ਸਾਲ ਮਾਰਚ ਵਿੱਚ ਆਲ ਇੰਗਲੈਂਡ ਚੈਂਪੀਅਨਸ਼ਿਪ ਵਿੱਚ ਆਈ ਸੀ। ਹਾਲਾਂਕਿ, 2021 ਦੀਆਂ ਆਲਮੀ ਚੈਂਪੀਅਨਸ਼ਿਪਾਂ ਦਾ ਚਾਂਦੀ ਤਗ਼ਮਾ ਜੇਤੂ ਸ੍ਰੀਕਾਂਤ ਪੁਰਸ਼ਾਂ ਦੇ ਸਿੰਗਲਜ਼ ਦੇ ਇੱਕ ਹੋਰ ਸ਼ੁਰੂਆਤੀ ਮੁਕਾਬਲੇ ਵਿੱਚ ਚੀਨੀ ਤੈਪਈ ਦੇ ਚੀ ਯੂ ਜੇਨ ਨੂੰ 21-16, 21-15 ਨਾਲ ਹਰਾ ਕੇ ਅਗਲੇ ਗੇੜ ਵਿੱਚ ਦਾਖ਼ਲ ਹੋਇਆ। ਦੁਨੀਆ ਦਾ ਸਾਬਕਾ ਨੰਬਰ 1 ਭਾਰਤੀ ਖਿਡਾਰੀ ਜਿਸ ਨੇ ਇਸ ਸਾਲ ਯੂ ਐੱਸ ਓਪਨ ਦਾ ਫਾਈਨਲ ਖੇਡਿਆ ਸੀ, ਦਾ ਅਗਲਾ ਮੁਕਾਬਲਾ ਵਿਕਟਰ ਲਾਈ ਨਾਲ ਹੋਵੇਗਾ।

ਪਿਛਲੇ ਮਹੀਨੇ ਤੈਪਈ ਓਪਨ ਵਿੱਚ ਆਪਣਾ ਪਹਿਲਾ ਬੀ ਡਬਲਿਊ ਐੱਫ ਵਰਲਡ ਟੂਰ ਖ਼ਿਤਾਬ ਜਿੱਤਣ ਵਾਲੀ ਤਨਵੀ ਨੇ ਡੈਨਮਾਰਕ ਦੀ ਅਮਾਲੀ ਸ਼ੁਲਜ਼ ਨੂੰ 21-16, 21-17 ਨਾਲ ਹਰਾ ਕੇ ਮਹਿਲਾ ਸਿੰਗਲਜ਼ ਦੇ ਦੂਜੇ ਗੇੜ ਵਿੱਚ ਵੀ ਆਪਣੀ ਜਗ੍ਹਾ ਪੱਕੀ ਕਰ ਲਈ। ਪੰਜਾਬ ਦੀ 17 ਸਾਲਾ ਖਿਡਾਰਨ ਜਿਸ ਨੇ ਪਿਛਲੇ ਸਾਲ ਗੁਹਾਟੀ ਵਿੱਚ ਜੂਨੀਅਰ ਆਲਮੀ ਚੈਂਪੀਅਨਸ਼ਿਪ ਵਿੱਚ ਕਾਂਸੀ ਦਾ ਤਗ਼ਮਾ ਜਿੱਤਿਆ ਸੀ, ਦਾ ਅਗਲਾ ਮੁਕਾਬਲਾ ਜਪਾਨ ਦੀ ਤੋਮੋਕਾ ਮਿਆਜ਼ਾਕੀ ਨਾਲ ਹੋਵੇਗਾ। ਆਲਮੀ ਚੈਂਪੀਅਨਸ਼ਿਪ ਦਾ ਦੋ ਵਾਰ ਦਾ ਕਾਂਸੀ ਤਗ਼ਮਾ ਜੇਤੂ ਸਾਤਵਿਕਸਾਈਰਾਜ ਰੰਕੀਰੈੱਡੀ ਅਤੇ ਚਿਰਾਗ ਸ਼ੈੱਟੀ ਵੀ ਮਲੇਸ਼ੀਆ ਦੇ ਜੁਨੈਦੀ ਆਰਿਫ਼ ਅਤੇ ਕਾਂਗ ਖਾਈ ਜ਼ਿੰਗ ਨੂੰ 21-11, 21-16 ਨਾਲ ਹਰਾ ਕੇ ਅਗਲੇ ਗੇੜ ਵਿੱਚ ਪੁੱਜੇ।