Asian Games 2026: ਮੁੱਕੇਬਾਜ਼ Lovlina Borgohain, Priya ਅਤੇ Kapil ਨੇ Semi-Finals ਵਿੱਚ ਪਹੁੰਚ ਕੇ Medal ਪੱਕਾ ਕੀਤਾ
ਭਾਰਤ ਦੀ ਤਜਰਬੇਕਾਰ ਮੁੱਕੇਬਾਜ਼ ਲਵਲੀਨਾ ਬੋਰਗੋਹੇਨ ਨੇ ਅੱਜ ਏਸ਼ਿਆਈ ਖੇਡਾਂ ਦੇ ਸੈਮੀ ਫਾਈਨਲ ਵਿੱਚ ਪੁੱਜ ਕੇ ਲਗਾਤਾਰ ਦੂਜੀ ਵਾਰ ਆਪਣਾ ਤਗ਼ਮਾ ਪੱਕਾ ਕਰ ਲਿਆ ਹੈ। ਉਸ ਦੇ ਨਾਲ ਹੀ ਪ੍ਰਿਆ ਘੰਘਾਸ ਅਤੇ ਕਪਿਲ ਪੋਖਰੀਆ ਨੇ ਵੀ ਆਪੋ-ਆਪਣੇ ਵਰਗਾਂ ਦੇ ਸੈਮੀ...
ਭਾਰਤ ਦੀ ਤਜਰਬੇਕਾਰ ਮੁੱਕੇਬਾਜ਼ ਲਵਲੀਨਾ ਬੋਰਗੋਹੇਨ ਨੇ ਅੱਜ ਏਸ਼ਿਆਈ ਖੇਡਾਂ ਦੇ ਸੈਮੀ ਫਾਈਨਲ ਵਿੱਚ ਪੁੱਜ ਕੇ ਲਗਾਤਾਰ ਦੂਜੀ ਵਾਰ ਆਪਣਾ ਤਗ਼ਮਾ ਪੱਕਾ ਕਰ ਲਿਆ ਹੈ। ਉਸ ਦੇ ਨਾਲ ਹੀ ਪ੍ਰਿਆ ਘੰਘਾਸ ਅਤੇ ਕਪਿਲ ਪੋਖਰੀਆ ਨੇ ਵੀ ਆਪੋ-ਆਪਣੇ ਵਰਗਾਂ ਦੇ ਸੈਮੀ ਫਾਈਨਲ ਵਿੱਚ ਥਾਂ ਬਣਾ ਲਈ ਹੈ।
ਮਹਿਲਾ 75 ਕਿਲੋ ਮੁਕਾਬਲੇ ਵਿੱਚ ਲਵਲੀਨਾ ਨੇ ਦੱਖਣੀ ਕੋਰੀਆ ਦੀ ਸਿਓਂਗ ਸੁਯੋਨ ਨੂੰ 5-0 ਨਾਲ ਆਸਾਨੀ ਨਾਲ ਹਰਾਇਆ। ਪਿਛਲੀਆਂ ਹਾਂਗਜ਼ੂ ਖੇਡਾਂ ਵਿੱਚ ਚਾਂਦੀ ਦਾ ਤਗ਼ਮਾ ਜਿੱਤਣ ਵਾਲੀ ਲਵਲੀਨਾ ਹੁਣ ਵਿਸ਼ਵ ਚੈਂਪੀਅਨਸ਼ਿਪ, ਏਸ਼ਿਆਈ ਖੇਡਾਂ, ਏਸ਼ਿਆਈ ਚੈਂਪੀਅਨਸ਼ਿਪ ਅਤੇ ਵਿਸ਼ਵ ਕੱਪ ਵਰਗੇ ਸਾਰੇ ਵੱਡੇ ਟੂਰਨਾਮੈਂਟਾਂ ਵਿੱਚ ਤਗ਼ਮੇ ਜਿੱਤ ਚੁੱਕੀ ਹੈ। ਮੈਚ ਮਗਰੋਂ ਉਸ ਨੇ ਕਿਹਾ ਕਿ ਟੋਕੀਓ ਓਲੰਪਿਕ ਵਿੱਚ ਕਾਂਸੇ ਦਾ ਤਗ਼ਮਾ ਜਿੱਤਣ ਕਰ ਕੇ ਜਾਪਾਨ ਉਸ ਲਈ ਬਹੁਤ ਖ਼ਾਸ ਹੈ ਅਤੇ ਉਹ ਇਸ ਵਾਰ ਆਪਣੇ ਤਗ਼ਮੇ ਦਾ ਰੰਗ ਬਦਲਣ ਦੀ ਪੂਰੀ ਕੋਸ਼ਿਸ਼ ਕਰੇਗੀ। ਅਗਲੇ ਗੇੜ ਵਿੱਚ ਉਸ ਦਾ ਸਾਹਮਣਾ ਕਜ਼ਾਖ਼ਸਤਾਨ ਦੀ ਮੌਜੂਦਾ ਵਿਸ਼ਵ ਚੈਂਪੀਅਨ ਨਤਾਲਿਆ ਬੋਗਦਾਨੋਵਾ ਨਾਲ ਹੋਵੇਗਾ।
ਇਸੇ ਦੌਰਾਨ 60 ਕਿਲੋਗ੍ਰਾਮ ਵਰਗ ਦੇ ਕੁਆਰਟਰ ਫਾਈਨਲ ਵਿੱਚ ਏਸ਼ਿਆਈ ਅਤੇ ਰਾਸ਼ਟਰਮੰਡਲ ਖੇਡਾਂ ਦੀ ਚੈਂਪੀਅਨ ਪ੍ਰਿਆ ਨੇ ਤਾਜਿਕਸਤਾਨ ਦੀ ਮਿਜਗੋਨਾ ਸਮਾਦੋਵਾ ਨੂੰ ਹਰਾਇਆ। ਪਹਿਲੇ ਗੇੜ ਵਿੱਚ ਪਛੜਨ ਮਗਰੋਂ ਪ੍ਰਿਆ ਨੇ ਸ਼ਾਨਦਾਰ ਵਾਪਸੀ ਕੀਤੀ ਅਤੇ ਜੱਜਾਂ ਦੇ ਸਰਬਸੰਮਤੀ ਵਾਲੇ ਫ਼ੈਸਲੇ ਨਾਲ ਜਿੱਤ ਦਰਜ ਕੀਤੀ। ਦੂਜੇ ਪਾਸੇ ਪੁਰਸ਼ਾਂ ਦੇ 90 ਕਿਲੋ ਵਰਗ ਵਿੱਚ ਕਪਿਲ ਪੋਖਰੀਆ ਨੇ ਦੱਖਣੀ ਕੋਰੀਆ ਦੇ ਕਿਮ ਗਿਚੇ ਨੂੰ 5-0 ਨਾਲ ਕਰਾਰੀ ਮਾਤ ਦਿੱਤੀ।
ਇਨ੍ਹਾਂ ਜਿੱਤਾਂ ਨਾਲ ਹੁਣ ਪਰਵੀਨ ਹੁੱਡਾ, ਅੰਕੁਸ਼ ਪੰਘਾਲ ਅਤੇ ਨਰਿੰਦਰ ਬੇਰਵਾਲ ਸਮੇਤ ਕੁੱਲ ਛੇ ਭਾਰਤੀ ਮੁੱਕੇਬਾਜ਼ ਇਨ੍ਹਾਂ ਖੇਡਾਂ ਵਿੱਚੋਂ ਤਗ਼ਮੇ ਲੈ ਕੇ ਪਰਤਣਗੇ। ਪਿਛਲੀ ਵਾਰ ਭਾਰਤ ਨੇ ਮੁੱਕੇਬਾਜ਼ੀ ਵਿੱਚ ਚਾਰ ਤਗ਼ਮੇ ਜਿੱਤੇ ਸਨ, ਜਿਸ ਵਿੱਚ ਇਸ ਵਾਰ ਚੰਗਾ ਸੁਧਾਰ ਹੋਇਆ ਹੈ।
