Asian Games 2026 cricket: ਸੂਚੀ ’ਚ ਸੂਰਿਆਕੁਮਾਰ ਜਾਂ ਸ਼ੁਭਮਨ ਨਹੀਂ

ਇਹ ਪਹਿਲਾਂ ਹੀ ਤੈਅ ਹੋ ਚੁੱਕਾ ਸੀ ਕਿ ਕ੍ਰਿਕਟ ਕੰਟਰੋਲ ਬੋਰਡ ਨੂੰ ਦੋ ਵੱਖ-ਵੱਖ ਟੀ-20 ਟੀਮਾਂ ਦੀ ਚੋਣ ਕਰਨੀ ਪਵੇਗੀ, ਕਿਉਂਕਿ ਭਾਰਤ ਦੀ ਵੈਸਟਇੰਡੀਜ਼ ਵਿਰੁੱਧ ਘਰੇਲੂ ਸੀਮਤ ਓਵਰਾਂ (ਸਫੈਦ ਗੇਂਦ) ਦੀ ਲੜੀ ਇਸ ਚਾਰ ਸਾਲਾਂ ਮਗਰੋਂ ਹੋਣ ਵਾਲੇ ਮਹਾਕੁੰਭ (ਏਸ਼ਿਆਈ ਖੇਡਾਂ) ਦੇ ਸਮੇਂ ਨਾਲ ਟਕਰਾ ਰਹੀ ਹੈ। ਵੈਸਟਇੰਡੀਜ਼ ਲੜੀ ਵਿੱਚ 27 ਸਤੰਬਰ ਤੋਂ 17 ਅਕਤੂਬਰ ਦਰਮਿਆਨ ਅੱਠ ਸੀਮਤ ਓਵਰਾਂ ਦੇ ਮੈਚ (ਤਿੰਨ ਇਕ ਰੋਜ਼ਾ ਅਤੇ ਪੰਜ ਟੀ-20) ਖੇਡੇ ਜਾਣੇ ਹਨ। ਸ਼ੁਭਮਨ ਗਿੱਲ ਵੱਲੋਂ ਇਕ ਰੋਜ਼ਾ ਲੜੀ ਵਿੱਚ ਟੀਮ ਦੀ ਅਗਵਾਈ ਕੀਤੇ ਜਾਣ ਦੀ ਉਮੀਦ ਹੈ, ਇਸ ਲਈ ਉਸ ਨੂੰ ਏਸ਼ਿਆਈ ਖੇਡਾਂ ਲਈ ਨਹੀਂ ਚੁਣਿਆ ਗਿਆ ਹੈ। ਹਾਲਾਂਕਿ, ਕੁਝ ਖਿਡਾਰੀ ਇਕ ਰੋਜ਼ਾ ਅਤੇ ਟੀ-20 ਦੋਵਾਂ ਟੀਮਾਂ ਵਿੱਚ ਸਾਂਝੇ ਹਨ, ਪਰ ਏਸ਼ਿਆਈ ਖੇਡਾਂ ਵਿੱਚ ਪੁਰਸ਼ ਕ੍ਰਿਕਟ ਦੇ ਮੁਕਾਬਲੇ 24 ਸਤੰਬਰ ਤੋਂ 3 ਅਕਤੂਬਰ ਦਰਮਿਆਨ ਹੋਣਗੇ, ਜਿਸ ਕਾਰਨ ਚੋਣਕਾਰਾਂ ਨੂੰ ਦੋ ਵੱਖ-ਵੱਖ ਟੀਮਾਂ ਚੁਣਨ ਲਈ ਖਿਡਾਰੀਆਂ ਦਾ ਵੱਡਾ ਸਮੂਹ ਬਣਾਉਣ ਲਈ ਮਜਬੂਰ ਹੋਣਾ ਪਿਆ ਹੈ।

ਸਮਝਿਆ ਜਾਂਦਾ ਹੈ ਕਿ ਜਿੱਥੋਂ ਤੱਕ 2028 ਓਲੰਪਿਕ ਖੇਡਾਂ ਅਤੇ ਅਗਲੇ ਟੀ-20 ਵਿਸ਼ਵ ਕੱਪ ਦਾ ਸਵਾਲ ਹੈ, ਸੂਰਿਆਕੁਮਾਰ ਯਾਦਵ ਹੁਣ ਭਵਿੱਖ ਦੀਆਂ ਵੱਡੀਆਂ ਯੋਜਨਾਵਾਂ ਦਾ ਹਿੱਸਾ ਨਹੀਂ ਹਨ, ਇਸ ਲਈ ਏਸ਼ਿਆਈ ਖੇਡਾਂ ਦੀ ਲੰਬੀ ਸੂਚੀ ਵਿੱਚ ਉਨ੍ਹਾਂ ਦਾ ਨਾਮ ਸ਼ਾਮਲ ਨਾ ਹੋਣਾ ਕੋਈ ਹੈਰਾਨੀ ਵਾਲੀ ਗੱਲ ਨਹੀਂ ਹੈ। ਏਸ਼ਿਆਈ ਖੇਡਾਂ ਦੀ ਇਸ ਸੂਚੀ ਵਿੱਚ ਕਪਤਾਨੀ ਦੇ ਮੁੱਖ ਦਾਅਵੇਦਾਰ ਸ਼੍ਰੇਅਸ ਅਈਅਰ, ਸੰਜੂ ਸੈਮਸਨ ਅਤੇ ਤਿਲਕ ਵਰਮਾ ਹਨ।