Asian Games Cricket: ਭਾਰਤ ਤੇ ਪਾਕਿ ਟੀਮਾਂ ਸਿੱਧੇ ਕੁਆਰਟਰ ਫਾਈਨਲ ’ਚ

ਸ਼੍ਰੇਅਸ ਅਈਅਰ ਪੁਰਸ਼ ਅਤੇ ਹਰਮਨਪ੍ਰੀਤ ਮਹਿਲਾ ਟੀਮ ਦੀ ਕਪਤਾਨ ਹੋਵੇਗੀ

PTI

ਨਵੀਂ ਦਿੱਲੀ, 02:42 AM Jul 25, 2026 IST

ਸੰਕੇਤਕ ਤਸਵੀਰ।

ਮੌਜੂਦਾ ਚੈਂਪੀਅਨ ਭਾਰਤ ਅਤੇ ਪਾਕਿਸਤਾਨ ਨੂੰ ਇਸ ਸਾਲ ਦੀਆਂ ਏਸ਼ਿਆਈ ਖੇਡਾਂ ਦੇ ਪੁਰਸ਼ ਤੇ ਮਹਿਲਾ ਦੋਵਾਂ ਕ੍ਰਿਕਟ ਮੁਕਾਬਲਿਆਂ ਦੇ ਕੁਆਰਟਰ ਫਾਈਨਲ ਵਿੱਚ ਸਿੱਧਾ ਦਾਖ਼ਲਾ ਮਿਲਿਆ ਹੈ। ਭਾਰਤੀ ਮਹਿਲਾ ਟੀਮ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਜਪਾਨ ਖ਼ਿਲਾਫ਼ ਕਰੇਗੀ, ਜਦੋਂ ਕਿ ਪੁਰਸ਼ ਟੀਮ ਦੇ ਵਿਰੋਧੀ ਦਾ ਫ਼ੈਸਲਾ ਸ਼ੁਰੂਆਤੀ ਪੜਾਅ ਤੋਂ ਬਾਅਦ ਹੋਵੇਗਾ। ਮਹਿਲਾ ਟੀਮ ਸੈਮੀ ਫਾਈਨਲ ਵਿੱਚ ਬੰਗਲਾਦੇਸ਼ ਜਾਂ ਚੀਨ ਨਾਲ ਭਿੜੇਗੀ। ਪੁਰਸ਼ ਕ੍ਰਿਕਟ ਮੁਕਾਬਲਾ 24 ਸਤੰਬਰ ਤੋਂ ਸ਼ੁਰੂ ਹੋ ਕੇ ਪਹਿਲੀ ਅਕਤੂਬਰ ਨੂੰ ਸਮਾਪਤ ਹੋਵੇਗਾ। ਸੈਮੀ ਫਾਈਨਲ ਵਿੱਚ ਪੁਰਸ਼ ਟੀਮ ਦਾ ਸਾਹਮਣਾ ਪਾਕਿਸਤਾਨ ਨਾਲ ਹੋ ਸਕਦਾ ਹੈ। ਸ਼੍ਰੇਅਸ ਅਈਅਰ ਭਾਰਤੀ ਪੁਰਸ਼ ਟੀਮ ਦੀ ਕਪਤਾਨੀ ਕਰੇਗਾ, ਜਦੋਂ ਕਿ ਹਰਮਨਪ੍ਰੀਤ ਕੌਰ ਮਹਿਲਾ ਟੀਮ ਦੀ ਕਪਤਾਨ ਹੋਵੇਗੀ।

ਮਹਿਲਾ ਵਰਗ ਦੇ ਮੁਕਾਬਲੇ 17 ਤੋਂ 22 ਸਤੰਬਰ ਤੱਕ ਕਰਵਾਏ ਜਾਣਗੇ। ਮਹਿਲਾ ਫਾਈਨਲ ਵਿੱਚ ਪਾਕਿਸਤਾਨ ਨਾਲ ਟੱਕਰ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ। ਪੁਰਸ਼ ਮੁਕਾਬਲੇ ਵਿੱਚ 10 ਟੀਮਾਂ ਹਿੱਸਾ ਲੈ ਰਹੀਆਂ ਹਨ। ਸ਼ੁਰੂਆਤੀ ਪੜਾਅ ਵਿੱਚ ਗਰੁੱਪ ‘ਏ’ ਵਿੱਚ ਅਫ਼ਗਾਨਿਸਤਾਨ, ਜਪਾਨ ਤੇ ਨੇਪਾਲ ਅਤੇ ਗਰੁੱਪ ‘ਬੀ’ ਵਿੱਚ ਹਾਂਗਕਾਂਗ, ਮਲੇਸ਼ੀਆ ਅਤੇ ਓਮਾਨ ਸ਼ਾਮਲ ਹੋਣਗੇ। ਦੋਵੇਂ ਮੁਕਾਬਲੇ ਆਇਚੀ ਪ੍ਰਾਂਤ ਦੇ ਕੋਰੋਗੀ ਐਥਲੈਟਿਕ ਪਾਰਕ ਵਿੱਚ ਟੀ-20 ਫਾਰਮੈਟ ਵਿੱਚ ਖੇਡੇ ਜਾਣਗੇ।