Asian Games 2026: ਕਮਲਜੀਤ ਅਤੇ ਸੁਰੁਚੀ ਨੇ ਏਅਰ ਪਿਸਤੌਲ ਮੁਕਾਬਲੇ ’ਚ ਸੋਨੇ ਦਾ ਤਗ਼ਮਾ ਜਿੱਤਿਆ
Asian Games 2026: ਭਾਰਤ ਨੇ ਰਾਈਫਲ ਵਿੱਚ 3ਪੀ ਟੀਮ ਚਾਂਦੀ ਦਾ ਤਗ਼ਮਾ ਵੀ ਜਿੱਤਿਆ
ਭਾਰਤੀ ਨਿਸ਼ਾਨੇਬਾਜ਼ਾਂ ਸੁਰੁਚੀ ਸਿੰਘ ਅਤੇ ਕਮਲਜੀਤ ਨੇ ਸ਼ੁੱਕਰਵਾਰ ਨੂੰ ਇੱਥੇ ਏਸ਼ੀਆਈ ਖੇਡਾਂ (Asian Games 2026) ਵਿੱਚ 10 ਮੀਟਰ ਏਅਰ ਪਿਸਟਲ ਮਿਕਸਡ ਟੀਮ ਮੁਕਾਬਲੇ ਵਿੱਚ ਸੋਨ ਤਗ਼ਮਾ ਆਪਣੇ ਨਾਂ ਕਰਦਿਆਂ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ, ਜੋ ਆਪਣੇ ਆਪਣੇ ਵਿਅਕਤੀਗਤ ਮੁਕਾਬਲਿਆਂ ਵਿੱਚ ਨਿਰਾਸ਼ਾਜਨਕ ਪ੍ਰਦਰਸ਼ਨ ਤੋਂ ਬਾਅਦ ਸ਼ਾਨਦਾਰ ਵਾਪਸੀ ਕਰ ਰਹੇ ਹਨ।
ਇਸ ਤੋਂ ਬਾਅਦ ਐਸ਼ਵਰਿਆ ਪ੍ਰਤਾਪ ਸਿੰਘ ਤੋਮਰ, ਰੁਦ੍ਰਕਸ਼ ਪਾਟਿਲ ਅਤੇ ਨੀਰਜ ਕੁਮਾਰ ਦੀ ਭਾਰਤੀ ਤਿੱਕੜੀ ਨੇ 1762 ਅੰਕ ਬਣਾ ਕੇ ਪੁਰਸ਼ਾਂ ਦੀ 50 ਮੀਟਰ ਰਾਈਫਲ 3 ਪੋਜੀਸ਼ਨਜ਼ ਟੀਮ ਦਾ ਚਾਂਦੀ ਦਾ ਤਗ਼ਮਾ ਜਿੱਤਿਆ। ਚੀਨ ਨੇ 1766 ਅੰਕਾਂ ਨਾਲ ਟੀਮ ਦਾ ਸੋਨ ਤਗ਼ਮਾ ਜਿੱਤਿਆ ਜਦਕਿ ਕੋਰੀਆ ਨੇ 1751 ਅੰਕਾਂ ਨਾਲ ਕਾਂਸੀ ਦਾ ਤਗ਼ਮਾ ਜਿੱਤਿਆ।
ਤੋਮਰ (589) ਅਤੇ ਨੀਰਜ (588) ਨੇ ਕ੍ਰਮਵਾਰ ਤੀਜੇ ਅਤੇ ਚੌਥੇ ਸਥਾਨ 'ਤੇ ਰਹਿ ਕੇ 3ਪੀ ਮੁਕਾਬਲੇ ਦੇ ਵਿਅਕਤੀਗਤ ਫਾਈਨਲ ਵਿੱਚ ਵੀ ਪ੍ਰਵੇਸ਼ ਕੀਤਾ। ਰੁਦ੍ਰਕਸ਼ ਇਸ ਵਿੱਚ ਥਾਂ ਨਹੀਂ ਬਣਾ ਸਕੇ ਕਿਉਂਕਿ ਇੱਕ ਦੇਸ਼ ਤੋਂ ਸਿਰਫ਼ ਦੋ ਨਿਸ਼ਾਨੇਬਾਜ਼ ਹੀ ਵਿਅਕਤੀਗਤ ਫਾਈਨਲ ਵਿੱਚ ਪ੍ਰਵੇਸ਼ ਕਰ ਸਕਦੇ ਹਨ।
ਕਮਲਜੀਤ ਅਤੇ ਸੁਰੁਚੀ ਨੇ ਫਾਈਨਲ ਵਿੱਚ ਕੁੱਲ 484.6 ਅੰਕ ਬਣਾਏ ਜਿਸ ਵਿੱਚ ਚੋਟੀ ਦੇ ਚਾਰ ਜੋੜੇ ਤਗ਼ਮੇ ਦੇ ਗੇੜ ਲਈ ਕੁਆਲੀਫਾਈ ਕਰਦੇ ਹਨ। ਉਨ੍ਹਾਂ ਤੋਂ ਬਾਅਦ ਦੂਜੇ ਸਥਾਨ 'ਤੇ ਦੱਖਣੀ ਕੋਰੀਆ ਦੇ ਸੁਹਿਯੋਨ ਹੋਂਗ ਅਤੇ ਗਾਏਉਨ ਚੂ (478.0) ਰਹੇ। ਕੋਰੀਆਈ ਖਿਡਾਰੀ ਕਮਲਜੀਤ ਅਤੇ ਸੁਰੁਚੀ ਤੋਂ 6.6 ਅੰਕ ਪਿੱਛੇ ਸਨ, ਜਿਸ ਤੋਂ ਫਾਈਨਲ ਵਿੱਚ ਭਾਰਤੀ ਜੋੜੀ ਦਾ ਦਬਦਬਾ ਦਿਖਾਈ ਦਿੱਤਾ।
ਇਰਾਨ ਨੇ 415.8 ਅੰਕਾਂ ਨਾਲ ਇਸ ਮੁਕਾਬਲੇ ਵਿੱਚ ਕਾਂਸੀ ਦਾ ਤਗ਼ਮਾ ਜਿੱਤਿਆ।
ਇਸ ਤੋਂ ਪਹਿਲਾਂ, ਕਮਲਜੀਤ ਅਤੇ ਸੁਰੁਚੀ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਕੁਆਲੀਫਾਈਡ ਵਿੱਚ ਸਿਖਰ 'ਤੇ ਰਹਿਣ ਤੋਂ ਬਾਅਦ ਫਾਈਨਲ ਵਿੱਚ ਪਹੁੰਚ ਗਏ ਸਨ।
ਹੁਣ ਤੱਕ ਦੀ ਨਿਰਾਸ਼ਾਜਨਕ ਮੁਹਿੰਮ ਤੋਂ ਬਾਅਦ 10 ਮੀਟਰ ਏਅਰ ਪਿਸਤੌਲ ਮੁਕਾਬਲਿਆਂ ਵਿੱਚ ਤਗ਼ਮੇ ਲਈ ਇਹ ਭਾਰਤ ਦਾ ਆਖਰੀ ਮੌਕਾ ਸੀ।
ਕਮਲਜੀਤ ਵਿਅਕਤੀਗਤ ਕੁਆਲੀਫਿਕੇਸ਼ਨ ਵਿੱਚ ਨੌਵੇਂ ਸਥਾਨ 'ਤੇ ਰਹੇ, ਜਦੋਂ ਕਿ ਸੁਰੁਚੀ 26ਵੇਂ ਸਥਾਨ 'ਤੇ ਰਹੀ, ਅਤੇ ਦੋਵਾਂ ਵਿੱਚੋਂ ਕੋਈ ਵੀ ਵਿਅਕਤੀਗਤ ਫਾਈਨਲ ਵਿੱਚ ਨਹੀਂ ਪਹੁੰਚ ਸਕਿਆ। ਭਾਰਤ ਪੁਰਸ਼ ਅਤੇ ਮਹਿਲਾ ਦੋਵਾਂ ਟੀਮ ਮੁਕਾਬਲਿਆਂ ਵਿੱਚ ਵੀ ਤਗ਼ਮਿਆਂ ਤੋਂ ਖੁੰਝ ਗਿਆ। ਪੀ.ਟੀ.ਆਈ.
