ਐਸ਼ੇਜ਼ ਲੜੀ: ਚੌਥੇ ਟੈਸਟ ਦੇ ਪਹਿਲੇ ਦਿਨ 20 ਵਿਕਟਾਂ ਡਿੱਗੀਆਂ
ਇੰਗਲੈਂਡ ਪਹਿਲੀ ਪਾਰੀ ’ਚ 110 ਦੌਡ਼ਾਂ ਅਤੇ ਆਸਟਰੇਲੀਆ 152 ਦੌਡ਼ਾਂ ’ਤੇ ਆਲ ਆਊਟ
ਇਥੇ ਆਸਟਰੇਲੀਆ ਤੇ ਇੰਗਲੈਂਡ ਦਰਮਿਆਨ ਐਸ਼ੇਜ਼ ਲੜੀ ਦੇ ਚੌਥੇ ਕ੍ਰਿਕਟ ਟੈਸਟ ਮੈਚ ਦੇ ਪਹਿਲੇ ਦਿਨ ਅੱਜ ਰਿਕਾਰਡ 20 ਵਿਕਟਾਂ ਡਿੱਗੀਆਂ। ਬਾਕਸਿੰਗ ਡੇਅ ਟੈਸਟ ਦੇ ਪਹਿਲੇ ਦਿਨ ਆਸਟਰੇਲੀਆ ਦੀ ਟੀਮ ਪਹਿਲੀ ਪਾਰੀ ’ਚ 152 ਦੌੜਾਂ ’ਤੇ ਆਊਟ ਹੋਣ ਦੇ ਬਾਵਜੂਦ ਮਹਿਮਾਨ ਟੀਮ ਤੋਂ 42 ਦੌੜਾਂ ਅੱਗੇ ਰਹੀ। ਇੰਗਲੈਂਡ ਦੀ ਟੀਮ ਪਹਿਲੀ ਪਾਰੀ ’ਚ 110 ਦੌੜਾਂ ਹੀ ਬਣਾ ਸਕੀ।
ਮੈਲਬਰਨ ਕ੍ਰਿਕਟ ਗਰਾਊਂਡ ਵਿੱਚ ‘ਬਾਕਸਿੰਗ ਡੇਅ’ ਟੈਸਟ ਮੈਚ ਲਈ ਰਿਕਾਰਡ 94,199 ਦਰਸ਼ਕ ਪਹੁੰਚੇ, ਜਦਕਿ ਪਿਛਲਾ ਰਿਕਾਰਡ 93,013 ਦਰਸ਼ਕਾਂ ਦਾ ਸੀ, ਜੋ ਆਸਟਰੇਲੀਆ ਤੇ ਨਿਊਜ਼ੀਲੈਂਡ ਵਿਚਾਲੇ 2015 ਦੇ ਵਿਸ਼ਵ ਕੱਪ ਫਾਈਨਲ ਦੌਰਾਨ ਬਣਿਆ ਸੀ। ਇਸ ਦੌਰਾਨ ਪਹਿਲੇ ਦਿਨ ਦੀ ਖੇਡ ਖਤਮ ਹੋਣ ਸਮੇਂ ਆਸਟਰੇਲੀਆ ਨੇ ਦੂਜੀ ਪਾਰੀ ਵਿੱਚ ਬਿਨਾਂ ਕੋਈ ਵਿਕਟ ਗੁਆਏ ਚਾਰ ਦੌੜਾਂ ਬਣਾ ਕੇ ਇੰਗਲੈਂਡ ਖ਼ਿਲਾਫ਼ 46 ਦੌੜਾਂ ਦੀ ਲੀਡ ਹਾਸਲ ਕਰ ਲਈ ਹੈ।
ਇੰਗਲੈਂਡ ਦੇ ਗੇਂਦਬਾਜ਼ ਜੋਸ਼ ਟੰਗ ਨੇ ਪੰਜ ਵਿਕਟਾਂ ਹਾਸਲ ਕੀਤੀਆਂ ਤੇ ਮੇਜ਼ਬਾਨ ਟੀਮ ਨੂੰ ਪਹਿਲੀ ਪਾਰੀ ’ਚ 152 ਦੌੜਾਂ ’ਤੇ ਸਮੇਟ ਦਿੱਤਾ। ਹਾਲਾਂਕਿ ਜਵਾਬ ਵਿੱਚ ਇੰਗਲੈਂਡ ਦੀ ਟੀਮ 29.5 ਓਵਰਾਂ ਵਿੱਚ 110 ਦੌੜਾਂ ਹੀ ਬਣਾ ਸਕੀ। ਆਸਟਰੇਲੀਆ ਦੇ ਮਾਈਕਲ ਨੇਸੇਰ ਨੇ ਚਾਰ ਵਿਕਟਾਂ ਲਈਆਂ।
ਆਸਟਰੇਲੀਆ ਵੱਲੋਂ ਪਹਿਲੀ ਪਾਰੀ ’ਚ ਮਾਈਕਲ ਨੇਸੇਰ ਨੇ ਸਭ ਤੋਂ ਵੱਧ 35 ਦੌੜਾਂ ਬਣਾਈਆਂ, ਜਦਕਿ ਉਸਮਾਨ ਖਵਾਜਾ ਨੇ 20 ਤੇ ਐਲੈਕਸ ਕੇਰੀ ਨੇ 29 ਦੌੜਾਂ ਦੀ ਪਾਰੀ ਖੇਡੀ। ਦੂਜੇ ਪਾਸੇ ਇੰਗਲੈਂਡ ਵੱਲੋਂ ਪਹਿਲੀ ਪਾਰੀ ’ਚ ਹੈਰੀ ਬਰੁੱਕ ਨੇ 41 ਦੌੜਾਂ, ਗੁਸ ਐਟਕਿੰਨਸਨ ਨੇ 28 ਤੇ ਕਪਤਾਨ ਬੇਨ ਸਟੋਕਸ ਨੇ 16 ਦੌੜਾਂ ਬਣਾਈਆਂ।
ਆਸਟਰੇਲੀਆ ਪਹਿਲੇ ਤਿੰਨ ਟੈਸਟ ਮੈਚ ਜਿੱਤ ਕੇ ਲੜੀ ਪਹਿਲਾਂ ਹੀ ਆਪਣੇ ਨਾਮ ਕਰ ਚੁੱਕਾ ਹੈ।
